კულტურის კომიტეტის თავმჯდომარე ელისო ბოლქვაძემ ესტონეთის პარლამენტის კულტურის საკითხთა კომიტეტის თავმჯდომარე აადუ მუსტთან ინლაინ შეხვედრა გამართა, რომელსაც საქართველოს ელჩი ესტონეთში, არჩილ ყარაულაშვილი ესწრებდა. შეხვედრას ორგანიზება გაუწია საქართველოს საელჩომ.

საუბარი შეეხო საქართველოსა და ესტონეთის ურთიერთობებს კულტურის სფეროში, ესტონეთის ევროინტეგრაციის გამოცდილებას კულტურის მიმართულებით, ასევე, ორი ქვეყნის შესაბამის ინსტიტუტებს შორის პარტნიორობის გაძლიერების აუცილებლობას. განსაკუთრებული აქცენტი გაკეთდა სახელოვნებო განათლების სფეროში ესტონური გამოცდილების გაზიარებაზე.

„ბატონი აადუ მუსტი არის ძალიან გამოცდილი პოლიტიკოსი. იგი ამავდროულად, ტარტუს უნივერსიტეტის პროფესორია. მან გაგვიზიარა გამოცდილებები, როგორ ებრძვის პანდემიით შექმნილ გამოწვევებს კულტურის კომიტეტი ესტონეთში, ის ინოვაციური მიდგომები, რომელიც პანდემიიდან გამომდინარე მნიშვნელოვანია კულტურის სფეროს გადასარჩენად“,  - განაცხადა ელისო ბოლქვაძემ.

დღესვე კულტურის კომიტეტის თავმჯდომარემ ონლაინ შეხვედრა გამართა ესტონეთის განათლებისა და ახალგაზრდობის საკითხთა საბჭოს ახალგაზრდობის დეპარტამენტის დირექტორთან, სილვერ პრამანთან, რომელსაც ესტონეთის განათლებისა და მეცნიერების სამინისტროს ახალგაზრდობის და ტალანტების პოლიტიკის დეპარტამენტის მთავარი ექსპერტი კატრინ ოლტი, განათლებისა და ახალგაზრდობის საბჭოს თანამშრომლობის დეპარტამენტის მთავარი ექსპერტი ანუ რეინსალუ და ესტონეთის მუსიკალური სასწავლებლების ასოციაციის წარმომადგენელი ესწრებოდნენ.

„ვისაუბრეთ სახელოვნებო განათლების საკითხებზე. მოგეხსენებათ ჩვენს ესტონელ მეგობრებს დიდი გამოცდილება აქვთ სახელოვნებო განათლების რეფორმაში. მინდა, მადლობა გადავუხადო საქართველოს ელჩს ესტონეთში ბატონ არჩილ ყარაულაშვლს, რომელმაც ორგანიზება გაუწია და შესაძლებელი გახადა ეს საინტერესო შეხვდერა შემდგარიყო“, - განაცხადა ელისო ბოლქვაძემ.

შეხვედრის დასასრულს მხარეები შეთანხმდნენ მჭიდრო სამომავლო თანამშრომლობაზე ყველა ზემოხსენებული მიმართულებით.