ევრონესტის საპარლამენტო ასამბლეის სამუშაო ჯგუფის ხელმძღვანელი  გუგული მაღრაძე  საქართველოში ბელარუსის ელჩს, მიხაილ მიატლიკოვს შეხვდა.

შეხვედრაზე ნოემბრის თვეში საქართველოში ჩატარებული ევრონესტის საპარლამენტო ასამბლეის ფარგლებში ბელარუსთან მუდმივმოქმედი სამუშაო ჯგუფის შეხვედრის შედეგები განიხილეს. ბელორუსიის ელჩი გაეცნო იმ საკითხებს,  რომელთა შესახებაც აღნიშნული ჯგუფის შეხვედრაზე იმსჯელეს.

გუგული მაღრაძემ ელჩს გააცნო იმ დისკუსიის შინაარსი და შედეგები, რომელშიც მონაწილეობდნენ ევრონესტის წევრი  ევროპარლამენტარი დეპუტატები, ასევე, საერთაშორისო ორგანიზაციების წარმომადგენლები, რომლებიც სისტემატიურად აშუქებენ და აფასებენ ევრონესტის ქვეყნებში მიმდინარე პროცესებს.

შეხვედრაზე აღინიშნა, რომ ერთი მხრივ  ბელარუსს  სჭირდება მხარდაჭერა იმ სიტუაციაში, როდესაც ხდება ზეწოლა ბელორუსიის ლიდერზე რუსეთის მხრიდან, მაგრამ ამასთან,  ევროპული სტრუქტურები არ დახუჭავენ თვალს დემოკრატიის იმ დარღვევებზე, რაც ხდება ბელარუსში.

კერძოდ, ODIHR-მა წარმოადგინა იმ დარღვევების ნუსხა, რაც თან ახლდა 17 ნოემბერს  ბელარუსში ჩატარებულ საპარლამენტო არჩევნებს. ეს არჩევნები ჩაითვალა როგორც უკანგადადგმული ნაბიჯი დემოკრატიულობის თვალსაზრისით. აღინიშნა, რომ თუ წინა პარლამენტში 2 ოპოზიციის წარმომადგენელი იყო, ბელარუსის ამჟამინდელ პარლამენტში ოპოზიციური წარმომადგენელი აღარ ჰყავთ.

ელჩის განცხადებით,  დღევანდელ პარლამენტში წარმოდგენილია ლიბერალური პარტიის წევრები, რომლებიც ოპოზიციურ ძალას წარმოადგენს ბელარუსში.

გუგული მაღრაძის მოსაზრებით,  უკეთესია, თუ ასეთი ინფორმაცია უფრო დროულად იქნება  მიწოდებული ევრონესტისთვის.

შეხვედრაზე განიხილეს საკითხი,  რომელიც ყოველთვის  დგება დღის წესრიგში ევრონესტის  საპარლამენტო ასამბლეის მუშაობისას.

„ეს არის ის , რომ ბელორუსია არის ერთადერთი ქვეყანა ევროპაში სადაც შენარჩუნებულია სიკვდილით დასჯა.  თუ ბელორუსია გადადგამს ნაბიჯს სიკვდილით დასჯის გაუქმებაზე და პირველ ეტაპზე გამოაცხადებს   მორატორიუმს სიკვდილით დასჯაზე,  ეს შექმნის დადებით განწყობას ბელორუსიის პოლიტიკური ისტაბლიშმენტის მიმართ“, - განაცხადა გუგული მაღრაძემ.

მან ბელარუსის ელჩს  გააცნო ინფორმაცია, რომ  ევრონესტის სხდომაზე თავისი პოზიციები წარმოადგინეს ევროკავშირის მიერ მოპატიჟებულმა ბელარუსის ოპოზიციის წარმომადგენლებმა, ამ შეხვედრაზევე გადაწყდა, რომ ევროკავშირი მოიპატიჟებს ბელრუსის ოპოზიციას სამუშაო ჯგუფის ყოველ შეხვედრაზე. 

მან ასევე გააცნო სტუმარს სამუშაო ჯგუფის გადაწყვეტილება, რომ  გაძლიერდება ევრონესტის საპარლამენტო ასამბლეის მუშაობა როგორც ოპოზიციასთან, ისე ბელრუსის სახელმწიფოს ოფიციალურ წარმომადგენლებთან.

შეხვედრაზე გადაწყდა, რომ საქართველოში ბელარუსის საელჩო  სისტემატიურად მიაწვდის ინფორმაციას ევრონესტს  და ევრონესტში ბელორუსიის სამუშაო ჯგუფის   ხელმძღვანელს გუგული მაღრაძეს ბელორუსიაში არსებული ვითარების შესახებ.

შეხვედრაზე ასევე განიხილეს ბელრუსსა და საქართველოს შორის კულტურული და ეკონომიკური კავშირების გაძლიერების საკითხები.