ევროპასთან ინტეგრაციის კომიტეტის მიერ, ევრო გადახდის ერთიან სივრცის სისტემაში საქართველოს გაწევრიანების შესაძლებლობის შესახებ შექმნილი სამუშაო ჯგუფის პირველი შეხვედრა გაიმართა. სამუშაო ჯგუფის მიზანია დადგინდეს, თუ რა ნაბიჯები უნდა გადაიდგას საქართველოს SEPA-ში გაწევრიანებისთვის და რა კონკრეტულ შედეგებს მოიტანს ის ქვეყნისთვის. 

„ევრო გადახდის ერთიანი სივრცე (SEPA) წარმოადგენს ევროპის ქვეყნების გაერთიანებას ევროს საბანკო გადარიცხვებისთვის. SEPA-ს სივრცეში მომხმარებელს შესაძლებლობა აქვს ევროში მოახდინოს უნაღდო ანგარიშსწორება სწრაფად, უსაფრთხოდ და ეფექტიანად, როგორც ეს ადგილობრივი (ქვეყნის შიგნით) გადარიცხვებისას ხორციელდება. საბანკო გადახდების სისტემის ინტეგრაცია ხელს უწყობს წევრ ქვეყნებს შორის განსხვავებების აღმოფხვრას და ტრანსსასაზღვრო გადარიცხვების სტანდარტების ჰარმონიზაციას. საქართველოს ევროკავშირში გაწევრიანების მიზნის გათვალისწინებით, საქართველოს SEPA-ში გაერთიანება ევროპის ერთიან ეკონომიკურ სივრცეში ინტეგრაციის გზაზე მნიშვნელოვანი წინგადადგმული ნაბიჯი იქნება“, - აღნიშნა ევროპასთან ინტეგრაციის კომიტეტის თავმჯდომარემ, მაკა ბოჭორიშვილმა.

შეხვედრაზე, აღნიშნულ საკითხთან დაკავშირებით, პრეზენტაციები ევროკავშირსა და საქართველოს შორის ასოცირების შესახებ შეთანხმების განხორციელების მხარდაჭერის II პროექტის ექსპერტმა, ლევან დოლიძემ და საგადასახდო სისტემების დეპარტამენტის უფროსმა ნატალია ჭყოიძემ წარადგინეს. სამუშაო ჯგუფი შეხვედრებს ასევე გამართავს საბანკო სფეროს წარმომადგენლებთან.

ჯგუფის შემადგენლობაში შედიან საქართველოს პარლამენტის წევრები, აღმასრულებელი ხელისუფლების სხვადასხვა უწყებების წარმომადგენლები, ევროკავშირის პროექტის ექსპერტი და სამოქალაქო საზოგადოების წარმომადგენლები. სამუშაო ჯგუფის ფარგლებში შემუშავდება სამოქმედო გეგმა და რეკომენდაციები.

2020 წლის გაზაფხულზე ევროკომისიამ შეიმუშავა ერთობლივი კომუნიკე: „აღმოსავლეთ პარტნიორობის პოლიტიკა 2020 წლის შემდეგ“, რომელიც ითვალისწინებს ევროკავშირის აღმოსავლეთ პარტნიორებთან თანამშრომლობის გაღრმავების შესაძლებლობებს სხვადასხვა მიმართულებით.

თანამშრომლობის ერთ-ერთ საკითხად წარმოდგენილია ევრო გადახდის ერთიანი სივრცის (SEPA) პარტნიორ ქვეყნებზე გავრცელების შესაძლებლობა.

საკითხის მნიშვნელობიდან გამომდინარე, ევროპასთან ინტეგრაციის კომიტეტმა 2021 წლის 26 მარტს კომიტეტის სხდომაზე მიიღო ევრო გადახდის ერთიანი სივრცის სისტემაში საქართველოს გაწევრიანების თაობაზე სამუშაო ჯგუფის შექმნის  გადაწყვეტილება.