მიმდინარე კვირაში კომიტეტების მიერ განსახილველი საკითხების შესახებ იმსჯელა პარლამენტის ბიურომ დღევანდელ სხდომაზე.

კომიტეტები განიხილავენ „სახელმწიფო კომპენსაციისა და სახელმწიფო აკადემიური სტიპენდიების შესახებ“ კანონში ცვლილებების შესახებ მთავრობის საკანონმდებლო ინიციატივას. ასევე, ახალი საკანონმდებლო ინიციატივაა „უმაღლესი განათლების შესახებ“ კანონში ცვლილებების შეტანის თაობაზე პროექტი, რომლის დაჩქარებული წესით განხილვასაც მოითხოვს მთავრობა.

კომიტეტები მიმდინარე კვირაში განიხილავენ „საქართველოსა და აზიის ინფრასტრუქტურის საინვესტიციო ბანკს შორის სასესხო შეთანხმების ცვლილების“ საკითხს. განისაზღვრა წამყვანი და სავალდებულო კომიტეტები აღნიშნულ საკითხებთან დაკავშირებით.

ბიურომ იმსჯელა საორგანიზაციო საკითხებზე, რომელთა შორის არის კომიტეტების მიმართვა რიგი კანონპროექტების განხილვის ვადის გახანგრძლივების თაობაზე. ასევე, ბიუროზე წარმოდგენილი იყო ფრაქცია „ქართული ოცნების“ მიმართვა საფინანსო-საბიუჯეტო კომიტეტში ფრაქციის კვოტით რიმა ბერაძის ნაცვლად გოგი მეშველიანის შეყვანის შესახებ. ასევე, დიასპორისა და კავკასიის საკითხთა კომიტეტში ფრაქციის კვოტით რიმა ბერაძის წარდგენის თაობაზე. ფრაქცია „ქართულმა ოცნებამ“ ბიუროს მიმართა პარლამენტის წევრის ნინო იობაშვილის ფრაქციაში და ამავე დროს ევროპასთან ინტეგრაციის კომიტეტში გაწევრიანების შესახებ.

სხდომაზე ცნობად მიიღეს განათლებისა და მეცნიერების კომიტეტის მიმართვა კომიტეტის თავმჯდომარის პირველი მოადგილის თანამდებობაზე გიორგი ამილახვარის და მოადგილედ თამარ ტალიაშვილის არჩევის შესახებ.

იმსჯელეს ახალ საკანონმდებლო წინადადებებზე, რომლებიც შესაბამის კომიტეტებში გადანაწილდება.