დღის წესრიგის დამტკიცების შემდეგ, რეგლამენტის თანახმად, პარლამენტის წევრებს პოლიტიკური განცხადებებისთვის დრო დაეთმოთ.

საგარეო ურთიერთობათა კომიტეტის თავმჯდომარე ნიკოლოზ სამხარაძე უკრაინაში მიმდინარე პროცესებს გამოეხმაურა.

„ჩვენ, საქართველოს პარლამენტი, ღრმად ვართ შეშფოთებული რუსეთის მიერ აღმოსავლეთ უკრაინაში ცეცხლის შეწყვეტის მზარდი დარღვევებით, რასაც ბოლო პერიოდში ყირიმსა და უკრაინის აღმოსავლეთ საზღვრებთან რუსული სამხედრო ძალის მასშტაბური მობილიზება დაემატა. ჩვენ გულდასმით ვაკვირდებით განვითარებულ მოვლენებს და ნათლად ვხედავთ რუსეთის ჩვეულ და სახიფათო ქცევას, რაც მდგომარეობს კონფლიქტის უკიდურესად დაძაბვასა და ესკალაციაში. საქართველოს და უკრაინას მტკიცე სტრატეგიული პარტნიორობა და მეგობრობის დიდი ისტორია აკავშირებთ და, ასევე, საერთო სამომავლო გეგმები აქვთ“, - განაცხადა ნიკოლოზ სამხარაძემ.

ნიკოლოზ სამხარაძის მოსაზრებით, რუსეთის მიერ განხორციელებული ოკუპაცია, ადამიანის უფლებების უხეში დარღვევა და დამანგრეველი შედეგები ყოველდღიურობად იქცა როგორც უკრაინისთვის, ასევე, საქართველოსთვის.

„რუსეთის პოლიტიკა მეზობლების მიმართ საფრთხის შემცველია არა მხოლოდ შავი ზღვის რეგიონისთვის, არამედ, მთლიანად ევროპული უსაფრთხოებისთვის. ჩვენ მივესალმებით და მხარს ვუჭერთ ურთიერთობების გაღრმავებას ნატოსა და უკრაინას შორის და ვემხრობით შავი ზღვის რეგიონში ალიანსის გაზრდილ ჩართულობას, რომელიც მშვიდობის, უსაფრთხოების და სტაბილურობის გარანტად მიგვაჩნია.  ასევე, მოვუწოდებთ ნატო-ს, დააჩქაროს საქართველოს და უკრაინის ალიანსში მიღების პროცესი. უკრაინა მარტო არ უნდა დარჩეს რუსეთის აგრესიის პირისპირ“, - განაცხადა ნიკოლოზ სამხარაძემ.

აგრარულ საკითხთა კომიტეტის თავმჯდომარემ, ნინო წილოსანმა აგრარულ სექტორში მიმდინარე პოზიტიურ ცვლილებებზე ისაუბრა.

