2020 წლის 31 ოქტომბრის საპარლამენტო არჩევნების შემსწავლელმა საქართველოს პარლამენტის დროებითმა საგამოძიებო კომისიამ პირველი სხდომა გამართა და საორგანიზაციო საკითხები განიხილა.

დროებითი საგამოძიებო კომისიის თავმჯდომარედ არჩეული იქნა ფრაქცია „ქართული ოცნების“ თავმჯდომარის პირველი მოადგილე გივი მიქანაძე, ხოლო კომისიის მდივნად - უფრაქციო პარლამენტის წევრი, პარტია „ევროპელი სოციალისტების“ წარმომადგენელი დავით ზილფიმიანი.

კომისიის წევრებმა შეიმუშავეს კომისიის დებულება, სადაც ასახულია კომისიის გამოსაკვლევ საკითხთა წრე და უფლებამოსილებები, კომისიის შემადგენლობა და სტრუქტურა, კომისიის მუშაობის წესი, ასევე ორგანიზაციულ - ტექნიკური უზრუნველყოფისა და დაფინანსების საკითხები.

დროებითი საგამოძიებო კომისიის წევრებმა, ასევე შეიმუშავეს კომისიის ანგარიში, რომელიც მოიცავს 17 თებერვლიდან 13 მაისამდე პერიოდს.

„ეს არის ძალიან მოკლე ანგარიში, რომელიც კონკრეტულ აქტივობებზე არ არის ორიენტირებული, გამომდინარე იქიდან, რომ 17 თებერვლიდან დღემდე ეს არის პირველი სხდომა, ანუ კომისიას კონკრეტული აქტივობები არ განუხორციელებია. ეს არის ახსნა-განმარტებითი კონტექსტით მოცული მცირე ანგარიში, რომელიც ეხება იმ ფაქტორებს, რამაც განაპირობა, რომ აქამდე ვერ ჩატარდა ეს სხდომა“, - განაცხადა დროებითი საგამოძიებო კომისიის თავმჯდომარემ, გივი მიქანაძემ.

კომისიას საქმიანობის სამთვიანი ვადა 17 მაისს გასდის, აქედან გამომდინარე, კომისიის წევრებმა მიზანშეწონილად მიიჩნიეს, რომ კომისიის უფლებამოსილების ვადა ერთი თვით გახანგრძლივდეს.

აღნიშნული საკითხი წარედგინება ჯერ პარლამენტის ბიუროს, ხოლო შემდეგ საკითხი განსახილველად  პარლამენტის პლენარულ სხდომაზე გავა.

კომისიის მორიგი სხდომა გაიმართება 2021 წლის 18 მაისს, 13 საათზე, რა დროსაც განხილული იქნება საქმიანობის გეგმა, რომლის მიხედვითაც კომისია განახორციელებს დაკისრებულ მოვალეობებს.

სხდომის დასრულების შემდეგ, კომისიის წევრებმა მედიის წარმომადგენლებისთვის ბრიფინგი გამართეს. 

როგორც დროებითი საგამოძიებო კომისიის თავმჯდომარემ, გივი მიქანაძემ განაცხადა, 2020 წლის 31 ოქტომბრის საქართველოს პარლამენტის არჩევნები საერთაშორისო საზოგადოების მიერ აღიარებული იქნა როგორც კონკურენტული, ჩატარებული ძირითადი თავისუფლებების დაცვით.

