სამოქმედო გეგმის განხილვამდე, საგამოძიებო კომისიის თავმჯდომარემ, გივი მიქანაძემ კიდევ ერთხელ მოუწოდა საპარლამენტო ოპოზიციას, მონაწილეობა მიიღონ კომისიის მუშაობაში.

„სამწუხაროა, რომ ოპოზიციის იმ წარმომადგენლებმა, რომლებიც მოგვიანებით შემოუერთდნენ საქართველოს პარლამენტს უარი განაცხადეს ამ კომისიაში მუშაობაზე და უფრო მეტიც, კითხვის ნიშნის ქვეშ დააყენეს ამ კომისიის მუშაობის საჭიროება, მაშინ როდესაც ეს ადამიანები 6 თვის განმავლობაში საზოგადოებას უმტკიცებდნენ, რომ მათ ჰქონდათ უტყუარი ფაქტები იმის შესახებ, რომ არჩევნების დროს განხორციელდა ისეთი უხეში დარღვევები, რასაც შეეძლო გავლენა მოეხდინა არჩევნების საბოლოო შედეგებზე. ძალიან სამწუხაროა, რომ ისინი უარს აცხადებენ ამ პროცესებში მონაწილეობის მიღებაზე, თუმცა ჩვენ პასუხისმგებლიანად ვეკიდებით ამ პროცესს და ის საკითხები, რომელიც კომისიის წინაშე, მისი მანდატიდან გამომდინარე დაისვა, აუცილებლად იქნება ბოლომდე შესწავლილი და გამოძიებული“, - განაცხადა გივი მიქანაძემ. მისი თქმით, ოპოზიციის წარმომადგენლებს ნებისმიერ დროს აქვს შესაძლებლობა, შესაბამისი პროცედურების დაცვით, კომისიის მუშაობას შემოუერთდნენ.

„ოპოზიციას დღესაც შეუძლია შემოუერთდეს კომისიას და მონაწილეობა მიიღონ მის საქმიანობაში, როგორც თავიანთი მოსაზრებების და არგუმენტების გამოთქმის კუთხით, ასევე გარკვეული მტკიცებულებებისა და ინფორმაციის მოწოდების თვალსაზრისით, რომელიც არსებითად მნიშვნელოვანი იქნება კომისიის საქმიანობისთვის“, - განაცხადა საგამოძიებო კომისიის თავმჯდომარემ.

გივი მიქანაძის ინფორმაციით, კომისიას, თავისი მოქმედების ვადით, საკუთარი აპარატი ეყოლება, რისთვისაც ხაზინადართა საბჭოს შუამდგომლობა წარედგინა, რათა ამ აპარატის შესაქმნელად და უზრუნველსაყოფად გარკვეული დაფინანსება გამოიყოს.

მისივე ინფორმაციით, კომისიის სამოქმედო გეგმა ასევე ითვალისწინებს გარკვეული უბნების გადათვლას, რაც აუცილებელი კომპონენტია იმისთვის, რომ გადათვლის პროცესი მაქსიმალურად პროფესიონალურ დონეზე წარიმართოს.

„ამ ბიუჯეტით მოვითხოვეთ, რომ 12 ე.წ. მთვლელის დაქირავება მოხდეს, რომლებიც კომისიის წევრების თანდასწრებით, პირდაპირ ეთერში გადათვლის პროცესს განახორციელებენ მაშინ, როდესაც მოხდება შეთანხმება თუ რომელი უბნების გადათვლა ხდება და რა პრინციპით განხორციელდება ეს გადათვლა. იმისთვის, რომ ამ პროცესთან მიმართებაში საჯაროობა და ღიაობა იქნას უზრუნველყოფილი ეს პროცესი პირდაპირ ეთერში, „ლაივ სტრიმით“ იქნება გადაცემული“, - განაცხადა გივი მიქანაძემ.

კომისიის წევრის, ალუდა ღუდუშაურის განცხადებით, საგამოძიებო კომისია იქნება უაღრესად ეფექტური, პროცესი კი გამჭვირვალე, გახსნილი და ღია და რომელიც პასუხს გასცემს ყველა კითხვას.

