„მსურს კიდევ ერთხელ მივუსამძიმრო ორიოდე დღის უკან იაშვილის კლინიკაში გარდაცვლილი მოზარდის ოჯახს, ახლობლებს, მეგობრებსა და სრულიად საქართველოს ეს უმძიმესი ტრაგედია. სამწუხაროდ, უკანასკნელი ორი დღის განმავლობაში მოზარდებისა და ახალგაზრდების მხრიდან სუიციდის რამდენიმე შემთხვევა დაფიქსირდა. ეს შემთხვევები საშიშ ტენდენციას იძენს. გარდა ამისა, მოდის ინფორმაციები არასრულწლოვანთა მხრიდან თვითმკვლელობის მცდელობებთან დაკავშირებით. სწორედ ამიტომ აუცილებელია, მთელმა საზოგადოებამ მაქსიმალურად სწრაფად ვიმოქმედოთ, რათა, მსგავსმა შემთხვევებმა არ შეიძინოს მიმბაძველობის საფრთხე, მოზარდებმა კი საკუთარი თავის იდენტიფიცირება კონკრეტულ ტრაგიკულ შემთხვევებთან არ მოახდინონ“, - აღნიშნულის შესახებ ადამიანის უფლებათა და სამოქალაქო ინტეგრაციის კომიტეტის თავმჯდომარის მოადგილემ, რატი იონათამიშვილმა პარლამენტში გამართულ ბრიფინგზე განაცხადა.

მისი თქმით, დღეს, აბაშაში დაფიქსირებული შემთხვევა ცხადყოფს, თუ რამდენად დიდი გავლენა ჰქონდა გოგონაზე რამდენიმე დღის უკან გარდაცვლილი არასრულწლოვანის ტრაგიკულ შემთხვევას.

„ეს ერთი შეხედვითაც ნათლად ჩანს - აბაშაში გარდაცვლილი მოზარდი, საკუთარ სოციალურ ქსელში, სწორედ გარდაცვლილი 15 წლის ბიჭის მიერ გაკეთებულ წარწერებს აზიარებდა. სწორედ ამიტომ, მსურს მოვუწოდო ყველა იმ სოციალურ მუშაკსა და ფსიქოლოგს, ასევე სამოქალაქო ორგანიზაციების იმ ნაწილს, რომლებიც არასრულწლოვანთა საკითხებზე მუშაობენ, რომ გავერთიანდეთ და ვიმოქმედოთ, რათა ამ მიმართულებით ყველა იმ დამატებით მექანიზმზე ვიფიქროთ, რაც დაგვეხმარება დავხვეწოთ უკვე არსებული სისტემა, რომლებიც მსგავსი ფატალური შემთხვევების პრევენციის შესაძლებლობას გაზრდის“, - განაცხადა რატი იონათამიშვილმა.

გარდა ამისა, მან მედიის წარმომადგენლებს თხოვნით მიმართა გაითვალისწინონ, რომ თვითმკვლელობის შემთხვევების აქტიურად ტირაჟირება ძალიან მგრძნობიარეა, მითუმეტეს, როდესაც საქმე არასრულწლოვნებს ეხებათ, რადგანაც მისივე შეფასებით, ამას, იმ მოზარდთა მხრიდან, რომლებსაც გარკვეული პროტესტი უჩნდებათ სოციალური გარემოს, რეალობისა თუ სხვა საკითხების მიმართ, ქცევის გამეორების მაღალი რისკები ახლავს თან.

„ყველა კარგად უნდა ვაცნობიერებდეთ, რომ არასრულწლოვანთათვის სუიციდის საკითხი, ძალიან მგრძნობიარე და ფაქიზია. სწორედ ამიტომაა უმნიშვნელოვანესი არასრუწლოვანთა სუიციდის საკითხების გაშუქებისას გაანალიზდეს თანმხლები რისკები და იმოქმედონ არსებული სტანდარტებით“, - განაცხადა პარლამენტის წევრმა. მისი თქმით, აბაშაში მომხდარი ტრაგიკული შემთხვევის გაშუქებისას დარღვეული იყო ყველანაირი სტანდარტი: გასაჯაროვდა გარდაცვლილი მოზარდის პერსონალური ინფორმაცია - სახელი, გვარი და საცხოვრებელი მისამართი და ა.შ. ასევე, მედია საშუალებამ ეთერში ბავშვის თვითმკვლელობის დეტალები განიხილა.

„ალბათ ყველა ვთანხმდებით, რომ იმდენად სენსიტიურია ეს თემები, რომ აქ ყველა ინტერესი მეორე პლანზე გადადის. ყველას ვთხოვ და მოვუწოდებ, მათ შორის ახლაგაზრდებს, ნუ მოვახდენთ ლუკა სირაძის ტრაგედიასთან დაკავშირებული წარწერების ტირაჟირებას - ამან შესაძლოა ძალიან ნეგატიური ასახვა გამოიწვიოს სხვა მოზარდებში. პროტესტის გამოხატვის უამრავი ფორმა არსებობს - ნუ გამოვიყენებთ მაინც და მაინც იმ ფორმას, რომელიც ჩვენი შვილებისთვის შესაძლოა საფრთხის მატარებელი იყოს. კიდევ ერთხელ მივმართავთ მთელ საზოგადოებას, გავერთიანდეთ და ვიმუშაოთ იმისთვის, რომ ერთი ტრაგედია, არა სხვა ტრაგედიების გამომწვევად, არამედ, სწორი დასკვნების გამოტანისა და პრევენციის მძლავრი მექანიზმების შემუშავების გარანტად იქცეს, რათა მსგავსი უმძიმესი შემთხვევები აღარ განმეორდეს“, - განაცხადა რატი იონათამიშვილმა.