კომიტეტის თავმჯდომარის, ირაკლი ქადაგიშვილის თქმით, კომიტეტის აპარატმა რეგლამენტის შესაბამისად გადაამოწმა ყველა ინიციატორის ხელმოწერა, რომელთა ნამდვილობაც დადასტურებულია.

შესაბამისად, კომიტეტმა მხარი დაუჭირა კონსტიტუციური კანონპროექტის საყოველთაო-სახალხო განხილვის დაწყებას და შესაბამისად „კონსტიტუციური კანონის პროექტის გამოქვეყნებისა და მისი საყოველთაო განხილვის საორგანიზაციო კომისიის“ შექმნის შესახებ პარლამენტის დადგენილების პროექტს.

სხდომაზე განისაზღვრა ხუთი წევრისგან შემდგარი საკონსტიტუციო კანონპროექტის განხილვის კომისიის წევრებიც.

ესენი არიან: განათლებისა და მეცნიერების კომიტეტის თავმჯდომარე შალვა პაპუაშვილი (კომისიის თავმჯდომარე), პარლამენტის თავმჯდომარის მოადგილე კახაბერ კუჭავა, პარლამენტის თავმჯდომარის მოადგილე ლევან იოსელიანი, განათლებისა და მეცნიერების კომიტეტის თავმჯდომარე შალვა პაპუაშვილი, პარლამენტის წევრები - ალექსანდრე ელისაშვილი და დავით ზილფიმიანი.

ირაკლი ქადაგიშვილის განცხადებით, დაცულია საქართველოს პარლამენტის რეგლამენტის მოთხოვნა, რომ კომისიის წევრთა ნახევარზე მეტი ოპოზიციის წარმოამდგენელი უნდა იყოს.

სხდომაზე განიხილეს საქართველოს მოქალაქე ბესიკ ქარცივაძის ლობისტად რეგისტრაციის საკითხი. კომიტეტის თავმჯდომარის განმარტებით, შემოწმებულია მოქალაქე ბესიკ ქარცივაძის მიერ წარმოდგენილი დოკუმენტაცია და შესაბამისად მას უფლება ეძლევა ლობისტობა გაწიოს „იარაღის შესახებ კანონთან“ დაკავშირებით.

კომიტეტმა ასევე იმსჯელა თეა წულუკიანის ადგიმონაცვლის, ნინო იობაშვილის პარლამენტის წევრის უფლებამოსილების ცნობის საკითხზე და მხარი დაუჭირა მას.

საკითხი დღეს პლენარულ სხდომაზე გავა განსახილველად.