საპროცედურო საკითხთა და წესების კომიტეტმა იმსჯელა დადგენილების პროექტზე, რომელიც განსაზღვრავს საქართველოს X მოწვევის პარლამენტის მიერ წინა მოწვევის პარლამენტში განსახილველად წარდგენილი იმ კანონპროექტების განხილვის პროცედურის გაგრძელების მიზანშეწონილობის საკითხს, რომელთა ნუსხაც დარგობრივმა და წამყვანმა კომიტეტებმა წარმოადგინეს.

„ჩვენ რეგლამენტში ცვლილებები მივიღეთ, იმასთან დაკავშირებით, რომ „გაცოცხლებულიყო“ წინა მოწვევის პარლამენტში არსებული კანონპროექტები, რომელთა ამ მოწვევის პარლამენტში გაგრძელებაზე თანხმობას გამოთქვამდნენ შესაბამისი კომიტეტები. ამავდროულად, თითოეულმა კომიტეტმა თავისი მიმართულებით მოიძია ყველა ის კანონპროექტი, რომელიც წინა მოწვევის პარლამენტში იყო ინიცირებული და განხილვის სხვადასხვა ეტაპზე იმყოფებოდა. მათგან რომელი პროექტებიც მათ ჩათვალეს მიზანშეწონილად, რომ გადმოვიდეს განსახილველად და კანონის სახე მიიღოს, წარმოდგენილი გვაქვს კომიტეტების მიხედვით“, - განაცხადა საპროცედურო საკითხთა და წესების კომიტეტის თავმჯდომარემ, ირაკლი ქადაგიშვილმა.

კომიტეტის წევრებმა მხარი დაუჭირეს დადგენილების პროექტს.