ღია მმართველობის მუდმივმოქმედი საპარლამენტო საბჭო, დაფუძნებიდან პირველად, არსებული გამჭვირვალობის ხარისხის მნიშვნელოვნად გაუმჯობესების მიზნით, 2020-2021 წლების სამოქმედო გეგმის შემუშავებისთვის მიღებულ ინიციატივებს აქვეყნებს.

აღნიშნული გადაწყვეტილება შესაბამისობაშია ღიაობის პრინციპებთან და ხელს უწყობს საბჭოს საქმიანობაში მოქალაქეების ჩართულობისა და მისი საქმიანობის შესახებ ინფორმირებულობის ამაღლებას. თავის მხრივ, პროცესების სრულად გამჭვირვალედ წარმართვა ემსახურება მოქალაქეთა მიერ გადაწყვეტილებების მიღებასა და მმართველობაში, მათ შორის, ძირითადი სამოქალაქო უფლებების დაცვაში, მონაწილეობის მიმართ გახსნილობას და დემოკრატიულობის ხარისხის განმტკიცებას.

სამუშაო გეგმის შემუშავების პროცესში საბჭომ მიიღო არაერთი ინიციატივა და გასვლით სამუშაო შეხვედრაზე გეგმავს ინიციატორებთან კონსულტაციებს, რეკომენდაციების დახვეწისა და შემდგომი დამუშავების მიზნით. ინიციატივის წარმომდგენს თავად ექნება შესაძლებლობა დისკუსიისა და კითხვა-პასუხის რეჟიმში წარადგინოს რეკომენდაცია და მსჯელობის შედეგად მოხდეს მისი შემდგომი დახვეწა. კონსოლიდირებული სამოქმედო გეგმის სამუშაო ვერსია განთავსდება საქართველოს პარლამენტის ვებგვერდზე და პროცესის მონაწილეობრივად წარმართვის უზრუნველსაყოფად, საბჭო ნებისმიერი დაინტერესებული პირისგან მიიღებს წერილობით მოსაზრებას/კომენტარს.

საბოლოო სამოქმედო გეგმა განთავსდება ვებგვერდზე და ხელმისაწვდომი იქნება ნებისმიერი დაინტერესებული პირისთვის.