განათლების, მეცნიერებისა და კულტურის კომიტეტის თავმჯდომარის მოადგილე გუგული მაღრაძე პროექტის - „ისტორიულ გზაგასაყარზე, სწავლებისა და სწავლის ახალი მიდგომები“ პირველ სამუშაო შეხვედრაში მონაწილეობდა.

შეხვედრაზე განიხილეს განათლების სისტემაში კონფლიქტ-სენსიტიური სწავლების მიმართულებით არსებული გამოწვევები.

პროექტი „მშვიდობისა და სამოქალაქო განვითარების ცენტრის“ (CPCD) ორგანიზებით იმართება და მიზნად ისახავს ხელი შეუწყოს ქართულ-აფხაზური და ქართულ-ოსური კონფლიქტების მიმართ ტრანსფორმაციული მიდგომების განვითარებას და მათ ინტეგრაციას უახლესი ისტორიის სწავლების პროცესში.

გუგული მაღრაძემ ყურადღება გაამახვილა კონფლიქტების სწავლებასთან დაკავშირებით უმაღლესი განათლების სისტემაში არსებულ მდგომარეობასა და სამომავლო გეგმებზე. მისი თქმით, ივანე ჯავახიშვილის სახელობის თბილისის სახელმწიფო უნივერსიტეტი დღეს ერთადერთია, რომელიც ახორციელებს კონფლიქტის ანალიზისა და მართვის სამაგისტრო და სადოქტორო პროგრამებს. პროგრამა მომზადებულია „ჯორჯ მეისონის უნივერსიტეტის კონფლიქტის ანალიზის და გადაჭრის ინსტიტუტთან“ თანამშრომლობით და სრულად შეესაბამება ამ ინსტიტუტის სამაგისტრო პროგრამის სტანდარტებს.

„ძალიან მნიშვნელოვანია სოციალური მეცნიერებების, განათლებისა და ფსიქოლოგიის საგანმანათლებლო პროგრამებზე ისწავლებოდეს კონფლიქტების ანალიზი, რაც სტუდენტებს გამოუმუშავებს სხვადასხვა დონის კონფლიქტების მოგვარებისა და პრევენციისათვის საჭირო უნარ-ჩვევებს, ასევე აუცილებელია მომავალმა მასწავლებლებმა მიიღონ დამატებითი ცოდნა კონფლიქტების სწავლების მიმართულებით არსებული კვლევებისა და თანამედროვე მიდგომების შესახებ“, - განაცხადა გუგული მაღრაძემ

შეხვედრაში მონაწილეობდნენ საქართველოს განათლების, მეცნიერების კულტურისა და სპორტის სამინისტროს წარმომადგენლები, ისტორიკოსები, ისტორიის სახელმძღვანელოების ავტორები, მასწავლებელთა პროფესიული გაერთიანებების წარმომადგენლები, მასწავლებლები, კონფლიქტის ტრანსფორმაციის ექსპერტები და შესაბამის თემატიკაზე მომუშავე არასამთავრობო ორგანიზაციები.

პროექტი ხორციელდება გაეროს განვითარების პროგრამისა და ევროკავშირის საერთო მექანიზმის, COBERM-ის დაფინანსებით.