გაიმართა საფინანსო-საბიუჯეტო კომიტეტთან არსებული სახელმწიფო აუდიტის სამსახურის ანგარიშების განმხილველი მუდმივმოქმედი აუდიტის ჯგუფის სხდომა, რომელსაც ამავე ჯგუფის ხელმძღვანელი, საფინანსო-საბიუჯეტო კომიტეტის თავმჯდომარის პირველი მოადგილე პაატა კვიჟინაძე უძღვებოდა.

სხდომაზე სახელმწიფო აუდიტის სამსახურის მიერ წარმოდგენილი სამი ანგარიში განიხილეს, კერძოდ: „შპს „აკადემიკოს ნიკოლოზ ყიფშიძის სახელობის ცენტრალური საუნივერსიტეტო კლინიკის“ 2015-2017 წლების შესაბამისობის აუდიტის ანგარიში“, „ტუბერკულოზის პრევენცია და მკურნალობა“ ეფექტიანობის აუდიტის ანგარიში“, „ქრონიკული დაავადებების სამკურნალო მედიკამენტებით უზრუნველყოფის სახელმწიფო პროგრამის 2017-2018 წლების შესაბამისობის აუდიტის ანგარიში“.
საკითხები, შესაბამისად, სახელმწიფო აუდიტის სამსახურის ეკონომიკური საქმიანობის სფეროს აუდიტის დეპარტამენტის უფროსმა თორნიკე შერმადინმა, ეფექტიანობის აუდიტის დეპარტამენტის უფროსმა გიორგი კაპანაძემ და სოციალური სფეროს აუდიტის დეპარტამენტის უფროსმა ზაზა შეყილაძემ გამოიტანეს.

სხდომის მუშაობაში პარლამენტის წევრების გარდა, მონაწილეობდნენ სახელმწიფო აუდიტის სამსახურის და საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს წარმომადგენლები, მათ შორის, გენერალური აუდიტორის მოადგილე დავით გოგიჩაიშვილი და საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის პირველი მოადგილე თამარ გაბუნია.

ამგვარად, სხდომაზე წარმოდგენილი იყო სახელმწიფო აუდიტის სამსახურის სამი ანგარიში - ორი შესაბამისობის აუდიტის და ერთი ეფექტიანობის აუდიტის ანგარიში.

„ყურადღება მსურს მივაპყრო ეფექტიანობის აუდიტს, რომელიც ეხება ტუბერკულოზის პრევენციას და მკურნალობას, რომელიც არის საერთაშორისო პარალელური აუდიტი და GIZ-ის დახმარებით და მათი ჩართულობით ეს აუდიტი განხორციელდა პარალელურად საქათველოში, უკრაინასა და აზერბაიჯანში. ჩვენი სამსახური, როგორც ეფექტიანობის აუდიტში წამყვანი და ლიდერი ამ ქვეყნებს შორის, წამყვან როლს ასრულებდა აუდიტის პროცესში, რაც არის ძალიან მნიშვნელოვანი. ეს კიდევ ერთხელ უსვამს ხაზს აუდიტის სამსახურის მაღალ ინსტიტუციონალურ შესაძლებლობებს და ეს შეუძლებელი იქნებოდა პარლამენტის აქტიური დახმარების და ჩართულობის გარეშე“, - განაცხადა გენერალური აუდიტორის მოადგილემ.

სხდომის მონაწილეებს აკადემიკოს ნიკოლოზ ყიფშიძის სახელობის ცენტრალური საუნივერსიტეტო კლინიკის შესაბამისობის აუდიტის შედეგები გააცნო ეკონომიკური საქმიანობის სფეროს აუდიტის დეპარტამენტის უფროსმა თორნიკე შერმადინმა. მისი თქმით, აუდიტი ეხებოდა 2015-2017 წლებს და ძირითადად მოიცვა სახელმწიფო შესყიდვების სფერო, C-ჰეპატიტის მართვის სახელმწიფო პროგრამის, ასევე საყოველთაო დაზღვევის ფარგლებში განხორციელებული ღონისძიებები, დებიტორული დავალიანებების მართვა. სულ გაცემული იყო 7 რეკომენდაცია.

აუდიტის შედეგებზე განმარტებები გააკეთა თამარ გაბუნია და განაცხადა, რომ აღნიშნული პერიოდის შემდეგ მთლიანად შეიცვალა კლინიკის მართვის მოდელი, რეკომენდაციები ყველა საყურადღებოა და ისინი აუცილებლად იქნება გათვალიწინებული.

