პარლამენტის თავმჯდომარის მოადგილე გიორგი წერეთელი და ჯანმრთელობის დაცვისა და სოციალურ საკითხთა საპარლამენტო კომიტეტის თავმჯდომარე ოთარ თოიძე შეხვდნენ გაეროს მოსახლეობის ფონდის წარმომადგენელს თურქეთში, ფონდის ოფისების დირექტორს საქართველოში, აზერბაიჯანსა და სომხეთში, ზაჰიდულ ჰაქს და გაეროს მოსახლეობის ფონდის წარმომადგენელს საქართველოში, თამარ ხომასურიძეს.

გიორგი წერეთელმა სტუმრებს მიაწოდა ინფორმაცია ქვეყანაში მიმდინარე რეფორმებთან დაკავშირებით. 2012 წელი საპარლამენტო არჩევნების წელია და პარლამენტარები აქტიურად მუშაობენ მოსახლეობასთან, განსაკუთრებით რეგიონებში, რათა კიდევ უფრო კარგად გააცნობიერონ მათი პრობლემები, რომელთა გადაჭრა უნდა იყოს მთავრობის უპირველესი პრიორიტეტი. ბევრი რამ კეთდება უკანასკნელ პერიოდში, რათა ქვეყანამ მაქსიმალურად მიაღწიოს ათასწლეულის განვითარების მიზნებს (აგმ) და ამ პროცესების ზედამხედველობისა და ადვოკატირებისათვის პარლამენტში შექმნილია აგმ საპარლამენტო ჯგუფი. გარკვეული მიმართულებებით საქართველოს მნიშვნელოვანი წარმატებები აქვს, მაგალითად ჯანდაცვის და განათლების მიზნების მიღწევაში, თუმცა ზოგიერთი მიმართულებით, განსაკუთრებით მოსახლეობის სოციალურ-ეკონომიკური მდგომარეობის გაუმჯობესების და დასაქმების სფეროში გამოწვევები ჯერ კიდევ მნიშვნელოვანია. ჯანდაცვის სფეროში მნიშვნელოვნად გაუმჯობესდა სიტუაცია ინფრასტრუქტურის თვალსაზრისით, რამაც შესაბამისად გაზარდა მომსახურების უტილიზაცია და მოთხოვნა ხარისხიან სერვისებზე, ამიტომაც შემდგომ ეტაპზე პრიორიტეტული ხდება მოსახლეობისათვის ფინანსური ხელმისაწვდომობის და ხარისხის უზრუნველყოფა. ამ თვალსაზრისით აუცილებელია სახელმწიფო და კერძო სექტორის ერთობლივი ძალისხმევა, სადაზღვევო სისტემის განვითარება და უმწეო მოსახლეობისათვის სახელმწიფო გარანტიების შექმნა. სახელმწიფოს როლის გაზრდის ნათელი მაგალითია მოსახლეობის მოწყვლადი ჯგუფებისათვის უკვე არსებული და შემოდგომიდან დამატებით ყველა პენსიონერისათვის და 6 წლამდე ბავშვებისათვის სამედიცინო დაზღვევის პაკეტების მიწოდება, რაც თავისთავად შეამსუბუქებს ეკონომიკურ სიდუხჭირეს. ასევე პოზიტიურ მაგალითად გამოდგება ფარმაცევტულ სექტორში გატარებული ანტიმონოპოლური ღონისძიებები, რამაც ბაზარზე ფასები საშუალოდ 25%-ით დაწია. პარლამენტის თავმჯდომარის მოადგილემ ასევე ისაუბრა პალამენტის როლზე ყველა ამ პროცესებში - იმ საკანონმდებლო ინიციატივებზე, რაც ბოლო პერიოდში ხორციელდება და ნაყოფიერ თანამშრომლობაზე საერთაშორისო ორგანიზაციებთან.

ბატონმა ზაჰიდულ ჰაქმა დამსწრეებს გააცნო გაეროს მოსახლეობის ფონდის ძირითადი სამუშაო მიმართულებები უახლოესი წლებისათვის – მათ შორის რეპროდუქციული ჯანმრთელობის, გენდერული თანასწორობის და ძალადობის, აივ/შიდსის და ახალგაზრდობის სფეროში. 2012 წელს დაგეგმილია ICPDD გლობალური კვლევა და ქვეყნები გაეროს სააგენტოების აქტიური მონაწილეობით ჩაატარებენ ეროვნულ კვლევებს, რაც ძალზედ სასარგებლო ინფორმაციით უზრუნველყოფს ქვეყნებს მოსახლეობის მდგომარეობის შესახებ და ამიტომაც პარლამენტის მონაწილეობას დიდი მნიშვნელობა ექნება ამ პროცესში. ბატონმა ზაჰიდულ ჰაქმა ასევე ისაუბრა ისეთ საინტერესო ინიციატივებზე, როგორიცაა ახალგაზრდებისადმი კეთილგანწყობილი სერვისები და ცენტრები, ქალებისადმი კეთილგანწყობილი ქალაქები და ა.შ. ამ მიმართულებით საქართველოსა და თურქეთს თანამშრომლობის დიდი პერსპექტივა გააჩნიათ.

შეხვედრის დასასრულს მხარეები შეთახმდნენ ნაყოფიერი და მრავალწლიანი თანამშრომლობის გაგრძელებასა და კიდევ უფრო გაღრმავებაზე.