„პირველი და უმთავრესი სექტორის განვითარებისთვის მიწის რესურსზე ხელმისაწვდომობის ზრდაა და ამ იდეის ფარგლებში მთავრობის და პრემიერის გადაწყვეტილებით გაფართოვდა პროგრამა, რომელიც უკვე სახნავი და სათიბი მიწების პრივატიზების საშუალებას იძლევა. ეს ჩვენს მოქალაქეებს საშუალებას მისცემს განახორციელონ ინვესტირება, დაისაკუთრონ მიწები და ჩაერთონ ეკონომიკურ აქტივობაში. ამ სახით, კერძო საკუთრებაში 11 ათასი ჰექტარი მიწის ნაკვეთი გადავა და შესაბამისად, ბიუჯეტში 100 მილიონ ლარზე მეტი  იქნება მობილიზებული და ამ თანხის მიწა სასოფლო აქტივობაში ჩაერთვება. აქვე მინდა დავაანონსო, რომ კომიტეტის ფარგლებში ვგეგმავთ სახელმწიფოს საკუთრებაში არსებული მიწის რესურსის ეფექტიან გამოყენებაზე სამუშაო ჯგუფის შექმნას, სადაც როგორც სოფლის მეურნეობის, ასევე, ეკონომიკის სამინისტროსა და სხვა დაკავშირებული მხარეების ჩართვას ვფიქრობთ, რათა სახელმწიფოს საკუთრებაში არსებული სახნავ-სათიბი მიწები, საძოვრები და გადასარეკი ტრასები რაც შეიძლება მოკლე ვადაში იდენტიფიცირდეს და ჩაერთოს ეკონომიკურ საქმიანობაში. ასევე მინდა გაგიზიაროთ საქართველოში აგრო ტურიზმის განვითარების პერსპექტივები და იმ დაშვებით, რომ ვაქცინაციის პროცესის სათანადო ჩატარებით და ჩვენი თითოეული ადამიანის პასუხისმგებლობის მეშვეობით, დასრულდება პანდემია და ტურიზმის სექტორი ბოლოს და ბოლოს დაუბრუნდეს იმ აქტივობის მაჩვენებელს, რითიც ვამაყობდით. ამ პერიოდისთვის კი აგრო ტურიზმის განვითარებისთვის საქართველოში კარგი ინფრასტრუქტურა იქნება შექმნილი და ფერმერებს მიეცეთ შესაძლებლობა თავიანთი წარმოებული და მოწეული პროდუქტი ჩაუშვან აგრო ტურიზმის სექტორში და ტურისტულ ობიექტებში“, - აღნიშნა ნინო წილოსანმა.

პარლამენტის თავმჯდომარის მოადგილე, პარტია „მოქალაქეების“ წევრი, ლევან იოსელიანი რიონის ხეობაში მიმდინარე მოვლენებს გამოეხმაურა.

„ჩვენ გვახსოვს, რომ ერთი თვის წინ იყო ამ საკითხის განხილვა აქ, მაგრამ საკითხი კიდევ უფრო დაიძაბა, კიდევ უფრო მეტი ვნებათაღელვა არის რიონის ხეობაში და დღეს, ჩვენი სახელმწიფო ჩვენს მოქალაქეებს საპოლიციო ძალებით, რობო-კოპებით და სპეციალური დანიშნულების მანქანებით აპირებს დაელაპარაკოს. რაც მე მგონია, რომ არა მარტო ჩვენთვის, როგორც პარლამენტის წევრებისთვის, არამედ ყველა მოქალაქისთვის არის მიუღებელი. ჩვენ მოქალაქეებს, პირველ რიგში, უნდა ვესაუბრებოდეთ არგუმენტებით და არგუმენტების სისწორით უნდა ვუმტკიცებდეთ თუნდაც იმ პროექტის გამართულობას, რომელიც ხელისუფლებას მიაჩნია, რომ ხეობაში უნდა განხორციელდეს“, - განაცხადა ლევან იოსელიანმა.

სპორტისა და ახალგაზრდულ საქმეთა კომიტეტის თავმჯდომარემ, მიხეილ ყაველაშვილმა საერთაშორისო სარბიელზე ქართველი სპორტსმენების მიღწეულ წარმატებებზე ისაუბრა. 

