ბიუროს სხდომაზე პლენარული სხდომის დღის წესრიგი განიხილეს და საორგანიზაციო საკითხებზე იმსჯელეს.

დღის წესრიგს დაემატა დადგენილების პროექტი „ირაკლი სესიაშვილის საქართველოს პარლამენტის წევრის უფლებამოსილების ვადამდე შეწყვეტის შესახებ“ და კანონპროექტი „საზოგადოებრივი ჯანმრთელობის შესახებ“ საქართველოს კანონში ცვლილების შეტანის თაობაზე“, რომელიც პარლამენტის თავმჯდომარის პირველი მოადგილის, გიორგი ვოლსკის განმარტებით, მოქალაქეობის არმქონე პირებსა და უცხოელებს ეხება.

ბიუროს სხდომაზე განხილული რამდენიმე საკითხი ცნობად იქნა მიღებული. დეპუტატებმა მხარი დაუჭირეს ფრაქციის „ლელო - პარტნიორობა საქართველოსთვის" რეგისტრაციის საკითხს.

როგორც აღინიშნა, საპროცედურო საკითხთა და წესების კომიტეტის სხდომაზე, რომელიც გაიმართება პარასკევს, 21 მაისს, ახალ კვოტებს განსაზღვრავენ. 

საპროცედურო საკითხთა და წესების კომიტეტის თავმჯდომარის, ირაკლი ქადაგიშვილის განმარტებით, ფრაქციის დამატებამ დააყენა კვოტების თავიდან განსაზღვრის აუცილებლობა.

„ფრაქციის წევრების კომიტეტებში გაწევრიანება მოხდება ახლად დადგენილი კვოტების შესაბამისად“, - განაცხადა ირაკლი ქადაგიშვილმა.

მისივე თქმით, პარასკევამდე ფრაქციის წევრებს შეეძლებათ კომიტეტების სხდომებზე დასწრება, მაგრამ გადაწყვეტილებების მიღებისას ხმის უფლება არ ექნებათ.

პარლამენტის ბიუროს სხდომა