ევროპასთან ინტეგრაციის კომიტეტის თავმჯდომარის პირველი მოადგილე ირინე ფრუიძე ახალგაზრდული პარლამენტის ევროპასთან ინტეგრაციისა და საგარეო ურთიერთობათა კომიტეტის წევრებს შეხვდა.

შეხვედრაზე კომიტეტის მიზნებსა და ამოცანებზე ისაუბრეს. როგორც ირინე ფრუიძემ სტუდენტებს განუმარტა, კომიტეტის მიზანია ხელი შეუწყოს საქართველოს ინტეგრაციას ევროკავშირსა და ევროპულ ინსტიტუტებში, ასევე, ხელი შეუწყოს ასოცირების შეთანხმების და ასოცირების დღის წესრიგის დროულ და ეფექტიან განხორციელებას. 

მან ახალგაზრდებს კომიტეტის საქმიანობის ძირითადი მიმართულებები გააცნო. როგორც დეპუტატმა აღნიშნა, კომიტეტი აქტიურად ეწევა საქართველოს პარლამენტში ევროპული მიმართულების გაძლიერებისა და განვითარების, აგრეთვე, ევროინტეგრაციული პროცესების პოპულარიზაციის მიზნით საინფორმაციო, საგანმანათლებლო და ანალიტიკურ-ექსპერტულ საქმიანობას. 

ირინე ფრუიძემ ახალგაზრდებს ასევე გააცნო ღია მმართველობის გასაძლიერებლად საქართველოს პარლამენტის მიერ გადადგმული ნაბიჯები და ის სერვისები, რომელიც საკანონმდებლო ორგანოს ვებ გვერდს საზოგადოების ჩართულობის გასაზრდელად ბოლო პერიოდში დაემატა.

შეხვედრა კითხვა-პასუხის ფორმატში გაგრძელდა. 

„ძალიან აქტიური ახალგაზრდები არიან, დაისვა ძალიან საინტერესო კითხვები. კარგია, რომ ახალგაზრდების მხრიდან არის ასეთი მხარდაჭერა საქართველოს ევროკავშირში ინტეგრაციის მიმართ. რაც მთავარია, ეს არის ინფორმირებული მხარდაჭერა. იმედი მაქვს, რომ ისინი ამ საკითხის ელჩები იქნებიან ახალგაზრდებში“, - განაცხადა ირინე ფრუიძემ შეხვედრის ბოლოს.