სხდომაზე კომისიის წევრებს სამოქმედო გეგმა წარედგინათ, რომელიც სხვა საკითხებთან ერთად, ითვალისწინებს ცენტრალურ საარჩევნო კომისიაში, შინაგან საქმეთა სამინისტრში და გენერალურ პროკურატურაში 2020 წლის 31 ოქტომბრის საპარლამენტო არჩევნებთან დაკავშირებით ინფორმაციის გამოთხოვას.

„ცენტრალურ საარჩევნო კომისიაში გასაგზავნ წერილებში ვითხოვთ ოლქების მითითებით იმ საარჩევნო უბნების ჩამონათვალს, რომელთა შემაჯამებელ ოქმებშიც დაფიქსირდა დისბალანსი. ვითხოვთ ასევე, ამ ოქმების ასლებს. ასევე, ვითხოვთ ქვეყნის მასშტაბით დისბალანსის გამომწვევი ბიულეტენების რაოდენობის ჯამის თაობაზე მონაცემებს. ასევე, იმ საარჩევნო უბნების (ოლქების მითითებით) ჩამონათვალს, სადაც ოთხი არასამთავრობო ორგანიზაციის მიერ („სამართლიანი არჩვნები და დემოკრატიის საერთაშორისო საზოგადოება“, „ახალგაზრდა იურისტთა ასოციაცია“, „საერთაშორისო გამჭვირვალობა-საქართველო“ და „მრავალეროვანი საქართველო“, მოთხოვნილი იქნა საარჩევნო ბიულეტენების გადათვლა საჩივრის ავტორთა მითითებით. ასევე, ვითხოვთ 2020 წლის 31 ოქტომბრის საპარლამენტო არჩევნებზე საარჩევნო დარღვევებთან დაკავშირებით, სასამართლოში წარდგენილი საჩივრების სტატისტიკას, რომელიც მოიცავს ინფორმაციას წარდგენილი საჩივრების რაოდენობასთან დაკავშირებით, საჩივრის ავტორთა მონაცემებს, სამართალწარმოების შედეგებსა და საჩივართა დაუკმაყოფილებლობის შემთხვევაში იმ საფუძვლებს, რითაც ის არ იქნა დაკმაყოფილებული. ასევე, ცესკოს ვთხოვთ წარმოადგინოს თბილისის მასშტაბით, ოლქებისა და უბნების მითითებით, იმ კომისიის წევრთა სია, რომელ უბნებშიც არანაირი დარღვევა და საჩივარი არ დაფიქსირებულა და ეს კომისიის წევრები უნდა იყვნენ პროფესიული ნიშნით შერჩეულნი რომელთაგან ვთანხმდებით, რომ შემთხვევითობის პრინციპით, მოვახდენთ 12 ადამიანის შერჩევას, რომელსაც კომისიის აპარატის ფარგლებში გაუფორმდებათ შრომითი ხელშეკრულება და ისინი იქნებიან ჩართული შერჩეული უბნების გადათვლის პროცესში, რომლის მეთვალყურეობას და ზედამხედველობას საგამოძიებო კომისია განახორციელებს. ცესკოს ვთხოვთ მაქსიმალურად შემჭიდროვებულ ვადებში წარმოადგინოს ინფორმაცია“, - განმარტა კომისიის თავმჯდომარემ.