„2021 წელი საკმაოდ წარმატებულად დაიწყო ჩვენი სპორტისთვის. უნდა აღვნიშნო რაგბის ეროვნული ნაკრების მსოფლიოს 2023 წლის შესარჩევ ეტაპზე ოთხი გამარჯვება. მსურს აღვნიშნო ასევე პირველად საქართველოში ჩატარებული გრანდ სლემის ტურნირი ძიუდოში, სადაც პირველი გუნდური ადგილი ჩვენმა ნაკრებმა დაიკავა, ასევე გვასახელეს მოციგურავეებმაც და პირველი ლიცენზიები მოიპოვეს 2022 წლის ზამთრის ოლიმპიურ თამაშებზე. ყველა ჩვენგანის სიხარული იყო, როდესაც ნიკოლოზ ბასილაშვილმა დოჰას  საერთაშორისო საჩოგბურთო ტურნირზე პირველი ადგილი დაიკავა, ამავე ტურნირზე მსოფლიოს ერთ-ერთი უძლიერესი ჩოგანი ფედერერი დაამარცხა და მთელი ერი გაგვაერთიანა ამ სიხარულში. აღსანიშნავია ასევე ჩვენი ფუტსალის ეროვნული ნაკრების წარმატება, რომელმაც პირველად მოიპოვა ევროპის ჩემპიონატის საგზური. და, რა თქმა უნდა, ყველაფრის გვირგვინი იყო ჩვენი ძალოსანთა ნაკრების უდიდესი წარმატება რუსეთის დედაქალაქში. სიმბოლურია, რომ 9 აპრილს, ჩვენი დამოუკიდებლობის აღდგენის დღეს, რამდენჯერმე გააჟღერეს საქართველოს სახელმწიფო ჰიმნი რუსეთის დედაქალაქში, იმ ქვეყანაში, რომელიც ყველაზე მეტად ერჩის ჩვენს ქვეყანას, ჩვენს დამოუკიდებლობას და თავისუფლებას. “, - განაცხადა სპორტისა და ახალგაზრდულ საქმეთა კომიტეტის თავმჯდომარემ.

მისივე თქმით, ეს წარმატებები თავისით არ მოხდებოდა, რომ არა ხელისუფლების, მთავრობის და საზოგადოების მხარდაჭერა.

„წინ ბევრი წარმატებები გველოდება, კიდევ უფრო გავერთიანდეთ, თქვენ თვითონაც ხართ ამის მოწმე, თუ რამხელა სიხარულს გვგვრის სპორტსმენების გამარჯვება და მინდა რომ ეს გაერთიანება იყოს საფუძველი ჩვენი პოლიტიკური ცხოვრებისაც“, - განაცხადა მიხეილ ყაველაშვილმა.

ჯანმრთელობის დაცვისა და სოციალურ საკითხთა კომიტეტის თავმჯდომარის პირველმა მოადგილემ, ვლადიმერ კახაძემ კოვიდ ინფექციის დასაძლევად, ვაქცინაციის მნიშვნელობაზე ისაუბრა და მოსახლეობას ამ პროცესში აქტიური ჩართულობისკენ მოუწოდა. ვლადიმერ კახაძემ საზოგადოებას ასევე, დაწესებული შეზღუდვების დაცვისკენ მოუწოდა.

„დაფარულ სივრცეებში, კანონის საწინააღმდეგოდ, ვითარდება სარიტუალო და გასართობი თავყრილობები. გთხოვთ, გაისიგრძეგანოთ დაწესებული შეზღუდვები. დედამიწას ჰყავს მტერი - კოვიდ ინფექცია. გავიდა წელიწადნახევარი და ჩვენი, ადამიანების მეოხებით, ჩვენივე ჩართულობით ეს კოვიდი წარმატებას აღწევს, რადგან ერთადერთი წყარო, რომელშიც მრავლდება უმოწყალოდ, იცვლის ფორმასა და შტამებს - ის ჩვენვე გადაგვაქვს. უკვე გვაქვს ინფიცირების ჯერადი მატება. დადებითობის მაჩვენებელი 3.66%-ზე ავიდა. 4%-იანი მაჩვენებელი უკვე არის კრიტიკული ზღვარი, რომელიც გვაიძულებს იმ ღონისძიებების მხარეს გადავიხაროთ, რომელიც არ მოგვწონს არც კანონმდებლებს, არც აღმასრულებლებს, არც ბიზნესს, არც განათლებას და არც არავის“, - განაცხადა ვლადიმერ კახაძემ.

უფრაქციო პარლამენტის წევრი, პარტია „მოქალაქეების“ წარმომადგენელი ალექსანდრე ელისაშვილი საფინანსო-საბიუჯეტო კომიტეტის გუშინდელ სხდომაზე პენსიებთან დაკავშირებული საკითხის განხილვას გამოეხმაურა.

