თამარ ტალიაშვილი ევროპის საბჭოს საპარლამენტო ასამბლეაში „ახალგაზრდობისა და მედიის“ თემაზე მომხსენებლად აირჩიეს
თამარ ტალიაშვილის განმარტებით, საქართველოს საპარლამენტო დელეგაციის წარმატებაა ის, რომ ევროპის საბჭო იწყებს მუშაობას ჩვენ მიერ ინიცირებულ საკითხებზე და ასევე, გლობალურად საზოგადოებისათვის, ამ უმნიშვნელოვანეს თემას ქართველი მომხსენებელი ეყოლება ევროპაში.
„ახალგაზრდობისა და მედიის საკითხებზე მუშაობისას მაქსიმალურად ვეცდები ჩავრთო ქართველი, ევროპელი ახალგაზრდები რეკომენდაციებზე მუშაობის პროცესში, რადგან მჯერა რომ ახალგაზრდობის პოლიტიკა ახალგაზრდების აქტიური თანამონაწილეობით უნდა იგეგმებოდეს და ხორციელდებოდეს. ასევე მნიშვნელოვანია თანამედროვე მედიის როლი, რომელიც უდიდეს როლს თამაშობს აზრის გამოხატვის, სოციალური ურთიერთობების შენარჩუნებისა და ახალი კავშირების დამყარების, შემეცნებითი, კრეატიული და საგანმანათლებლო აქტივობისთვის“, - განაცხადა თამარ ტალიაშვილმა აღნიშნული კომიტეტის შეხვედრაზე.
შეხვედრაზე კომიტეტის წევრებმა განიხილეს ისეთი თემები, როგორიცაა ევროპის ქვეყნებში ისტორიის სწავლება, კოვიდ პანდემიის გავლენა განათლებასა და კულტურაზე, ახალგაზრდების როლის განმტკიცება კონფლიქტების პრევენციასა და მოგვარებაში, სპორტული პოლიტიკა კრიზისულ პერიოდში და ასევე იმსჯელეს ევროსაბჭოს საპარლამენტო ასამბლეის საქმიანობისთვის დღის წესრიგით გათვალისწინებულ სხვადასხვა საორგანიზაციო საკითხებზე.
