დარგობრივი ეკონომიკისა და ეკონომიკური პოლიტიკის კომიტეტისა და USAID-ის ორგანიზებით, საჯარო და კერძო სექტორებს შორის დიალოგის ფარგლებში მსუბუქი მრეწველობის სექტორის განვითარების გამოწვევებსა და პერსპექტივებზე იმსჯელეს
დარგობრივი ეკონომიკისა და ეკონომიკური პოლიტიკის კომიტეტისა და USAID-ის ეკონომიკური უსაფრთხოების პროგრამის ორგანიზებით საჯარო და კერძო სექტორებს შორის დიალოგი გაიმართა თემაზე - „მსუბუქი მრეწველობის განვითარების გამოწვევები და პერსპექტივები საქართველოში: „ავეჯის და შესაფუთი მასალების წარმოება“.
სასტუმრო „სტამბაში“ გამართულ შეხვედრაზე, მსუბუქი მრეწველობის სექტორში არსებული გამოწვევებისა და მათი გადაჭრის გზების შესახებ მსჯელობდნენ კანონმდებლები, საქართველოს აღმასრულებელი ხელისუფლების, კერძო სექტორისა და საერთაშორისო ორგანიზაციების წარმომადგენლები და დარგის ექსპერტები.
შეხვედრაზე წარმოდგენილი იყო პროგრამის ფარგლებში ჩატარებული ავეჯისა და შესაფუთი მასალების წარმოებაში არსებული სირთულეებისა და პოტენციალის კვლევის შედეგები, რომელმაც აჩვენა, რომ საქართველოში მსუბუქი მრეწველობა მთელი რიგი გამოწვევების წინაშე დგას, რომელთა შორისაა კვალიფიკაციის ნაკლებობა, ნედლეულზე და ინვესტიციაზე წვდომა, ასევე, ბაზარზე წვდომის სირთულეები, მოძველებული დანადგარები და დაბალი ღირებულების მქონე წარმოება.
დარგში არსებული სირთულეების შესახებ ისაუბრეს საჯარო სექტორის წარმომადგენლებმა, ექსპერტებმა, დეპუტატებმა.
დაისვა კითხვები, გაიმართა დისკუსია.
შეხვედრაში პარლამენტის წევრებთან ერთად მონაწილეობდნენ ეკონომიკისა და მდგრადი განვითარების, ასევე განათლებისა და მეცნიერების სამინისტროების წარმომადგენლები, „აწარმოე საქართველოში“ და ინოვაციებისა და ტექნოლოგიების სააგენტოების წარმომადგენლები.
შეხვედრის დასასრულს, პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ, დავით სონღულაშვილმა განაცხადა, რომ მსუბუქი მრეწველობა ერთ-ერთი მნიშვნელოვანი და საინტერესო, მაგრამ გამოწვევებით სავსე სექტორია.
„თუმცა არის შესაძლებლობა, რომ ის კიდევ უფრო განვითარდეს. ჩვენ პირველივე დღიდან დავაანონსეთ, რომ ჩვენი კომიტეტი იქნება ქმედითი პლატფორმა, სადაც სახელმწიფო და საჯარო სექტორი ერთობლივად შეძლებენ იმ პრობლემების განხილვას, რომელიც არსებობს ამა თუ იმ სექტორში და ამას აუცილებლად მოჰყვება შესაბამისი რეაგირება. დღევანდელი დღეც ამის მაგალითია.ჩვენ აქ წარმოდგენილ საკითხებს მაქსიმალურად მხარს დავუჭერთ იქ, სადაც შეგვიძლია, განსაკუთრებით ფინანსებზე ხელმისაწვდომობის ნაწილში და „აწარმოე საქართველოში“ არის ერთ-ერთი საუკეთესო ინსტრუმენტი ამისთვის. განათლებისა და მეცნიერების სამინისტროსთან ერთად გავაგრძელებთ მუშაობას, თუ სად შეიძლება გამოიძებნოს გამოსავალი იმ გამოწვევისთვის როგორიცაა კვალიფიციური მუშა-ხელი, რაც დამახასიათებელია ბევრი სექტორისთვის. ასევე, ჩვენი კომიტეტის ფარგლებში მაქსიმალურად მზად ვართ, რომ ზედმიწევნით შევასრულოთ საზედამხედველო ფუნქცია და მივყვეთ ამ და არა მარტო ამ საკითხის ბოლომდე გადაწყვეტას და სადამდეც ეს შესაძლებელია, სახელმწიფო მხარში ედგეს კერძო სექტორს, ბიზნესს“, - განაცხადა დავით სონღულაშვილმა შეხვედრის შეჯამებისას.