„მიუხედავად აღნიშნულისა, ოპოზიციამ, რომლის დიდი ნაწილი წარმოადგენდა საარჩევნო ბარიერგადალახულ პარტიებს, განაცხადა, რომ არჩევნები ჩატარდა დარღვევების ფონზე და ღიად გამოუცხადა ბოიკოტი მეათე მოწვევის პარლამენტს. „ქართული ოცნების“ არაერთი მოწოდების მიუხედავად, ოპოზიციური პარტიების ხელმძღვანელობას დღემდე არცერთი მტკიცებულება არ წარმოუდგენია, რასაც შეეძლო დაედასტურებინა მათ მიერ გაცხადებული დარღვევები. აღსანიშნავია, რომ ოპოზიციური პარტიების თერთმეტი ათასზე მეტმა უბნის კომისიის წევრმა ხელი მოაწერა იმ ოქმებს, რომელითაც საოლქო და ცენტრალური საარჩევნო კომისიების მიერ მოხდა შედეგების დათვლა და საბოლოო შედეგების შეჯამება. მმართველი გუნდის მიერ ოპოზიციისთვის შეთავაზებული იყო უბნების გადათვლა, ჩანაწერების ამოღება და ერთობლივად განხილვა, თუმცა არც ამ შეთავაზებაზე განხორციელდა მათი მხრიდან თანამშრომლობა. არჩევნების შემდეგ, ოპოზიციის დიდი ნაწილი საკუთარ არგუმენტებს „სამართლიანი არჩევნების“ მიერ ჩატარებულ პარალელური დათვლის შედეგებზე აფუძნებდა. ცდომილება, რაზეც სადამკვირვებლო ორგანიზაცია და ოპოზიცია აპელირებდნენ, თვენახევრის განმავლობაში საზოგადოებას უქმნიდა ყალბ წარმოდგენას, რომ ხელისუფლების მხრიდან გარკვეულ მანიპულაციებს ჰქონდა ადგილი. „ქართული ოცნების“ წარმომადგენელთა ინიციატივით განხორციელებული კომუნიკაციისა და ცდომილების საწინააღმდეგო მტკიცებულებების წარდგენის საფუძველზე „სამართლიანი არჩევნები“ იძულებული გახდა შიდა აუდიტის მეშვეობით გადაეთვალა პარალელური დათვლის შედეგები და ეღიარებინა, რომ ინფორმაცია ცდომილების შესახებ სიმართლეს არ შეესაბამებოდა. პარალელურად, მმართველმა გუნდმა ოპოზიციას შესთავაზა პარლამენტის ფორმატში დროებითი საგამოძიებო კომისიის შექმნა, რაც შესაძლებელს გახდიდა ყველა მტკიცებულების წარდგენას და შესწავლას“, - განაცხადა გივი მიქანაძემ.

მისივე თქმით,  „ქართული ოცნების“ მიერ დროებითი საგამოძიებო კომისიის მუშაობაში მონაწილეობის არაერთი შეთავაზება ოპოზიციის მისამართით საჯაროდ გაკეთდა, რაზეც ოპოზიციის სხვადასხვა ლიდერების მხრიდან პასუხი იყო, რომ  ისინი არ ითანამშრომლებენ კომისიასთან და არც მტკიცებულებებს წარუდგენენ.

„მიუხედავად აღნიშნულისა, 2021 წლის თებერვალში მმართველმა გუნდმა დააინიცირა და 17 თებერვალს შექმნა დროებითი საგამოძიებო კომისია, რომელშიც ჩართულობისა და მუშაობის სურვილი ამ დრომდე მხოლოდ „ევროპელმა სოციალისტებმა“ გამოთქვეს იმის გათვალისწინებით, რომ მიმდინარეობდა ამერიკის შეერთებული შტატებისა და ევროკავშირის ელჩების ჩართულობით ფასილიტაციის პროცესი, ხოლო მოგვიანებით, ევროპული საბჭოს პრეზიდენტის მიერ ინიცირებული მედიაციის პროცესი, საერთაშორისო პარტნიორების რჩევით მიღებული იქნა გადაწყვეტილება, რომ დავლოდებოდით მოლაპარაკებების დასრულებას და ოპოზიციის ფართო ჩართულობით განგვეხორციელებინა დროებითი საგამოძიებო კომისიის საქმიანობა“, - აღნიშნა გივი მიქანაძემ.

დროებითი საგამოძიებო კომისიის თავმჯდომარის განმარტებით, სამთვიანი ვადით შექმნილი კომისიის მანდატი ვრცელდება წინასაარჩევნო, არჩევნების დღესა და არჩევნების შემდგომ პერიოდზე.

„ამ ეტაპისთვის, კომისია დაკომპლექტებულია ოთხი წევრისგან - ორი მმართველი პარტიისა და ორი „ევროპელი სოციალისტების“ წარმომადგენელი დეპუტატებისგან. იმის გათვალისწინებით, რომ 17 მაისს იწურება დროებითი საგამოძიებო კომისიის მანდატის ვადა და ვითვალისწინებთ რა, რომ ოპოზიციური სპექტრის დიდი ნაწილი პარლამენტში წარმოდგენილი არის და შეუერთდა საპარლამენტო საქმიანობას, მნიშვნელოვნად მიგვაჩნია კომისიის საქმიანობის მანდატის გახანგრძლივება და მასში ოპოზიციასთან ერთად საქმიანობის განხორციელება“, - განაცხადა გივი მიქანაძემ.

დროებითი საგამოძიებო კომისიის თავმჯდომარემ მოუწოდა ოპოზიციური პარტიების წარმომადგენელ დეპუტატებს, რომ 17 მაისის ჩათვლით გამოთქვან სურვილი კომისიაში გაწევრიანებისა და მონაწილეობის მისაღებად.

„ასევე, მოვუწოდებ ყველა დაინტერესებულ პირს და ორგანიზაციას წარმოადგინონ ნებისმიერი სახის მტკიცებულება არჩვენების დარღვევასთან დაკავშირებით სპეციალურად გახსნილ ელექტრონულ მისამართზე [email protected]“, - განაცხადა გივი მიქანაძემ.

