„2015 წლის 15 ოქტომბრის „საქართველოსა და ევროპის საინვესტიციო ბანკს შორის ფინანსური ხელშეკრულების (ქუთაისის წყალარინება) N1 ცვლილებისა და უარის თქმის წერილი“ განიხილეს საგარეო ურთიერთობათა კომიტეტის სხდომაზე, რომელსაც კომიტეტის თავმჯდომარის პირველი მოადგილე, გიორგი ხელაშვილი უძღვებოდა.

საკითხი განსახილველად ფინანსთა მინისტრის მოადგილემ, გიორგი კაკაურიძემ წარადგინა. წარმოდგენილი ხელშეკრულების მიხედვით, ევროპის საინვესტიციო ბანკის მიერ გამოყოფილია 100 მლნ. ევროს ოდენობის სესხი, რომლითაც გათვალისწინებულია ქუთაისში წყალარინების სისტემის სარეაბილიტაციო სამუშაოების განხორციელება.

ხელშეკრულების მიხედვით, პროექტის განხორციელების ვადები იყო 2016-2020 წლები. გამომდინარე იქიდან, რომ პროექტის განხორციელება დაიწყო გვიან და წარმოიშვა ტენდერთან დაკავშირებული გარკვეული შეფერხებები, ვერ მოხერხდა პროექტის დროულად დასრულება.

შესაბამისად, ხელშეკრულებაში საჭირო გახდა ცვლილებების შეტანა, რომელიც ითვალისწინებს სესხის ჩამორიცხვის ბოლო ვადის 2020 წლის 23 დეკემბრიდან 2024 წლის 23 დეკემბრამდე გადაწევას. ხოლო პროექტის განხორციელების ვადები იქნება 2021-2026 წლები.

წარმოდგენილი წერილის პროექტი ასევე ითვალისწინებს დონორის მხრიდან ხელშეკრულებით გათვალისწინებული სესხის მხოლოდ პირველი მინიმალური ჩამორიცხვის მოთხოვნაზე უარის თქმას.

კომიტეტის სხდომაზე, „საქართველოსა და აზიის ინფრასტრუქტურის საინვესტიციო ბანკს შორის სასესხო შეთანხმებების ცვლილებების შეთანხმება“ განიხილეს, რომლის მიხედვით, LIBOR-ის კვოტირება აღარ იქნება მოთხოვნილი ლონდონის ბანკთაშორის ბაზარზე, ასევე, შესაძლებელია მომავალში გაუქმდეს EURIBOR-იც.

იმისათვის რომ, შენარჩუნდეს შესაბამისობა დაფინანსებასა და ხარჯებს შორის,  ბანკი შეიმუშავებს ალტერნატიულ საბაზისო განაკვეთს, რაც გულისხმობს შეთანხმებებში ცვლილებების განხორციელებას.

ცვლილების თანახმად, ბანკი ყველა ვალუტისთვის გამოიყენებს შესაბამის საბაზისო განაკვეთს და შესაბამის მარჟას, რომელიც განისაზღვრება გონივრულად და არ წარმოქმნის მსესხებლისთვის ახალ ფინანსურ ვალდებულებას.

 „სახელმწიფო კომპენსაციისა და სახელმწიფო აკადემიური სტიპენდიის შესახებ“ საქართველოს კანონში ცვლილების შეტანის თაობაზე“ კანონპროექტი სხდომაზე, საგარეო საქმეთა მინისტრის მოადგილემ, ხათუნა თოთლაძემ წარადგინა.

კანონპროექტით, ხდება მოქმედ კანონში არსებული ხარვეზის გასწორება. კანონპროექტის მიზანია უმაღლესი დიპლომატიური რანგის მქონე პირისთვის გასაცემი სახელმწიფო კომპენსაციის ოდენობის გაანგარიშების წესი შესაბამისობაში იქნას მოყვანილი ამავე კანონის მიზანთან - სახელმწიფო კომპენსაცია წარმოადგენდეს საქართველოს მოქალაქეთა სოციალური დაცვის გარანტიას სახელმწიფოს წინაშე განსაკუთრებული სამსახურის გავლის გამო.

დღეისათვის უმაღლესი დიპლომატიური რანგის მქონე პირის კომპენსაცია 65 წლის ასაკის მიღწევისას შეადგენს უფლებამოსილების შეწყვეტის მომენტისათვის მის მიერ დაკავებული უმაღლესი დიპლომატიური თანამდებობის ბოლო ერთი წლის განმავლობაში განსაზღვრული საშუალო თანამდებობრივი სარგოს მესამედს, რაც ხშირად უკავშირდება 15-20 წლის წინ არსებულ დაბალ თანამდებობრივ სარგოს.

აღნიშნული, არათანაბარ მდგომარეობაში აყენებს პირებს, ვინც, მაგალითად, დაასრულა კარიერა 15-20 წლის წინ და გავიდა პენსიაზე 5-10 წლის წინ. შესაბამისად, კანონპროექტით შემოთავაზებული ცვლილების თანახმად, უმაღლესი დიპლომატიური რანგის მქონე პირს 65 წლის ასაკის მიღწევისას დაენიშნება კომპენსაცია, რომლის ოდენობაც იქნება დიპლომატიურ სამსახურში მის მიერ დაკავებული ბოლო უმაღლესი დიპლომატიური თანამდებობის თანამდებობრივი სარგოს მესამედი, რაც დაითვლება კომპენსაციის დანიშვნის მომენტისათვის შესაბამისი თანამდებობისთვის განსაზღვრული თანამდებობრივი სარგოს ოდენობიდან.

საგარეო ურთიერთობათა კომიტეტმა განიხილა წარმოდგენილი კანონპროექტი და მიაჩნია, რომ მისი მიღება აღმოფხვრის არსებულ დისკრიმინაციულ მიდგომას, გამოასწორებს საკანონმდებლო ხარვეზს და ხელს შეუწყობს კანონის მიზნების სრულფასოვან შესრულებას.

კომიტეტის წევრებმა მხარი ასევე დაუჭირეს სხდომაზე განხილულ, სარატიფიკაციოდ წარმოდგენილ დოკუმენტებს.