„არანაირი არგუმენტი არ არსებობს, თუ რატომ უნდა იღებდნენ პენსიონერები მხოლოდ ერთ ბანკში პენსიას და ეს ბანკი რატომ უნდა ართმევდეს მათ 36 პროცენტს სესხის აღების დროს, მაგრამ ჩვენ, ორი დეპუტატი ვართ და უმცირესობაში ვართ და მცირედ ვართ აქ ოპოზიცია წარმოდგენილი. თქვენ უმრავლესობაში ხართ, „ქართულ ოცნებას“ მოგმართავთ, ვიცი, რომ ბევრი თქვენგანი იზიარებს ჩვენს პოზიციას და ვიცი, რომ არის საკითხები, სადაც არ შეიძლება განსხვავებული აზრები გვქონდეს. პენსიონერებს რომ არ უნდა ძარცვავდეს ბანკი, აქ არ შეიძლება მმართველ პარტიასა და ოპოზიციას შორის იყოს განსხვავებული აზრები. ამიტომ, გთხოვთ და მოგიწოდებთ, ამ საკითხში ვიყოთ სოლიდარულები, გაბედულები და ერთად მივიღოთ ის გადაწყვეტილება, რაც ყველაზე დაუცველ ადამიანებს, პენსიონერებს ცხოვრებას გაუადვილებს და ამოასუნთქებს“, - განაცხადა ალექსანდრე ელისაშვილმა.

უფრაქციო  პარლამენტის წევრმა, პარტია „ევროპელი სოციალისტების“ წარმომადგენელმა, ფრიდონ ინჯიამ მოსახლეობის სოციალურ მდგომარეობაზე ისაუბრა.

„ბოლო სამი თვის განმავლობაში, პრაქტიკულად, ყველა პროდუქტი  გაძვირებულია 30%-დან 69%-მდე. ზოგი პროდუქტი 100%-თაც კი გაძვირდა. უახლოეს პერიოდში, ალბათ, მოსახლეობა უმძიმეს მდგომარეობაში  აღმოჩნდება, თუ მთავრობა ქმედით ღონისძიებებს არ მიიღებს. ჩვენ აღებული გვაქვს საბაზრო ეკონომიკის კურსი. რომელ საბაზრო ეკონომიკაზე შეიძლება ისაუბრო ადამიანმა, როდესაც ქვეყნის ირგვლივ პრაქტიკულად ყველა საზღვარი დაკეტილია, სადაც მოსახლეობას პოტენციურად შეუძლია გაიტანოს თავისი პროდუქტი. ამიტომ, ჩვენ მიერ დეკლარირებულმა საბაზრო ეკონომიკამ, გარკვეულ ეტაპზე, გარკვეული დროით რაღაც  კორექცია ალბათ უნდა განიცადოს“, - განაცხადა ფრიდონ ინჯიამ.

გარემოს დაცვისა და ბუნებრივი რესურსების კომიტეტის თავმჯდომარე მაია ბითაძე ცალკეული პირების მიერ ყოფილი იპოდრომის ტერიტორიასთან დაკავშირებული საკითხის პოლიტიზირების მცდელობას გამოეხმაურა.

