პარლამენტის თავმჯდომარის პირველი მოადგილე გიორგი ვოლსკი საქართველოში ვიზიტით მყოფ უკრაინის პრეზიდენტის მუდმივ წარმომადგენელს ყირიმის ავტონომიურ რესპუბლიკაში ანტონ კორინევიჩს შეხვდა.

მხარეებმა ისაუბრეს უკრაინაში და საქართველოში არსებულ ვითარებაზე, კერძოდ, რუსეთის ფედერაციის აგრესიასა და ოკუპირებული ტერიტორიების პრობლემებზე.

„ვისაუბრეთ იმ გამოცდილებაზე, რომელიც დღეს საქართველოს აქვს მოლაპარაკებების ფორმატებში და აგრეთვე, არანაკლები ინფორმაცია მივიღეთ უკრაინული მხარისგან იმ ვითარებაზე, რომელიც დღეს ყირიმში არის შექმნილი“, - განაცხადა შეხვედრის კომენტირებისას გიორგი ვოლსკიმ.

მისივე თქმით, მთავარი აქცენტი გაკეთდა იმაზე, რომ საერთაშორისო თანამეგობრობის პოზიცია ტერიტორიული მთლიანობის საკითხთან დაკავშირებით უცვლელია, როგორც საქართველოს, ასევე უკრაინასთან მიმართებაში და ამასთანავე, საკმაოდ მკაცრია აგრესორის მხარის მიმართ.

„ამ პოზიციის შენარჩუნებაში ძალისხმევის გაერთიანება არის მნიშვნელოვანი. მეორე მხრივ, უკრაინაც და საქართველოც მხარს უჭერს იმ პოლიტიკას, რომელიც გულისხმობს საერთაშორისო მონაწილეობით მოლაპარაკებების ფორმატებში ამ დიალოგის შენარჩუნებას და განვითარებას“, - აღნიშნა გიორგი ვოლსკიმ.