გაიმართა საფინანსო-საბიუჯეტო კომიტეტთან არსებული სახელმწიფო აუდიტის სამსახურის ანგარიშების განმხილველი მუდმივმოქმედი აუდიტის ჯგუფის სხდომა, რომელსაც ამავე ჯგუფის ხელმძღვანელი, საფინანსო-საბიუჯეტო კომიტეტის თავმჯდომარის პირველი მოადგილე პაატა კვიჟინაძე უძღვებოდა.

სხდომაზე, რომელიც ონლაინ ფორმატში გაიმართა, მომხსენებელმა, სახელმწიფო აუდიტის სამსახურის თავდაცვის, საზოგადოებრივი წესრიგის და უსაფრთხოების სფეროს აუდიტის დეპარტამენტის უფროსის მოადგილე. გიორგი ხითარიშვილმა რვა უწყების 2019 წლის ფინანსური აუდიტის ანგარიშები წარადგინა.

მომხსენებლის განმარტებით, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს მიმართ გაცემულია 5 რეკომენდაცია. შინაგან საქმეთა სამინისტროს მიმართ  გაიცა 10 რეკომენდაცია, იუსტიციის სამინისტროს მიმართ აუდიტის სამსახურმა შეიმუშავა 11 რეკომენდაცია, რეგიონული განვითარებისა და ინფრასტრუქტურის სამინისტრო - 6 რეკომენდაცია, თავდაცვის სამინისტრო -16 რეკომენდაცია, განათლებისა და მეცნიერების სამინისტროს მიმართ მომხსენებელმა წარადგინა  7 რეკომენდაცია, 8 რეკომენდაცია გაიცა საქართველოს გარემოს დაცვისა და სოფლის მეურნეობის სამინისტროსა და 10 რეკომენდაცია სახელმწიფო უსაფრთხოების სამსახურის მიმართ.

აუდიტის ჯგუფის ხელმძღვანელმა, პაატა კვიჟინაძემ, სხდომის დასაწყისშივე განმარტა, რომ როგორც წესი, ჯგუფი იხილავს ერთი უწყების ანგარიშს, მაგრამ გამონაკლისი ამ შემთხვევაში მოხდა იმის გათვალისწინებით, რომ სამინისტროებს, ხშირად ფინანსურ ანგარიშგებაში მსგავსი გადაცდომები აქვთ და შესაბამისად, აუდიტის სამსახურის შენიშვნებიც მათ მიმართ, მსგავსია.

„სასურველია, რომ ყველამ ერთად მოვისმინოთ ეს ანგარიშები, გამოთქმული შენიშვნები და ერთმანეთს გავუზიაროთ. ჩვენთვის პრინციპულად მნიშვნელოვანია, რომ რეკომენდაციებს, რომლებსაც დაეთანხმებით, იქნას გაზიარებული და გათვალისწინებული. რადგან არსებული მონაცემებით, უწყებების მიმართ გაცემული 33 რეკომენდაცია, რომელიც უკვე განხილულია, არ გამოსწორდა და ისევ მეორდება. ჩვენ ამ საკითხს კონტროლზე ავიყვანთ“, - განაცხადა პაატა კვიჟინაძემ.

აუდიტის სამსახურის მიერ გაცემული 73 რეკომენდაციის განხილვა ოთხი მიმართულებით წარიმართა. აქტივების მართვა, მოთხოვნები და ვალდებულებები, აღრიცხვა-ანგარიშგება და შიდა კონტროლის მექანიზმები.

აუდიტის შედეგებზე უწყებების წარმომადგენლების მხრიდან შესაბამისი განმარტებები გაკეთდა და აღინიშნა, რომ რეკომენდაციები  საყურადღებოა და ისინი აუცილებლად იქნება გათვალიწინებული.

თითოეულ რეკომენდაციასთან დაკავშირებით, სხდომის მონაწილეებმა საკუთარი მოსაზრებები გამოთქვეს და ისაუბრეს ყველა იმ გაწეული სამუშაოს შესახებ, რომელიც რეკომენდაციების შესრულებისთვის არის აუცილებელი და მნიშვნელოვანი.

„ჩვენი ჯგუფის მთავარი მიზანი არ არის, რომ ზოგადად განვიხილოთ რომელიმე სამინისტრო ან უწყება. ჩვენ განვიხილავთ რეკომენდაციებს, რომელიც აუდიტის სამსახურმა გასცა ამა თუ იმ უწყების მიმართ. მთელ მსოფლიოში, განსაკუთრებით ევროპაში, აუდიტის სამსახური არის ერთადერთი ორგანო, რომელიც სწავლობს ბიუჯეტის სახსრების ხარჯვის ეფექტიანობას და შესაბამისობას. ევროკავშირთან გაფორმებული ხელშეკრულების თანახმად, ყველა ანგარიში, რომელსაც აუდიტი წარმოადგენს, განხილული უნდა იყოს პარლამენტში და ჩვენ ამ პირობას ვასრულებთ“, - განაცხადა პაატა კვიჟინაძემ.

სახელმწიფო აუდიტის სამსახურის ანგარიშების განმხილველი მუდმივმოქმედი აუდიტის ჯგუფის წევრების გარდა, სხდომას ესწრებოდნენ დავით გოგიჩაიშვილი, გენერალური აუდიტორის მოადგილე, ზაზა შეყილაძე სოციალური სფეროს აუდიტის დეპარტამენტის უფროსი, სახელმწიფო აუდიტის სამსახურის ეკონომიკური საქმიანობის სფეროს აუდიტის დეპარტამენტის უფროსი თორნიკე შერმადინი, სახელმწიფო აუდიტის სამსახურის თავდაცვის, საზოგადოებრივი წესრიგის და უსაფრთხოების სფეროს აუდიტის დეპარტამენტის უფროსის მოადგილე გიორგი ხითარიშვილი, თავდაცვის, საზოგადოებრივი წესრიგისა და უსაფრთხოების აუდიტის დეპარტამენტის უფროსი სოფიო დვალიშვილი და ეკონომიკური საქმიანობის სფეროს აუდიტის დეპარტამენტის უფროსის მოადგილე სალომე სანებლიძე. შინაგან საქმეთა მინისტრის მოადგილე გიორგი ბუთხუზი, იუსტიციის მინისტრის მოადგილე აკაკი საღინაშვილი, რეგიონული განვითარებისა და ინფრასტრუქტურის მინისტრის მოადგილე მზია გიორგობიანი, ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილე გიორგი წოწკოლაური, განათლებისა და მეცნიერების მინისტრის მოადგილე თამარ ქიტიაშვილი, თავდაცვის მინისტრის მოადგილე ზურაბ აზარაშვილი, გარემოს დაცვისა და სოფლის მეურნეობის მინისტრის მოადგილე გიორგი ხანიშვილი, და სახელმწიფო უსაფრთხოების სამსახურის უფროსის პირველი მოადგილე ალექსი ბატიაშვილი. 

აუდიტის ჯგუფის ხელმძღვანელმა  პაატა კვიჟინაძემ სხდომაში მონაწილეებს ნაყოფიერი მუშაობისთვის მადლობა გადაუხადა. 

საფინანსო-საბიუჯეტო კომიტეტთან არსებული სახელმწიფო აუდიტის სამსახურის ანგარიშების განმხილველი მუდმივმოქმედი აუდიტის ჯგუფი მომავალშიც გააგრძელებს სახელმწიფო აუდიტის სამსახურის მიერ სხვადასხვა უწყებასა და სამსახურში განხორციელებული აუდიტების ანგარიშების მოსმენას.