კორეის რესპუბლიკის პარლამენტთან მეგობრობის ჯგუფის წევრები კორეის რესპუბლიკის საქმეთა დროებით რწმუნებულს შეხვდნენ
კორეის რესპუბლიკის პარლამენტთან მეგობრობის ჯგუფის ხელმძღვანელმა, შოთა ხაბარელმა და ჯგუფის წევრებმა კორეის რესპუბლიკის საქმეთა დროებით რწმუნებულთან, ჩანგ დაესუსთან გაცნობითი შეხვედრა გამართეს.
შეხვედრაზე მხარეებმა საქართველოსა და კორეის რესპუბლიკას შორის არსებული ურთიერთობები მიმოიხილეს და თანამშრომლობის გაღრმავების მნიშვნელობაზე ისაუბრეს.
აღინიშნა, რომ კორეის რესპუბლიკა საქართველოში რამდენიმე მნიშვნელოვან საინვესტიციო პროექტს ახორციელებს და კორეული მხარე მზადაა ბიზნეს ურთიერთობები კიდევ უფრო დინამიურად და აქტიურად განავითაროს.
შეხვედრის მონაწილეებმა საქართველოში კორეის რესპუბლიკის საელჩოს გახსნის აუცილებლობას გაუსვეს ხაზი და თბილისში კორეის რესპუბლიკის დიპლომატიური მისიის სრულფასოვანი საქმიანობის მნიშვნელობაზე ისაუბრეს.
კორეის რესპუბლიკის პარლამენტთან მეგობრობის ჯგუფის ხელმძღვანელმა საპარლამენტთაშორისო ურთიერთობების გაძლიერების მნიშვნელობაზე ისაუბრა და აღნიშნა, რომ საგაზაფხულო სესიის განმავლობაში, პარლამენტის თავმჯდომარესთან ერთად, სეულში მეგობრობის ჯგუფის ვიზიტი იგეგმება, რაც ორ ქვეყნას შორის თანამშრომლობას კიდევ უფრო გააძლიერებს.
შეხვედრაზე, რომელსაც მეგობრობის ჯგუფის წევრები ენძელა მაჭავარიანი, გიორგი თოთლაძე და რამაზ ნიკოლაიშვილი დაესწრნენ, მხარეები სამომავლო ურთიერთობების მიმართულებებზე შეთანხმდნენ.
შეხვედრის დასრულების შემდეგ, ჩანგ დაესუსმა საქართველოს პარლამენტის სასახლე დაათვალიერა და კორეის რესპუბლიკის ფინანსური მხარდაჭერით გახსნილი სტამბა მოინახულა.
