საფინანსო-საბიუჯეტო კომიტეტის სხდომაზე  საქართველოს მთავრობის მიერ საკანონმდებლო წესით წარმოდგენილი კანონპროექტები: „მედიაციის შედეგად მიღწეული მორიგების შესახებ საერთაშორისო შეთანხმებების შესახებ“ გაერთიანებული ერების ორგანიზაციის კონვენცია, „მედიაციის შესახებ“ საქართველოს კანონში ცვლილების შეტანის თაობაზე“, „საქართველოს სამოქალაქო საპროცესო კოდექსში ცვლილების შეტანის შესახებ“, „სახელმწიფო ბაჟის შესახებ“ საქართველოს კანონში ცვლილების შეტანის თაობაზე“, „სააღსრულებო წარმოებათა შესახებ“ საქართველოს კანონში ცვლილების შეტანის თაობაზე“  საქართველოს იუსტიციის მინისტრის მოადგილემ ბექა ძამაშვილმა წარადგინა.

იუსტიციის მინისტრის მოადგილემ, „მედიაციის შედეგად მიღწეული მორიგების შესახებ საერთაშორისო შეთანხმებების შესახებ“ გაერთიანებული ერების ორგანიზაციის კონვენცია წარადგინა.

მომხსენებელმა განმარტა, რომ კონვენციის მიზანია მედიაციის შედეგად მიღწეული მორიგების, საერთაშორისო შეთანხმებების გამოყენებისა და მათი აღსრულებისთვის ერთიანი ჰარმონიზებული სამართლებრივი ჩარჩოს შექმნა.

კონვენცია წარმოადგენს საერთაშორისო ვაჭრობის ხელშეწყობისა და მედიაციის, როგორც კომერციული დავების გადაწყვეტის ალტერნატიული მექანიზმის, წახალისების სამართლებრივ ინსტრუმენტს. მისი განმარტებით, ეს კონვენცია იწვევს გარკვეულ საკანონმდებლო ცვლილებებს, რომელიც ეხება ოთხ კანონში ცვლილებას და ესენია: „მედიაციის შესახებ“; „საქართველოს სამოქალაქო საპროცესო კოდექსი“; „სახელმწიფო ბაჟის შესახებ“ და „სააღსრულებო წარმოებათა შესახებ“ საქართველოს კანონში ცვლილებები.

მინისტრის მოადგილის განმარტებით, „მედიაციის შედეგად მიღწეული მორიგების შესახებ საერთაშორისო შეთანხმებების თაობაზე” გაერთიანებული ერების ორგანიზაციის კონვენციის დებულებების „მედიაციის შესახებ“ საქართველოს კანონში ასახვით, ერთი მხრივ, შესრულდება კონვენციის სავალდებულოდ აღიარებისთვის საქართველოს კანონმდებლობით დადგენილი პირობა შესაბამისი საკანონმდებლო ცვლილებების წარდგენის აუცილებლობის თაობაზე, ხოლო, მეორე მხრივ, ამ ცვლილებების განხორციელება ხელს შეუწყობს საქართველოში მედიაციის, როგორც დავების მოგვარების ალტერნატიული მექანიზმის განვითარებას, უზრუნველყოფს რა საქართველოს საკანონმდებლო სიბრტყეში საერთაშორისო სამედიაციო მორიგების აღსრულების შესაძლებლობას.

კომიტეტის წევრებმა მომხსენებელს დაუსვეს შეკითხვები და გამოთქვეს მოსაზრებები წარმოდგენილ პროექტებთან დაკავშირებით. საფინანსო-საბიუჯეტო კომიტეტმა კანონპროექტს მხარი გამოთქმული შენიშვნების გათვალისწინებით დაუჭირა.

კომიტეტის სხდომაზე ადამიანის უფლებათა დაცვისა და სამოქალაქო ინტეგრაციის  კომიტეტის თავმჯდომარემ, მიხეილ სარჯველაძემ განსახილველად გამოიტანა „მეწარმეთა შესახებ“ საქართველოს კანონპროექტი თანმდევ კანონპროექტებთან ერთად.

აღნიშნული კანონპროექტის ინიციატორები არიან პარლამენტის წევრები: მიხეილ სარჯველაძე, ანა ბუჩუკური, თეა წულუკიანი, შალვა პაპუაშვილი, დავით სონღულაშვილი, მაკა ბოჭორიშვილი, დავით მათიკაშვილი, ალუდა ღუდუშაური, მიხეილ დაუშვილი, ბექა ლილუაშვილი.

როგორც მიხეილ სარჯველაძემ კანონპროექტის ზოგადი პრინციპების წარდგენისას განაცხადა, „მეწარმეთა შესახებ“ საქართველოს მოქმედი კანონი 1994 წელს იქნა მიღებული და მიუხედავად იმისა, რომ თავდაპირველი რედაქციის შემდგომ არაერთი ცვლილება განიცადა, სრულყოფილად მაინც ვერ ასრულებს დასახულ მიზნებს.

