საქართველოს პარლამენტის კვლევით ცენტრს გიორგი ხელაშვილი უხელმძღვანელებს
საქართველოს პარლამენტში საკანონმდებლო პროცესის ეფექტიანობისა და ანალიტიკური საქმიანობის ხელშეწყობის მიზნით, საჯარო სამართლის იურიდიული პირი – კვლევითი ცენტრი შეიქმნება.
დღეს, საქართველოს პარლამენტში პარლამენტის კვლევითი ცენტრის სამომავლო განვითარების ხედვის პრეზენტაცია გაიმართა.
სამეთვალყურეო საბჭოს მიერ შერჩეულმა პარლამენტის კვლევითი ცენტრის დირექტორმა, გიორგი ხელაშვილმა საზოგადოებას, პარლამენტის წევრებს და აკადემიური წრეების წარმომადგენლებს საქართველოს პარლამენტის კვლევითი ცენტრის მისია, ამოცანები და საქმიანობის მთავარი პრინციპები გააცნო.
კვლევითი ცენტრის დირექტორის განცხადებით, კვლევითი ცენტრის დაარსება ძალიან მნიშვნელოვანი ინიციატივაა. ცენტრის სპეციფიკა და მისია შესაძლებლობას მისცემს პარლამენტს თვისობრივად შეცვალოს მუშაობის ხარისხი კვლევაზე და ანალიზზე დაფუძნებული საქმიანობის მეშვეობით.
„კვლევითი ცენტრის მიზანია საქართველოს პარლამენტისათვის საქართველოსთვის მნიშვნელოვანი მოვლენებისა და პროცესების შესახებ დროული, დამოუკიდებელი, ობიექტური, კონფიდენციალური და ავტორიტეტული ანალიტიკური ინფორმაციის მიწოდება საკანონმდებლო პროცესისა და პარლამენტის საქმიანობის გაუმჯობესების მიზნით“, - განაცხადა პრეზენტაციაზე გიორგი ხელაშვილმა.
გიორგი ხელაშვილმა ასევე ისაუბრა ცენტრის სტრატეგიაზე, ახალ სტრუქტურაზე, საქმიანობის სახეებზე და მათი გაუმჯობესების გზებზე, კვლევის მიმართულებებსა და პრიორიტეტებზე. მანვე დამსწრე საზოგადოებას პარლამენტის კვლევითი ცენტრის პარტნიორებისა და თანამშრომლობის შესახებ მიაწოდა ინფორმაცია.
