ევროპასთან ინტეგრაციის და განათლებისა და მეცნიერების კომიტეტების ერთობლივი სხდომა
მედია და საზოგადოება 28 აპრილი 2021
ევროპასთან ინტეგრაციის კომიტეტის თავმჯდომარის, მაკა ბოჭორიშვილის განმარტებით, განათლების სფერო ჩვენი ქვეყნისთვის ერთ-ერთი პრიორიტეტული სფეროა, რომელიც ძალიან მნიშვნელოვანია სამომავლო განვითარებისთვის.
„განათლების სფერო პერსპექტივაში ქმნის მტკიცე გარანტიებს გრძელვადიანი განვითარებისთვის. ასოცირების შეთანხმებით გათვალისწინებული ვალდებულებები ამ სფეროში საკმაოდ კარგად არის შესრულებული, თუმცა, საინტერესოა როგორ ხდება ევროკავშირში ინტეგრაციით მინიჭებული და მოპოვებული სარგებლის გამოყენება, რა სარგებელს ნახულობენ ჩვენი ქართველი სტუდენტები, რა შესაძლებლობები ეხსნებათ ევროკავშირში ინტეგრაციის კუთხით ჩვენს მეცნიერებს, რა ნაბიჯები იდგმება იმისათვის, რომ ის შესაძლებლობები, რაც ამ პროცესში აქვს ქვეყანას მონიჭებული, მაქსიმალურად იქნას გამოყენებული სახელმწიფოს მიერ. აღმოსავლეთ პარტნიორობის ფარგლებში, განათლების სფერო ასევე ერთ-ერთი პრიორიტეტული მიმართულებაა და ევროკავშირის მხრიდან ძალიან დიდი ყურადღება ექცევა აღმოსავლეთ პარტნიორობის ქვეყნებთან განათლების სფეროში თანამშრომლობას“, - განაცხადა მაკა ბოჭორიშვილმა.
„იმ განაცხადიდან გამომდინარე, რომელიც გულისხმობს, ერთი მხრივ, ასოცირების შეთანხმების თანმიმდევრულ შესრულებას და, მეორე მხრივ, კონკრეტულად ჩვენი პოლიტიკური გუნდის განაცხადს, რომ 2024 წლისთვის მოხდეს ევროკავშირში წევრობის განაცხადის გაკეთება, მნიშვნელოვანია პერიოდულად კომიტეტის წევრებმა და ზოგადად, კომიტეტმა ისევე, როგორც ჩვენმა საზოგადოებამ, მოისმინოს ინფორმაცია, სად ვდგავართ იმ მომენტში ამ გზაზე, რომელსაც ჰქვია საქართველოს ევროპული გზა. ვფიქრობ, რომ მნიშვნელოვანი არის ამ კუთხით კომიტეტებს შორის თანამშრომლობა“, - აღნიშნა განათლებისა და მეცნიერების კომიტეტის თავმჯდომარემ შალვა პაპუაშვილმა.
ანგარიში სხდომაზე განათლებისა და მეცნიერების მინისტრის პირველი მოადგილემ, ეკატერინე დგებუაძემ წარმოადგინა.
„საქართველოს ევროპულ და ევროატლანტიკურ სტრუქტურებში ინტეგრაცია წარმოადგენს ჩვენი ქვეყნის სტრუქტურულ პრიორიტეტს და, შესაბამისად, საქართველოს განათლებისა და მეცნიერების მიმართულებით მიმდინარე რეფორმები და რეფორმის ფარგლებში გასატარებელი აქტივობები შესაბამისობაშია ან გამომდინარეობს ევროკავშირსა და საქართველოს შორის ასოცირების შეთანხმებისა და ასოცირების დღის წესრიგით ნაკისრი ვალდებულებებისგან. განათლებისა და მეცნიერების სფეროში ევროკავშირთან თანამშრომლობის უმთავრეს ქვაკუთხედს წარმოადგენს განათლებისა და მეცნიერების სფეროში სტრატეგიული ჩარჩოს მოწესრიგება. ევროკავშირის განათლებისა და მეცნიერების პოლიტიკას და საქართველოს სისტემის დაახლოების მიზნით, გრძელდება ევროკავშირის მიერ დაფინანსებული საჯარო მმართველობის რეფორმის პროგრამა. პროგრამის კოორდინაციას ახორციელებს საქართველოს მთავრობის ადმინისტრაცია. მოგახსენებთ, რომ აღნიშნული პროგრამის ფარგლებში სამინისტრომ შეიმუშავა 2017 -2021 წლების განათლებისა და მეცნიერების სტრატეგია და სამოქმედო გეგმა. ასევე, მომზადდა სამოქმედო გეგმის შესრულების ანგარიში. ანგარიში შეფასდა საერთაშორისო ექსპერტების მიერ და შეფასებული ანგარიშით საკმაოდ პოზიტიური რეკომენდაციები მიიღო განათლების სამინისტრომ. საქართველოს მთავრობის ადმინისტრაციასთან კოორდინაციით 2020 წლის მეორე ნახევარში, დაახლოებით შემოდგომის დასაწყისში 2022- 32 წლების განათლებისა და მეცნიერების ერთიანი სტრატეგიის დოკუმენტის შემუშავებაზე დავიწყეთ მუშაობა. ამ პროცესს ტექნიკურ დახმარებას უწევს დღეს ევროკავშირის საჯარო მმართველობის მხარდაჭერის პროგრამა, საჯარო მმართველობის პროგრამის ფარგლებში დაკონტრაქტებული ექსპერტები და როგორც საერთაშორისო, ასევე ადგილობრივი ექსპერტები, რომლებიც სამინისტროსთან მჭიდრო თანამშრომლობით ახორციელებენ გარკვეულ აქტივობებს. ევროკავშირის კიდევ ერთი პროექტი არის ჩართული - უნარების განვითარება დასაქმებისთვის და ასევე მსოფლიო ბანკის მხარდაჭერით მოხდა როგორც ადგილობრივი, ასევე საერთაშორისო ექსპერტების აყვანა. დასრულებულია ექსპერტების აყვანის პროცედურა და განათლების სამინისტრო იწყებს მუშაობას 2022 -32 წლების სტრატეგიასა და სამოქმედო გეგმაზე და, რა თქმა უნდა, არა საქართველოს პარლამენტის როლი ამ პროცესში არის ძალიან მნიშვნელოვანი და ჩვენ გვაქვს მაღალი მოლოდინი, რომ პარლამენტი იქნება აქტიურად ჩართული სწორედ ასეთი ხელოვანი დოკუმენტის შემუშავების პროცესში. ზოგადი განათლების მიმართულებით ასოცირების შეთანხმების ფარგლებში, ევროკავშირთან თანამშრომლობის სტრატეგიულად მნიშვნელოვან აქტივობას წარმოადგენს აღმოსავლეთ პარტნიორობის ევროპული სკოლის პროექტის წარმატებით განხორციელება. ასოცირების შესახებ შეთანხმებაში ხაზგასმულად არის აღნიშნული ევროკავშირის აღმოსავლეთ პარტნიორობის ფარგლებში აკადემიური უნარების განვითარების აუცილებლობა. ამ მხრივ, 2020 წლის განმავლობაში დაიწყო და გრძელდება აღმოსავლეთ პარტნიორობის ევროპული სკოლის პროექტის მეორე ფაზის განხორციელება“, - განაცხადა მომხსენებელმა.
მან დეტალურად ისაუბრა სამინისტროს მიერ გადადგმულ თითოეულ ნაბიჯზე ამ მიმართულებით, რის შემდეგაც დეპუტატების კითხვებს უპასუხა.
