საგარეო ურთიერთობათა კომიტეტის თავმჯდომარე, ნიკოლოზ სამხარაძე ევროკავშირის ელჩს კარლ ჰარცელს შეხვდა.

მხარეებმა საქართველოს საგარეო პოლიტიკის ძირითად მიმართულებებზე ისაუბრეს. ხაზი გაესვა საქართველოს მიერ გაცხადებულ ამბიციურ სამომავლო გეგმას, რომელიც 2024 წელს ევროკავშირში გაწევრიანების ოფიციალური განაცხადის გაკეთებას გულისხმობს. როგორც შეხვედრისას აღინიშნა, ამ მიზნის მისაღწევად ქვეყანა განახორციელებს რეფორმებს და შეასრულებს ევროკავშირთან ასოცირების შეთანხმებით ნაკისრ ვალდებულებებს.

შეხვედრისას საუბარი შეეხო ოკუპირებული აფხაზეთის და ცხინვალის რეგიონში არსებულ ძალიან მძიმე ვითარებას.

ნიკოლოზ სამხარაძემ, დიპლომატს მადლობა გადაუხადა ევროკავშირის მიერ, საქართველოს ტერიტორიული მთლიანობისა და ასევე, მსოფლიოს მასშტაბით, არაღიარების პოლიტიკის მხარდაჭერისთვის.

შეხვედრისას, ხაზი გაესვა ევროკავშირის მისიის როლს პარლამენტის ინსტიტუციურ გაძლიერებაში. მხარეებმა ისაუბრეს პარლამენტის სამომავლო გეგმებზე, მათ შორის დაგეგმილ საარჩევნო რეფორმაზე.

შეხვედრაზე, მხარეებმა, სამხრეთ კავკასიის რეგიონში მიმდინარე პროცესები, შავი ზღვის რეგიონში არსებულ გამოწვევები და რეგიონის უსაფრთხოების საკითხები მიმოიხილეს.

ევროკავშირის ელჩთან გამართულ შეხვედრაში საგარეო ურთიერთობათა კომიტეტის თავმჯდომარის პირველი მოადგილე, გიორგი ხელაშვილი მონაწილეობდა.