მისი განცხადებით, შინაგან საქმეთა სამინისტროში და გენერალურ პროკურატურაში გასაგზავნ წერილში კომისია ითხოვს, რომ არა უგვიანეს 1 ივნისამდე წარმოადგინონ შემდეგი სახის ინფორმაცია: 2020 წლის 31 ოქტომბრის საპარლამენტო არჩევნების წინასაარჩევნო კამპანიის პერიოდსა და კენჭისყრის დღეს ძალადობის, მოსყიდვისა და სამსახურეობრივი უფლებამოსილების გადამეტების (ადმინისტრაციული რესურსის გამოყენება) ფაქტების საფუძველზე დაწყებული გამოძიების მიმდინარეობის შესახებ. ასევე, ზემოაღნიშნული მოვლენებიდან გამომდინარე აქვს თუ არა ბრალი ვინმეს წარდგენილი. დადებითი პასუხის შემთხვევაში კი შესაბამისმა უწყებებმა უნდა წარმოადგინონ ინფორმაცია იმის შესახებ თუ რამდენ პირს და რა კვალიფიკაციით აქვს ბრალი წარდგენილი. ასევე ინფორმაცია, როგორც გაცხადებულ საჩივრებზე ასევე ნებისმიერი საშუალებით (მათ შორის, მასმედიის საშუალებებიდან) მიღებულ ინფორმაციაზე რეაგირების შესახებ.

კომისიის სამოქმედო გეგმის თანახმად, საინფორმაციო შეხვედრა გაიმართება საქართველოში აკრედიტებული დიპლომატიური წარმომადგენლობებისა და საერთაშორისო ორგანიზაციების აგრეთვე, არჩევნებზე მონიტორინგის განმახორციელებელი ადგილობრივი ორგანიზაციების წარმომადგენლებთან.

კომისიის თავმჯდომარის განცხადებით, დიპლომატიურ კორპუსთან და საერთაშორისო ორგანიზაციების წარმომადგენლებთან საინფორმაციო სახის შეხვედრა სავარაუდოდ, ხვალ გაიმართება.

„ჩვენ მათ ამ ინფორმაციას გავუზიარებთ და ამით კიდევ ერთხელ დავუდასტურებთ ჩვენს ღიაობას და გამჭვირვალეობას, მეორე მხრივ კი, შეგვიძლია მათგან მოვისმენთ გარკვეული რჩევები, თუ რაზე გავაკეთოთ მეტი აქცენტირება ამ სამუშაო პროცესის განმავლობაში“, - განაცხადა გივი მიქანაძემ.

სამოქმედო გეგმა ასევე, ითვალისწინებს გადასათვლელი უბნების შერჩევის მეთოდოლოგიისა და რაოდენობის განსაზღვრას, საარჩევნო უბნების მიხედვით ბიულეტენების გადათვლას; კომისიის სხდომაზე მოსაწვევ პირთა სიის შედგენას და დამტკიცებას; მოწვეულ პირებზე ახსნა-განმარტებების ჩამორთმევას.

კომისიის ოპოზიციონერმა დეპუტატებმა ხმის დათვლის მეთოდოლოგიასთან დაკავშირებით საკუთარი პოზიციები წარადგინეს. ფრიდონ ინჯია საგამოძიებო კომისიას სთავაზობს, რომ არჩევნების შედეგების გადათვლისას უბნების ასარჩევად ლოტოს პრინციპი გამოიყენონ. მისი თქმით, ყველა უბნის ნომერი ლოტოტრონში უნდა მოთავსდეს და იქედან სპეციალურად დაქირავებულმა მთვლელმა ნომრები თავად ამოიღოს. დროებითი საგამოძიებო კომისიის მდივანს, დავით ზილფიმიანს მიაჩნია, რომ გადათვლა უნდა მოხდეს ოქმების დონეზე და არა ბიულეტენების დონეზე.

საბოლოოდ, კომისიის წევრები დღევანდელ სხდომაზე შეთანხმდნენ, რომ მეთოდოლოგიაზე მას შემდეგ იმსჯელებენ, რაც შესაბამისი ორგანიზაციებიდან გამოთხოვილ ინფორმაციას მიიღებენ.

როგორც სხდომაზე აღინიშნა, მეთოდოლოგიის შეჯერების შემდეგ, დაიწყება გადათვლის პროცესი, რის შემდგომაც უფრო ზუსტად განისაზღვრება იმ პირთა წრე, რომელთაც ახსნა-განმარტებების მისაღებად, მოსაწვევები დაეგზავნებათ.

საბოლოოდ, საგამოძიებო კომისიის მიერ მომზადებული და დამტკიცებული დასკვნა საქართველოს პარლამენტის ბიუროს წარედგინება.