განათლებისა და მეცნიერების კომიტეტის სხდომაზე კომიტეტის თავმჯდომარის პირველი მოადგილე გიორგი ამილახვარი, ხოლო თავმჯდომარის მოადგილედ თამარ ტალიაშვილი აირჩიეს.

საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილემ თამარ გაბუნიამ „საზოგადოებრივი ჯანმრთელობის შესახებ“ საქართველოს კანონში შესატანი ცვლილებები წარმოადგინა.

კანონპროექტის მიღებით გაჩნდება საფუძველი იმისათვის, რომ ეპიდემიოლოგიური მდგომარეობის გათვალისწინებით, საქართველოს მთავრობამ საქართველოში შემოსვლის ან/​და​ ყოფნის მიზნით, შესაბამის უცხოელთა და მოქალაქეობის არმქონე პირთა წრის მიმართ, დაადგინოს ჯანმრთელობისა და უბედური შემთხვევის დაზღვევის პირობები და წესები.

„ახალი კორონავირუსით (SARS-COV-2) გამოწვეული ინფექციის COVID-19-ის გავრცელების შეკავებისა და მისი გავრცელების პრევენციული ზომების შემოღების მიზნით, მიზანშეწონილად ჩაითვალა, საქართველოს ტერიტორიაზე უცხოელი და მოქალაქეობის არმქონე სტუდენტის შემოსვლისა და ყოფნისათვის საქართველოს მთავრობის მიერ შემოღებულიყო ჯანმრთელობისა და უბედური შემთხვევის დაზღვევის პირობები და წესები“, - განაცხადა თამარ გაბუნიამ.

კომიტეტმა მეორე მოსმენით განიხილა „ზოგადი განათლების შესახებ“ საქართველოს კანონში ცვლილებების შეტანის თაობაზე“ კანონპროექტი, რომლის მიღებითაც კერძო სკოლა უფლებამოსილი იქნება ფინანსური დავალიანების მქონე მოსწავლეს შეუწყვიტოს მოსწავლის სტატუსი ფინანსური დავალიანების წარმოშობის სემესტრის დასრულებიდან მომდევნო სასწავლო სემესტრის დაწყებამდე.

როგორც კომიტეტის თავმჯდომარემ და კანონპროექტის ერთ-ერთმა ინიციატორმა შალვა პაპუაშვილმა აღნიშნა, პლენარულ სხდომაზე განხილვისას გამოითქვა სხვადასხვა მოსაზრებები აღნიშნული ცვლილების ამოქმედების ვადებთან დაკავშირებით, კერძოდ, 1 იანვრიდან თუ 1 სექტემბრიდან ამოქმედდეს მიღების შემთხვევაში კანონი.

ოპოზიციის წარმომადგენლის, ალექსანდრე ელისაშვილის მოსაზრებით, ცვლილება დაუყოვნებლივ ასამოქმედებელია ისევ ბავშვის ინტერესებიდან გამომდინარე. ამავე მოსაზრებას იზიარებენ კომიტეტის სხვა წევრებიც.

კანონპროექტის როგორც ამოქმედების ვადასთან, ასევე აღსრულების მექანიზმთან და პროცედურებთან დაკავშირებით მოსაზრებები გამოთქვეს სხდომაზე მოწვეულმა კერძო სკოლების ხელმძღვანელებმა.

კომიტეტმა მხარი დაუჭირა განხილული კანონპროექტის პლენარულ სხდომაზე გატანას.