ბექა ოდიშარია: „მიუხედავად ეთნიკური წარმომავლობისა, რელიგიური აღმსარებლობისა თუ კანის ფერისა - ყველას განვიხილავთ თანასწორ მოქალაქეებად“
„როდესაც ჩვენ ვსაუბრობთ ეროვნულ უმცირესობებზე, ტოპონიმი საქართველოს შემთხვევაში, ალბათ არის პირობითი. მიუხედავად ეთნიკური წარმომავლობისა, რელიგიური აღმსარებლობისა თუ კანის ფერისა აბსოლუტურად ყველას განვიხილავთ ჩვენს თანასწორ მოქალაქეებად. საზღვარგარეთ მცხოვრები საქართველოს მოქალაქეები, ეთნიკური უმცირესობების წარმომადგენლები, ზუსტად ისეთივე მშობლიურნი და საინტერესონი არიან ჩვენთვის, როგორც ეთნიკურად ქართველები. ჩვენ ვაშენებთ მრავალეთნიკურ სახელმწიფოს. ჩვენი დედაქალაქი ალბათ არის მსოფლიოში ერთ-ერთი ყველაზე მრავალეთნიკური ქალაქი, რაც ჩვენი სიამაყეა“, - განაცხადა ბექა ოდიშარიამ.
ბექა ოდიშარიამ სხდომაზე აღნიშნული საბჭოს თავმჯდომარედ, პარლამენტის წევრი რიმა ბერაძე დაასახელა. მან ასევე, წარადგინა საბჭოს წევრები, რომელშიც საკანონმდებლო და აღმასრულებელი ხელისუფლების წარმომადგენლების გარდა, სხვადასხვა თემების და ასოციაციის წარმომადგენლები შედიან.
საბჭო აქტიურად იმუშავებს ეთნიკური უმცირესობების ახალგაზრდების დასაქმებისა და კულტურული მიმართულებებითაც.
„ეროვნული უმცირესობები ჩვენი მოსახლეობის მნიშვნელოვან ნაწილს შეადგენენ. მათი უმრავლესობა ჩვენი ქვეყნის მოქალაქეა და მრავალი წელია ჩვენი ქვეყნის განვითარებაში საკუთარი წვლილი შეაქვთ. ამ ეტაპზე საბჭო 16 თემს აერთიანებს და ის ღიაა ამ თემებზე მომუშავე ორგანიზაციებისა და ექსპერტებისთვის. დარწმუნებული ვარ, რომ საბჭოს საქმიანობა იქნება ძალიან წარმატებული და ის მნიშვნელოვან როლს შეასრულებს ეროვნული უმცირესობების საპარლამენტო საქმიანობის ჩართვასა და ორმხრივი ინტეგრაციის მიმართულებებით“, - განაცხადა ფრაქცია „ქართული ოცნების“ თავმჯდომარის მოადგილემ, რიმა ბერაძემ.
კომიტეტის დღევანდელ სხდომას, შერიგებისა და თანასწორობის საკითხებში სახელმწიფო მინისტრის მოადგილე ლია გიგაური ესწრებოდა.
„ყველას, ჩვენს ქვეყანაში მცხოვრებ მოქალაქეებს, ძალიან გვჭირდება ჰარმონიული თანაცხოვრება, თანასწორობის მიღწევა და ერთმანეთთან თანამშრომლობით საქართველოს დემოკრატიული განვითარების მიღწევა“, - განაცხადა ლია გიგაურმა.
როგორც სხდომაზე აღინიშნა, სამინისტროს წარმომადგენელი აქტიურად იქნება ჩართული სამეცნიერო-საკონსულტაციო საბჭოს მუშაობაში.
დიასპორისა და კავკასიის საკითხთა კომიტეტმა დღეს საბჭოს შემქნას მხარი ერთხმად დაუჭირა. კომიტეტმა დღესვე საკონსულტაციო საბჭოს დებულება და სამთვიანი სამოქმედო გეგმა დაამტკიცა.
სხდომაზე ასევე, მხარი დაუჭირეს დიასპორისა და კავკასიის საკითხებზე მომუშავე დიასპორისა და კავკასიის საკითხთა კომიტეტის სამეცნიერო-საკონსულტაციო საბჭოს შექმნის საკითხს, რომელსაც კომიტეტის თავმჯდომარე ბექა ოდიშარია უხელმძღვანელებს.
სხდომაზე განისაზღვრა საბჭოს განახლებული შემადგენლობა და საქმიანობის წესი.
განხილულ საკითხებთან დაკავშირებით სხდომაში მონაწილე სხვადასხვა ორგანიზაციების წარმომადგენლებმა საკუთარი ხედვები და მოსაზრებები წარადგინეს.
