პარლამენტის დიასპორისა და კავკასიის საკითხთა კომიტეტის თავმჯდომარე ბექა ოდიშარია საქართველოში ლიეტუვის რესპუბლიკის საგანგებო და სრულუფლებიან ელჩს, ანდრიუს კალინდრას შეხვდა.

მხარეებმა ისაუბრეს საპარლამენტო მეგობრობის ჯგუფების ფორმატში არსებულ მეგობრულ ურთიერთობებზე და თანამშრომლობის სამომავლო პერსპექტივებზე, ასევე პანდემიით გამოწვეულ გამოწვევებზე.

„მოხარული ვარ, რომ შევხვდი ახალგაზრდა, თუმცა ძალზე გამოცდილ დიპლომატს, რომელიც უდიდესი სიმპატიითა განწყობილი საქართველოსა და ქართველი ხალხის მიმართ. ლიუტუვის ელჩს გავაცანი წინა მოწვევის პარლამენტში ჩემ მიერ ლიეტუვის პარლამენტთან მეგობრობის ჯგუფის ხელმძღვანელის პოზიციაზე განხორციელებული აქტივობები, ასევე მის წინამორბედთან არსებული თანამშრომლობის საკითხები, მათ შორის, ეკონომიკური მიმართულებით. ზოგადად, ლიეტუვის სახელმწიფოს საქართველოს მიმართ ეკონომიკური თანამშრომლობის კუთხით ძალიან საინტერესო ხედვა აქვს. საუბარი, ასევე შეეხო კორონავირუსის პანდემიით გამოწვეულ პრობლემებს“, - განაცხადა შეხვედრის დასრულების შემდეგ დიასპორისა და კავკასიის საკითხთა კომიტეტის თავმჯდომარემ, ბექა ოდიშარიამ.

მისივე თქმით, ლიეტუვის ელჩთან შეხვედრაზე, მხარეები აქტიურ სამომავლო თანამშრომლობაზე შეთანხმდნენ.

„მე-10 მოწვევის პარლამენტში, მე ვიქნები ლიეტუვის პარლამენტთან მეგობრობის ჯგუფის ძალიან აქტიური წევრი. თუ პანდემია საშუალებას მოგვცემს, საქართველოს დამოუკიდებლობის დღესთან დაკავშირებით ძალიან მნიშვნელოვანი ერთობლივი ღონისძიებები გაიმართება ლიეტუველი კულტურის მოღვაწეების მონაწილეობით საქართველოში. მივესალმები, მათ მზაობას მონაწილეობა მიიღონ ფართომასშტაბიან ღონისძიებებში და ამასთან დაკავშირებით, ბატონ ელჩს საორგანიზაციო საკითხების გადაჭრაში სრული მხარდაჭერა აღვუთქვი“, - აღნიშნა ბექა ოდიშარიამ.