დროებითი საგამოძიებო კომისიის მდივნის, დავით ზილფიმიანის განცხადებით, „ევროპელმა სოციალისტებმა“ კომისიაში მუშაობის სურვილი და მზაობა თავიდანვე განაცხადეს.

„რა თქმა უნდა, მოხარული ვიქნები თუკი სხვა კოლეგები ოპოზიციიდან მოისურვებენ და მონაწილეობას მიიღებენ ამ კომისიის მუშაობაში. იმთავითვე მინდა გითხრათ, რომ ვერავითარ შემთხვევაში დავუშვებ იმას, რომ ეს საქმიანობა ფორმალურ ხასიათს ტოვებდეს ნებისმიერი ადამიანის თვალში და ამისთვის, პირველივე სხდომაზე, პირადად ჩემ მიერ წარდგენილი იქნება შესწავლის მეთოდიკა. მეთოდიკამ უნდა უზრუნველყოს რეზულტატი და არა სუბიექტურმა მოსაზრებებმა. ეს არის ჩემი მრწამსი და ამ კუთხით ვიმუშავებთ“, - აღნიშნა დავით ზილფიმიანმა.

ფრაქცია „ქართული ოცნებიდან“ კომისიის წევრის, ალუდა ღუდუშაურის განცხადებით, დღეს სტარტი აიღო ისეთმა მნიშვნელოვანმა პლატფორმამ, როგორიც არის არჩევნებთან დაკავშირებით შექმნილი დროებითი საგამოძიებო კომისია.

„დღეს მართლაც ისტორიული დღეა, რადგან არცერთ დროს საქართველოს ისტორიაში, არცერთ გამარჯვებულ მმართველ პოლიტიკურ ძალას არ შეუქმნია არჩევნების საკითხთან დაკავშირებით ისეთი მაღალი შესაძლებლობის პლატფორმა, როგორიც არის დროებითი საგამოძიებო კომისია. უპირველეს ყოვლისა, ერთი მხრივ, ეს არის „ქართული ოცნების“, როგორც მაღალი პასუხისმგებლობის მქონე პოლიტიკური ძალის გადაწყვეტილება, ხოლო მეორე მხრივ, „ქართული ოცნების“ ძლიერი პოლიტიკური ძალის გამოვლინება, მოქმედება და თამამი გადაწყვეტილება. ჩვენ, „ქართულმა ოცნებამ“ 2012 წლიდან, როდესაც დავამარცხეთ და ქართველმა ხალხმა უარი უთხრა იმ პოლიტიკურ ძალას, რომელიც, პრაქტიკულად, როგორც ჩვენს საზოგადოებას, ასევე ჩვენს ქვეყანას უფსკრულისკენ მიაქანებდა, დავიწყეთ პროგრესზე ორიენტირებული მოქმედება, დემოკრატიის განმტკიცება და ადამიანის უფლებებზე ორიენტირება. თუ ოპოზიციას მართლაც რაიმე აქვს როგორც დოკუმენტური მტკიცებულება, ასევე ნებისმიერი ის სარჩელი, რომელიც, მათი თქმით,  სამართლებრივად გამართული იყო, მაგრამ არც ერთმა ინსტიტუციამ თურმე არ განიხილა, შემობრძანდნენ, წარმოადგინონ ასეთი დოკუმენტი, ასეთი დასაბუთებული პრეტენზია და საგამოძიებო კომისია შესაძლებლობის ფარგლებში განიხილავს ყველა საკითხს იმიტომ, რომ ერთხელ და სამუდამოდ წერტილი დაესვას სპეკულაციებს არჩევნებთან დაკავშირებით“, - აღნიშნა ალუდა ღუდუშაურმა.

დროებითი საგამოძიებო კომისიის წევრის, „ევროპელი სოციალისტების“ წარმომადგენლის, ფრიდონ ინჯიას განცხადებით, დღეს საპარლამენტო ცხოვრებაში მნიშვნელოვანი ეტაპი დაიწყო.

„სპეკულაციებს, რომელიც ამ თვეების განმავლობაში იყო, წერტილი უნდა დაესვას. თუ მტკიცებულება არსებობდა სამი და ოთხი თვის წინ, ის მტკიცებულება დღესაც მტკიცებულებად უნდა იყოს. აქედან გამომდინარე, თუ ვინმეს გააჩნია რაიმე მსგავსი მტკიცებულება, ჩვენ მზად ვართ სკრუპულოზურად განვიხილოთ ყველა ის დოკუმენტი, რომელსაც წარმოადგენენ“, - განაცხადა ფრიდონ ინჯიამ.