დიასპორისა და კავკასიის საკითხთა კომიტეტის თავმჯდომარე, ბექა ოდიშარია საქართველოს პრეზიდენტის მრჩეველს სამართლებრივ საკითხებში, თამარ ტყეშელაშვილს და კომუნიკაციის სამსახურის წარმომადგენელს პიერ ალექსანდრ კრევუს შეხვდა.

მხარეებმა თანამშრომლობის კიდევ უფრო გააქტიურებაზე, ერთობლივ პროექტებზე და ინიციატივებზე ისაუბრეს.

„საქართველოს პრეზიდენტი, მე-9 მოწვევის პარლამენტში, იყო ჩვენი კომიტეტის ძალიან აქტიური წევრი, რომელიც კომიტეტის თავმჯდომარის  მოადგილის თანამდებობასაც იკავებდა.  სხვა წევრებთან ერთად, მის ინიციატივებს წარმოადგენს მათ შორის, ჩანაწერი კონსტიტუციაში, რომელიც უცხოეთში მცხოვრებ ჩვენს თანამემამულეებს და ორმაგი მოქალაქეობის შესახებ კანონში რიგ ცვლილებებს შეეხება. პრეზიდენტს ემიგრაციაში ყოფნის დიდი გამოცდილება აქვს. ის გულშემატკივრობს ემიგრაციაში მყოფ ჩვენ თანამემამულეებს, მუდმივად იჩენს ინტერესს ჩვენი კომიტეტის საქმიანობის მიმართ და ასევე, აქვს გარკვეული ინიციატივები. ახლაც გაჟღერდა ერთ-ერთი მათგანი, რომელზეც ჯერ სამუშაო რეჟიმში გვექნება მსჯელობა. მოხარული ვარ, რომ ჩვენ აქტიურად ვთანამშრომლობთ პრეზიდენტის ადმინისტრაციასთან“, - განაცხადა შეხვედრის დასრულების შემდეგ ბექა ოდიშარიამ.