საჭირო გახდა უფრო დეტალური, თანამედროვე მოთხოვნებსა და გამომწვევებზე მორგებული რეგულაციების შემუშავება. ამასთანავე, ევროკავშირსა და საქართველოს შორის გაფორმებული ასოცირების შეთანხმებისა და ასოცირების დღის წესრიგის მოთხოვნების მიხედვით, ქვეყანას მთელი რიგი ვალდებულებები აქვს აღებული, რომელიც უნდა აისახოს მოქმედ კანონმდებლობაში.

„რამდენიმე კომიტეტზე იქნა კანონპროექტი გატანილი და მხარდაჭერა მოიპოვა. მნიშვნელოვანია, ასეთი ჩართულობით და საკმაოდ აქტიური დისკუსიის ფონზე მიმდინარეობს კანონპროექტის განხილვა და დიდი იმედი მაქვს, რომ გამოთქმული მოსაზრებები, რეკომენდაციები, შენიშვნები კანონპროექტთან დაკავშირებით, მეორე მოსმენის ეტაპზეც იქნება გაგრძელებული“, - განაცხადა მიხეილ სარჯველასემ.

მისივე თქმით, ორი ძირითადი და ცენტრალური საკითხი - რეგულირების ახლებურად განსაზღვრის საჭიროება და ასოცირების დღის წესრიგით გათვალისწინებული ვალდებულებების შესრულება იყო ძირითადი ფაქტორი, რამაც განაპირობა ამ კანონპროექტზე მუშაობის დაწყება.

საკანონმდებლო პაკეტიც იუსტიციის სამინისტროში მომზადდა და ამ შემთხვევაშიც, როგორც წინა საკანონმდებლო პაკეტის დროს, ავტორებს საერთაშორისო დონორების მხარდაჭერა ჰქონდათ.

მიხეილ სარჯველაძემ კომიტეტის წევრებს დეტალურად გააცნო კანონპროექტის სიახლეები და უპასუხა კომიტეტის წევრთა კითხვებს. კომიტეტის წევრებმა მხარი დაუჭირეს  საკანონმდებლო პაკეტის პლენარულ სხდომაზე განსახილველად გატანას.

კომიტეტის სხდომაზე დეპუტატებმა მესამე მოსმენით განიხილეს კანონპროექტი „დეპოზიტების დაზღვევის სისტემის შესახებ საქართველოს კანონში ცვლილების შეტანის თაობაზე“.

კანონპროექტი ეკონომიკისა და მდგრადი განვითარების მინისტრის პირველმა მოადგილემ ეკატერინე მიქაბაძემ წარმოადგინა. კანონპროექტში გათვალისწინებულია, როგორც შინაარსობრივი, ასევე ტექნიკური ხასიათის ცვლილებები, რომლითაც უზრუნველყოფილი იქნება საინვესტიციო პოლიტიკის მეტი მოქნილობა და სადაზღვევო ფონდის სახსრების განკარგვის ეფექტიანობა.

მომხსენებლის განცხადებით, პროექტის წარმოდგენილ ვარიანტში, ასახული და გათვალისწინებულია შენიშვნები და რეკომენდაციები, რაც წინა საკომიტეტო მოსმენების დროს იქნა გამოთქმული.

საქართველოს პარლამენტის წევრის, დიმიტრი ხუნდაძის მიერ საკანონმდებლო ინიციატივის წესით წარმოდგენილი საქართველოს კანონების პროექტები: „სოციალური დახმარების შესახებ“ საქართველოს კანონში ცვლილების შეტანის თაობაზე“, „სახელმწიფო პენსიის შესახებ“ საქართველოს კანონში ცვლილების შეტანის თაობაზე“ და „სახელმწიფო კომპენსაციისა და სახელმწიფო აკადემიური სტიპენდიის შესახებ“ საქართველოს კანონში ცვლილების შეტანის თაობაზე“, კომიტეტის სხდომაზე, საკანონმდებლო ინიციატივის ავტორმა, დიმიტრი ხუნდაძემ წარადგინა.

დიმიტრი ხუნდაძემ განმარტა, რომ კანონპროექტის მიღების შემთხვევაში, განხორციელდება ზედმეტად გაცემული საარსებო შემწეობის და სოციალური პაკეტის თანხების ლეგალიზაცია და შესაბამისი პირები გათავისუფლდებიან სახელმწიფოს მიმართ საარსებო შემწეობის და სოციალური პაკეტის ზედმეტად დარიცხვისა და გაცემის გამო წარმოშობილი ფინანსური ვალდებულებისაგან, რაც ღარიბი და მოწყვლადი ოჯახების მხარდაჭერის კიდევ ერთი გამოხატულება იქნება კოვიდ-19 პანდემიით გამოწვეული ეკონომიკური პრობლემების ფონზე.

