ქარსაფარი ზოლების არსებული მდგომარეობისა და განვითარების პერსპექტივებზე იმსჯელეს აგრარულ საკითხთა კომიტეტის თავმჯდომარე გელა სამხარაულსა და საქართველოს გარემოს დაცვისა და ბუნებრივი რესურსების სამინისტროს წარმომადგენლებს შორის გამართულ შეხვედრაზე, რომელიც დღეს, გარემოს დაცვისა და ბუნებრივი რესურსების სამინისტროში შედგა. შეხვედრაში ასევე მონაწილეობდნენ სხვა სამინისტროებისა და არასამთავრობო სექტორის წარმომადგენლებიც.

როგორც შეხვედრაზე გარემოს დაცვისა და ბუნებრივი რესურსების მინისტრმა გიგლა აგულაშვილმა განაცხადა, პრობლემა გასული საუკუნის 90-იანი წლებიდან გაჩნდა, როდესაც მასობრივად დაიწყო ქარსაფარ ზოლებში ხეების ჭრა, ამას წლების შემდეგ დაემატა კლიმატური ცვლილებები, რაც დღეს ქვეყანაში უკვე იწვევს თითქმის ყველა სახის მიწის დეგრადირებას, შირაქში კი გაუდაბნოების პროცესიცაა დაწყებული. აღნიშნული პრობლემის დაძლევის გზებზე იმსჯელეს დღეს სამინისტროში გამართულ შეხვედრაზე. დარგის სპეციალისტები მიიჩნევენ, რომ პრობლემის გადაჭრისთვის ქარსაფარი ზოლების აღდგენა და განახლებაა საჭირო.

როგორც შეხვედრაზე აღინიშნა, საკითხს ართულებს ასვე ამ მიმართულებით სამართლებრივი რეგულაციების არარსებობა, მწირია ინფორმაცია მესაკუთრეებისა და მფლობელების, ასევე ფართობების შესახებ, არასრულყოფილია მონაცემთა ბაზაც. ამ პრობლემის შესწავლა და შესაბამის კანონპროექტზე მუშაობა აგრარულ საკითხთა კომიტეტმა ჯერ კიდევ მაშინ დაიწყო, როდესაც კომიტეტს გიგლა აგულაშვილი ხელმძღვანელობდა. დღევანდელ შეხვედრაზე კანონპროექტის ერთ-ერთმა თანაავტორმა, აგრარულ საკითხთა კომიტეტის აპარატის უფროსმა ივერი ახალბედაშვილმა კომიტეტში შემუშავებული „ქარსაფარი ზოლების შესახებ“ კანონპროექტის ძირითადი დებულებები გააცნო შეკრებილთ და მათ შექმნილი მდგომარეობის შესახებ ზოგადი ინფორმაცია მიაწოდა. „ქარსაფარი ზოლების თემა რომ აქტუალურია, ეს განსაკუთრებით კლიმატური ცვლილებების პროცესში გამოიხატა და მათი მნიშვნელობა დღეს უფრო დიდია, ვიდრე ეს 20-30 წლის წინათ იყო. მიწების დიდი ნაწილი რომ ნაკლებად ნაყოფიერია, ამაში წვლილი სწორედ ქარსაფარი ზოლების განადგურებას მიუძღვის,“ - განაცხადა ივერი ახალბედაშვილმა და აქვე აღნიშნა, თუ რა საგანგაშო მონაცემს იძლევა ამ მიმართულების კვლევები.

შეკრებილები შეთანხმდნენ, რომ მთავარ მიზანს, ამოსავალიწერტილს წარმოადგენს ქვეყანაში ქარსაფარი, ანუ დაცვითი ზოლების აღდგენა-განახლება, რამაც ხელი უნდა შეუშალოს ნიადაგის გამოფიტვას, დეგრადაციას. მათი აზრით, საბოლოო შედეგის მისაღწევად კი, კანონმდებლობის შემუშავების პარალელურად, პრაქტიკული ნაბიჯები დღეიდანვე უნდა გადაიდგას.

შეხვედრაზე გამოთქმული შენიშვნებისა და წინადადებების გათვალისწინებით, კანონპროექტზე მუშაობა გაგრძელდება, შესაბამისი სტრუქტურების წარმომადგენლები კი ქარსაფარი ზოლების აღდგენის პროცესის დასაჩქარებლად და წასახალისებლად უახლოეს მომავალში პრაქტიკულ წინადადებებს წარმოადგენენ.