„ყოფილი იპოდრომის ტერიტორია „ქართუ ჯგუფის“ მიერ 50 მილიონი ლარის ქონების სახით გადაეცა დედაქალაქს და იქ აბსოლუტურად უსასყიდლოდ შენდება ცენტრალური პარკი - არიან ადამიანები, რომლებიც ცდილობენ მოსახლეობის შეცდომაში შეყვანას და ამ საკითხის გარკვეულწილად, პოლიტიზირებას. მინდა, გაგიზიაროთ სურათები, თუ რა იგეგმებოდა ყოფილი იპოდრომის ტერიტორიაზე მანამდე, სანამ „ქართუ ჯგუფის“ მიერ იქნა გამოსყიდული ეს ტერიტორია. ამ ფოტოებზე არის წარმოდგენილი ის შენობა-ნაგებობები, 40 სართულიანი კორპუსები, რომლებიც უნდა აშენებულიყო იპოდრომის ტერიტორიაზე, ისევე, როგორც მის გვერდზე არსებული ყოფილი კორტების ტერიტორიაზე 35 სართულიანი და 40 სართულიანი შენობები. ამჯერად, „ქართუ ჯგუფი“ აფინანსებს მთლიან რეაბილიტაციას ტერიტორიისა, იქ იქნება ბილიკები, სივრცეები ყველა ადამიანისთვის და 70 ჰექტარით ჩვენი მოსახლეობა ამ ფორმით ისარგებლებს ამ ტერიტორიით. ეს იქნება საქალაქო დონის და არა რაიონული დონის ცენტრალური პარკი, სადაც სივრცეები იქნება განკუთვნილი ყველა ადამიანისთვის. მინდა, მოვუწოდო, კიდევ ერთხელ, იმ ადამიანებს, რომლებიც სპეკულირებენ და მიზანმიმართულად ჩრდილს აყენებენ იმ საჩუქარს, რომელიც „ქართუ ფონდმა“ გაუკეთა ქალაქს და აბსოლუტურად უსასყიდლოდ აკეთებს პარკის მშენებლობას, რომ შეეშვან მუდმივი ანტაგონიზმის მდგომარეობაში ყოფნას და გაითვალისწინონ, რომ არსებობენ ადამიანები, რომლებსაც სჭირდებათ ველობილიკი, რომლებსაც სჭირდებათ ბავშვების გასეირნება და შესაბამისად, ბილიკები და შესაბამისად, კარგად დააკვირდნენ იმ რეკრეაციულ პარკებს და სივრცეებს, რომლებიც გაშენებულია მთელი ევროპის და ამერიკის მასშტაბით“, - განაცხადა მაია ბითაძემ.

მისივე თქმით, ეს პარკი იქნება ყველა თბილისელისთვის და იქ იქნება მიზიდულობის ცენტრები, მათ შორის,  ტურისტებისთვის და იქნება, რეალურად, თბილისის ტურისტული და თბილისში ქონების ღირებულების მატების ერთ-ერთი წინაპირობა, რომ არაფერი არ ვთქვათ პროექტის ეკოლოგიურ ღირებულებაზე.

ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, მიხეილ სარჯველაძემ თანამედროვეობის ერთ-ერთი უდიდესი ქართველი მწერლის, გურამ დოჩანაშვილის გარდაცვალების გამო კიდევ ერთხელ მწუხარება გამოთქვა და მის ღვაწლზე გაამახვილა ყურადღება.

„ვფიქრობდი, რამდენად შეიძლება პოლიტიკური განცხადების ფორმატში ეტეოდეს ის რაც მინდა ახლა ვთქვა, მაგრამ, მეორე მხრივ, ვფიქრობ, რომ აბსოლუტურად ჯდება, იმიტომ, რომ ალბათ ყველანაირი პოლიტიკა სახელმწიფოსთვის მნიშვნელოვანია ეფუძნებოდეს ღირებულების სისტემას, სწორ ღირებულებებს, რაც, რა თქმა უნდა, ყველაზე მეტად შეიძლება მნიშვნელოვანი იყოს საზოგადოების გამაერთიანებელი ფაქტორის თვალსაზრისით. და, აი ამ კონტექსტში მინდა გამოხმაურების გარეშე არ ჩაიაროს იმ ფაქტმა, რაც წინა კვირაში მოხდა და ვფიქრობ, ყველაზე მეტად რთულია და ყველაზე მეტად ღირსშესანიშნავიც იმავდროულად. ეს გახლავთ ის ფაქტი, რომ საქართველომ მიწას მიაბარა ჩვენი დროის ძალიან დიდი ჰუმანისტი  - გურამ დოჩანაშვილი. მე მინდა, რომ ამ ამბავმა ისევ უკვალოდ არ ჩაიაროს, თუნდაც დღევანდელი პლენარული სხდომის შესაძლებლობა გამოვიყენოთ და დავაფასოთ ამ კაცის ძალიან დიდი ღვაწლი საქართველოს და ქართული საზოგადოების განვითარებაში. ის იყო ძალიან დიდი ჰუმანისტი და თქვენის ნებართვით, ყველას მინდა გთხოვოთ, რომ მცირე ტაშით დავაფასოთ ამ ადამიანის ძალიან დიდი ღვაწლი“, - განაცხადა მიხეილ სარჯველაძემ.