პარლამენტის წევრების განცხადებით, აუდიტის მიერ 2015-2017 წლებში კლინიკაში გამოვლენილია სერიოზული დარღვევები და მნიშვნელოვანია, რომ შესაბამისი ორგანოები დაინტერესდნენ ამ საქმით.
ეფექტიანობის აუდიტის დეპარტამენტის უფროსის გიორგი კაპანაძის განცხადებით, რომელმაც წარმოადგინა „ტუბერკულოზის პრევენცია და მკურნალობა“ ეფექტიანობის აუდიტის ანგარიში“, ეს პროცესი შარშან დასრულდა და აღმოსავლეთ პარტნიორობის ბლოკში შემავალ რამდენიმე ქვეყანასთან ერთად ჩატარდა.

სახელმწიფო აუდიტის სამსახურმა აუდიტის ფარგლებში შეისწავლა, თუ რამდენად გამართულად ფუნქციონირებს ტუბერკულოზის წინააღმდეგ ბრძოლის პრევენციული მექანიზმები და რამდენად ეფექტიანია მოქმედი დამხმარე მექანიზმები ტუბერკულოზით დაავადებული პაციენტის მკურნალობისათვის.

მომხსენებლის ინფორმაციით, საქართველო ევროკავშირის ქვეყნებთან შედარებით, გამოირჩევა ტუბერკულოზის მაღალი გავრცელებით, თუმცა ქვეყნისთვის მნიშვნელოვანი მიღწევაა დაავადების დაღმავალი ტენდენცია როგორც გავრცელების, ისე ახალი შემთხვევების რაოდენობით. ამის მიუხედავად, შესწავლის შედეგად, გარკვეული ნაკლოვანებებიც გამოვლინდა როგორც პრევენციული, ისე მკურნალობის დამხმარე მექანიზმების მიმართულებით. სახელმწიფო აუდიტის სამსახურის მიერ გამოვლენილ ნაკლოვანებებზე სულ 6 რეკომენდაცია გაიცა.

ქრონიკული დაავადებების სამკურნალო მედიკამენტებით უზრუნველყოფის სახელმწიფო პროგრამის 2017-2018 წლების შესაბამისობის აუდიტის განხორციელებისას აუდიტის საგნად განისაზღვრა ქრონიკული დაავადებების სამკურნალო მედიკამენტებით უზრუნველყოფის სახელმწიფო პროგრამის შესაბამისობა მოქმედ საკანონმდებლო და სხვა მარეგულირებელ ნორმებთან.

როგორც საკითხის წარდგენისას, სოციალური სფეროს აუდიტის დეპარტამენტის უფროსმა ზაზა შეყილაძემ აღნიშნა, სახელმწიფო აუდიტის სამსახურის მიერ გამოვლენილ ნაკლოვანებებზე სულ გაიცა 5 რეკომენდაცია. მან გააცნო სხდომის მონაწილეებს ქრონიკული დაავადებების სამკურნალო მედიკამენტებით უზრუნველყოფის სახელმწიფო პროგრამის განხორციელებისას აუდიტის სამსახურის მიერ გამოვლენილი მიგნებები და რეკომენდაციები.

საკითხი, მათ შორის, ეხებოდა მედიკამენტების შესყიდვებს, ხარჯვას, პროგრამის შეფასების ინდიკატორებს, შიდა კონტროლის სისუსტეებს. აუდიტის შედეგად გამოვლინდა, რომ მედიკამენტების მოცულობის განსაზღვრისას გათვალისწინებული არ იყო ბენეფიციართა დაბალი მიმართვიანობა და შეძენილი მედიკამენტების რაოდენობა მის ხარჯვასთან შედარებით მაღალი იყო, რამაც გამოიწვია არაოპტიმალური მარაგების შექმნა და გაზარდა საბიუჯეტო სახსრების არარაციონალური ხარჯვის რისკი. როგორც მინისტრის პირველმა მოადგილემ განმარტა, ყოველივე ამის გათვალისწინებით, სამინისტრომ მიიღო გადაწყვეტილება აღნიშნული პროგრამის განხორციელების მექანიზმი ძირეულად შეცვლილიყო, რაც სახელმწიფოს ფინანსური რისკებისგან იცავს.

საფინანსო-საბიუჯეტო კომიტეტთან არსებული სახელმწიფო აუდიტის სამსახურის ანგარიშების განმხილველი მუდმივმოქმედი აუდიტის ჯგუფი მომავალშიც გააგრძელებს სახელმწიფო აუდიტის სამსახურის მიერ სხვადასხვა უწყებასა და სამსახურში განხორციელებული აუდიტების ანგარიშების მოსმენას.