„კომიტეტმა თავდაცვის სამინისტროს სამხედრო დაზვერვის დეპარტამენტს და სტრატეგიულ პარტნიორს - ნატოს სამეკავშირეო ოფისის ხელმძღვანელს უკვე მოუსმინა. საკომიტეტო ფორმატში მსგავსი მოსმენების სერია გრძელდება და დღეს მთიანი ყარაბაღის სამშვიდობო შეთანხმების შედეგად რეგიონში შექმნილი უსაფრთხოების გარემოს შესახებ საქართველოს დაზვერვის სამსახურის მოხსენებას მოვისმენთ. მოგეხსენებათ, ამ შეთანხმების შედეგად სამხრეთ კავკასიაში რუსული სამხედრო წარმომადგენლობა გაიზარდა, რაც საფრთხის შემცველია და გამოწვევას წარმოადგენს არა მხოლოდ საქართველოსთვის, არამედ მთლიანად რეგიონული უსაფრთხოებისთვის“, - აღნიშნა თავდაცვისა და უშიშროების კომიტეტის თავმჯდომარემ, ირაკლი ბერაიამ.

მისივე განცხადებით, დღევანდელ საკომიტეტო მოსმენაზე, ბოლო დროს, საქართველოს სტრატეგიულ პარტნიორ ქვეყანაში - უკრაინაში განვითარებულ მოვლენებთან დაკავშირებით, კომიტეტი დაზვერვის სამსახურის შეფასებებსაც მოისმენს.

საკითხის მნიშვნელობიდან გამომდინარე, საკომიტეტო მოსმენა დახურულ ფორმატში გაგრძელდა, სადაც საქართველოს დაზვერვის სამსახურის უფროსის მოვალეობის შემსრულებელმა, შალვა ლომიძემ და დაზვერვის სამსახურის ანალიტიკური დეპარტამანეტის დირექტორმა, გივი თუმანიშვილმა კომიტეტის წევრებს, პრეზენტაციის ფორმით, შესაბამისი ინფორმაცია მიაწოდეს.

კომიტეტის დასრულების შემდეგ სხდომაზე განხილულ საკითხებზე კომენტარები გაკეთდა.

„თავდაცვისა და უშიშროების კომიტეტის სხდომაზე დაზვერვის სამსახურის ანგარიში მოვისმინეთ. მომხსენებელმა მოგვაწოდა ინფორმაცია მთიანი ყარაბაღის კონფლიქტის სამშვიდობო შეთანხმების შედეგად შექმნილი ვითარების და გავლენის შესახებ. ცნობილია, რომ ამ შეთანხმების შედეგად სამხრეთ კავკასიაში რუსული ქმედებები და მისი წარმომადგენლობა გაიზარდა, რაც საფრთხის შემცველია რეგიონისთვის და ჩვენი ქვეყნისთვის. ამ თემასთან დაკავშირებით დეტალური, ამომწურავი და კვალიფიციური ანალიზი მოვისმინეთ. საფრთხეების საპასუხოდ, რომელიც რეგიონში არსებობს და რომლის წინაშეც დგას ჩვენი ქვეყანა, თავისთავად საქართველოს ხელისუფლება მუდმივ ადაპტაციას ახდენს და ის ღონისძიებები, რომლებსაც ჩვენ ვახორციელებთ - ჩვენი თავდაცვის, ჩვენი ეროვნული უსაფრთხოების სისტემის შემდგომი გაძლიერებისთვის, რეგიონში არსებული უსაფრთხოების გარემოს და ჩვენი ქვეყნის წინააღმდეგ მიმართულ გამოწვევებს პასუხობს. საკითხის აქტუალურობიდან გამომდინარე, ჩვენ საუბარი გვქონდა უკრაინაში განვითარებულ პროცესებზე და ამის შესახებ დაზვერვის სამსახურის ინფორმაციაც მოვისმინეთ. უნდა აღინიშნოს, რომ რეგიონში და შავ ზღვაზე რუსეთის აგრესიული და დესტრუქციული ქმედებები, ჩვენი უკრაინელი პარტნიორების წინააღმდეგ, განსაკუთრებით შემაშფოთებელია და აუცილებელია საერთაშორისო საზოგადოების მკაცრი და ადექვატური რეაგირება“, - განაცხადა ირაკლი ბერაიამ.

„კომიტეტის სხდომაზე კომიტეტის წევრების მხრიდან საინტერესო კითხვები დაისვა საქართველოს უსაფრთხოებისთვის ჩვენი სამსახურის მნიშვნელობაზე. კომიტეტის წევრებს დაზვერვის სამსახურის მიერ მომზადებული ანალიზი და შეფასებები გავაცანით და წარმოვადგინეთ ის გამოწვევები, რომლებიც შექმნილი ვითარებიდან გამომდინარე, შესაძლოა საქართველოს წინაშე აღმოჩნდეს“, - აღნიშნა დაზვერვის სამსახურის ანალიტიკური დეპარტამანეტის დირექტორმა, გივი თუმანიშვილმა.