განათლებისა და მეცნიერების კომიტეტის სხდომაზე „ზოგადი განათლების შესახებ“ საქართველოს კანონში ცვლილებების შეტანის თაობაზე“ კანონპროექტი განიხილეს.

„მეორე მოსმენისას ჩავასწორეთ, რომ  როცა სკოლის ინიციტივით წყდება სტატუსის შეწყვეტა, სკოლა მეორე დღესვე ვალდებულია გადასცეს დოკუმენტები, ხოლო თუ ეს არის კანონიერი წარმომადგენლის ინიციატივით, მაშინ სკოლას 3 სამუშაო დღე აქვს იმისთვის, რომ საბუთები მოამზადოს და გადასცეს კანონიერ წარმომადგენელს. თავის მხრივ, სახელმწიფო ვალდებულია, უზრუნველყოს ამ მოსწავლის ჩარიცხვა საჯარო სკოლაში, რომელიც გეოგრაფიულად იქნება ყველაზე ახლო მის საცხოვრებელთან, თუკი კანონიერი წარმომადგენელი კერძო სკოლაში არ გადაიყვანს ამ მოსწავლეს“, - განაცხადა კომიტეტის თავმჯდომარემ, შალვა პაპუაშვილმა.

დღესვე კომიტეტმა „პროფესიული განათლების შესახებ“ საქართველოს კანონით განსაზღვრული კანონქვემდებარე ნორმატიული აქტების მიღების თაობაზე ინფორმაცია მოისმინა.

„კომიტეტის წინა სხდომაზე გვქონდა საუბარი გარდამავალი დებულებით გათვალისწინებული კანონქვემდებარე აქტების ნუსხიდან, რომელიც მიღებული უნდა ყოფილიყო 2020 წლის ოქტომბრამდე, ნაწილი მიღებულია, ნაწილი კი არის შემუშავებული და მიღებას ელოდება. სამინისტრომ გადმოგვიგზავნა სია ამ კანონქვემდებარე აქტების და ასევე მათი მიღების გრაფიკი“ , - განაცხადა კომიტეტის თავმჯდომარემ.

განათლებისა და მეცნიერების მინისტრის მოადგილემ, თამარ ქიტიაშვილმა ისაუბრა იმ მიზეზებზე, თუ რატომ არ მოხდა რამდენიმე კანონქვემდებარე აქტის მიღება 2020 წლის ოქტომბრამდე.

მისი თქმით, დოკუმენტებზე მუშაობა მიმდინარეობს. მისივე განმარტებით, სამინისტროს მიერ წარმოდგენილ გეგმაში მითითებულია თითოეული კანონქვემდებარე აქტის შესრულების ზუსტი ვადები. 

„ჩვენ მიერ წარმოდგენილი გეგმა არის ძალიან რეალისტური. პროცესი ბევრი უწყების ურთიერთდაკავშირებას გულისხმობს და მათ აქტივობებზე ვართ დამოკიდებული. რასაკვირველია, ეს პროცესი სამინისტროს კომუნიკაციით ხდება, მაგრამ სამინისტროს არ გააჩნია რესურსი იმისთვის, რომ აწარმოოს ფართომასშტაბიანი საერთაშორისო კვლევები, სიტუაციური ანალიზები, სხვადასხვა ქვეყნების გამოცდილებების შესწავლა, რისთვისაც ჩვენ ძირითადად დონორულ მხარდაჭერას ვიყენებთ და ყველაფერი ეს, თავისი კომპლექსურობის გათვალისწინებით, სწორედ ამგვარ ანალიზს უნდა დაეყრდნოს. თუკი იქნება შესაძლებლობა, პირველ რიგში, ჩვენს ინტერესებშია, რომ ოპტიმისტურ ვადებში მოხდეს გეგმის დანერგვა, თუმცა ეს არის ის ვადები, რომელიც აუცილებლად იქნება დაცული“, - განაცხადა თამარ ქიტიაშვილმა.

როგორც შალვა პაპუაშვილმა აღნიშნა,. კომიტეტი საპროცედურო საკითხთა და წესების კომიტეტს აცნობებს გარდამავალი დებულებით გათვალისწინებული კანონქვემდებარე აქტების შესრულების შესახებ და ასევე იმ გრაფიკის შესახებ, რომელიც განათლებისა და მეცნიერების სამინისტრომ წარმოადგინა.

„პროფესიული განათლება მთლიანად ქვეყნისთვის და, შესაბამისად, კომიტეტისა და სამინისტროსთვის წარმოადგენს ერთ-ერთ მთავარ პრიორიტეტს. ჩვენ მზად ვართ საკანონმდებლო კუთხით დავეხმაროთ მთავრობას, რომ წინსვლა იყოს მალე და ხელშესახები, ამავე დროს, საზედამხედველო ფუნქციის განხორციელების პროცესში დავაკვირდებით, რომ სამინისტროს მიერ წარმოდგენილი გეგმები შესრულდეს თავის ვადებში“, - განაცხადა შალვა პაპუაშვილმა.