კანონპროექტით 2020 წლის 20 ივლისამდე ზედმეტად გაცემული საარსებო შემწეობა და სოციალური პაკეტი ითვლება ლეგალიზებულად და დაბრუნებას არ ექვემდებარება.

ამასთანავე, უკვე დაკავებული თანხები, აგრეთვე საარსებო შემწეობის და სოციალური პაკეტის ზედმეტად გაცემის გამო შესაბამისი დავალიანების მქონე პირის მიერ ნებისმიერი სხვა ფორმით საქართველოს სახელმწიფო ბიუჯეტში გადახდილი თანხა დაბრუნებას არ ექვემდებარება.

გარდა ამისა, კანონპროექტი ასევე ითვალისწინებს, ადმინისტრაციული, სასამართლო და სააღსრულებო წარმოებების შეწყვეტას, რომელიც დაკავშირებულია შესაბამისი თანხების სახელმწიფო ბიუჯეტში ამოღებასთან.

კანონპროექტთა პაკეტით წარმოდგენილი ცვლილებებით უმაღლესი დიპლომატიური რანგის მქონე პირისათვის გასაცემი სახელმწიფო კომპენსაციის ოდენობის გაანგარიშების წესი შესაბამისობაში იქნება მოყვანილი „სახელმწიფო კომპენსაციისა და სახელმწიფო აკადემიური სტიპენდიის შესახებ“ საქართველოს კანონის შემდეგ მიზანთან - სახელმწიფო კომპენსაცია წარმოადგენს საქართველოს მოქალაქეთა სოციალური დაცვის გარანტიას სახელმწიფოს წინაშე განსაკუთრებული სამსახურის გავლის გამო.

დიმიტრი ხუნდაძემ განმარტა, რომ კანონპროექტის მიღების შედეგად გამოსწორდება კანონში არსებული ხარვეზი და კომპენსაციის გაანგარიშება განხორციელდება კომპენსაციის დანიშვნის მომენტისათვის შესაბამისი თანამდებობისთვის დაწესებული თანამდებობრივი სარგოს მიხედვით.

კანონპროექტის თანახმად, კანონის მე-15 მუხლი ყალიბდება ახალი რედაქციით, რომლის მიხედვით, უმაღლესი დიპლომატიური რანგის მქონე პირის კომპენსაციის ოდენობა განისაზღვრება კომპენსაციის დანიშვნის მომენტისათვის დიპლომატიურ სამსახურში მის მიერ დაკავებული ბოლო უმაღლესი დიპლომატიური თანამდებობის თანამდებობრივი სარგოს მესამედის შესაბამისად, კომპენსაციის დანიშვნის მომენტისათვის შესაბამისი თანამდებობრივი სარგოს ოდენობიდან გამომდინარე.

„სახელმწიფო კომპენსაციისა და სახელმწიფო აკადემიური სტიპენდიის შესახებ“ საქართველოს კანონში ცვლილების შეტანის თაობაზე“ კანონპროექტი სხდომაზე, საგარეო საქმეთა მინისტრის მოადგილემ, ხათუნა თოთლაძემ წარადგინა.

კანონპროექტით, ხდება მოქმედ კანონში არსებული ხარვეზის გასწორება. კანონპროექტის მიზანია უმაღლესი დიპლომატიური რანგის მქონე პირისთვის გასაცემი სახელმწიფო კომპენსაციის ოდენობის გაანგარიშების წესი შესაბამისობაში იქნას მოყვანილი ამავე კანონის მიზანთან - სახელმწიფო კომპენსაცია წარმოადგენდეს საქართველოს მოქალაქეთა სოციალური დაცვის გარანტიას სახელმწიფოს წინაშე განსაკუთრებული სამსახურის გავლის გამო.

დღეისათვის უმაღლესი დიპლომატიური რანგის მქონე პირის კომპენსაცია 65 წლის ასაკის მიღწევისას შეადგენს უფლებამოსილების შეწყვეტის მომენტისათვის მის მიერ დაკავებული უმაღლესი დიპლომატიური თანამდებობის ბოლო ერთი წლის განმავლობაში განსაზღვრული საშუალო თანამდებობრივი სარგოს მესამედს, რაც ხშირად უკავშირდება 15-20 წლის წინ არსებულ დაბალ თანამდებობრივ სარგოს.

კანონპროექტით შემოთავაზებული ცვლილების თანახმად, უმაღლესი დიპლომატიური რანგის მქონე პირს 65 წლის ასაკის მიღწევისას დაენიშნება კომპენსაცია, რომლის ოდენობაც იქნება დიპლომატიურ სამსახურში მის მიერ დაკავებული ბოლო უმაღლესი დიპლომატიური თანამდებობის თანამდებობრივი სარგოს მესამედი, რაც დაითვლება კომპენსაციის დანიშვნის მომენტისათვის შესაბამისი თანამდებობისთვის განსაზღვრული თანამდებობრივი სარგოს ოდენობიდან.

საფინანსო-საბიუჯეტო კომიტეტმა განხილულ საკითხებს მხარი დაუჭირა.