განცხადებების ამოწურვის შემდეგ, პარლამენტმა დღის წესრიგით გათვალისწინებული საკითხები განიხილა.

პარლამენტის წევრებმა პირველი მოსმენით, დაჩქარებული წესით, განიხილეს და 76 ხმით მიიღეს კანონპროექტი „უმაღლესი განათლების შესახებ“ საქართველოს კანონში ცვლილების შეტანის თაობაზე“.

მომხსენებლის, საქართველოს განათლებისა და მეცნიერების მინისტრის პირველი მოადგილის, ეკატერინე დგებუაძის განმარტებით, კანონპროექტი ეხება სპეციალური საგანმანათლებლო საჭიროების მქონე იმ მოსწავლეების საქართველოს უმაღლეს საგანმანათლებლო დაწესებულებებში ერთიანი ეროვნული გამოცდების გარეშე ჩარიცხვას და მათ დაფინანსებას, რომლებიც ცხოვრობენ „ოკუპირებული ტერიტორიების შესახებ“ საქართველოს კანონით გათვალისწინებულ ოკუპირებულ ტერიტორიაზე და აღნიშნულ ტერიტორიაზე ინკლუზიური განათლების არარსებობის გამო იძულებულები არიან ზოგადი განათლება მიიღონ საქართველოს ხელისუფლების მიერ კონტროლირებად ტერიტორიაზე მოქმედ სკოლებში, რომლებიც ახორციელებენ სენსორული დარღვევების მქონე ბავშვთა სპეციალურ საგანმანათლებლო პროგრამებს.

პარლამენტის წევრებმა პირველი მოსმენით განიხილეს და 78 ხმით მიიღეს კანონპროექტი „საზოგადოებრივი ჯანმრთელობის შესახებ“ საქართველოს კანონში ცვლილების შეტანის თაობაზე“. კანონპროექტის თანახმად, საქართველოს მთავრობა უფლებამოსილი იქნება ეპიდემიოლოგიური მდგომარეობის გათვალისწინებით, საქართველოში შემოსვლის და/ან ყოფნის მიზნით, შესაბამის უცხოელთა და მოქალაქეობის არმქონე პირთა წრის მიმართ, დაადგინოს ჯანმრთელობისა და უბედური შემთხვევის დაზღვევის პირობები და წესები.

დეპუტატებმა 78 ხმით მიიღეს პარლამენტის დადგენილების პროექტი „თამბაქოს კონტროლის შესახებ“ საქართველოს კანონის აღსრულების მდგომარეობის თაობაზე“. 

დადგენილების პროექტი ითვალისწინებს „თამბაქოს კონტროლის შესახებ“ საქართველოს კანონის აღსრულების მდგომარეობის შეფასებას დადებითად.

დადგენილების პროექტის თანახმად, ჯანმრთელობის დაცვისა და სოციალურ საკითხთა კომიტეტმა უნდა უზრუნველყოს საქართველოს მთავრობისა და შესაბამისი სამინისტროებისთვის „თამბაქოს კონტროლის შესახებ“ საქართველოს კანონის აღსრულების კონტროლის საბოლოო ანგარიშის მიწოდება და 1 თვის ვადაში მათ მიერ განხორციელებული შესაბამისი ღონისძიებების თაობაზე ინფორმაციის მიღება.

დღევანდელ პლენარულ სხდომაზე 79 ხმით იქნა მიღებული საქართველოს პარლამენტის დადგენილების პროექტი „საქართველოს მთავრობასა და კორეის რესპუბლიკის მთავრობას შორის საჰაერო მიმოსვლის შესახებ“ შეთანხმების რატიფიცირების შესახებ.

პარლამენტის მორიგი პლენარული  სხდომა გაიმართება ხვალ, 14 აპრილს.

სხდომა დაიწყება 12:00 საათზე.