პარლამენტის წევრების ჯგუფის მიერ საკანონმდებლო ინიციატივის წესით წარმოდგენილი კანონპროექტი „მეწარმეთა შესახებ“ კანონი და მისგან გამომდინარე საკანონმდებლო პაკეტი განიხილა დარგობრივი ეკონომიკისა და ეკონომიკური პოლტიკის კომიტეტმა დღეს სხდომაზე.

ოცდახუთამდე კანონპროეტისგან შემდგარი პაკეტი, ერთ-ერთმა ინიციატორმა, პარლამენტის წევრმა მიხეილ სარჯველაძემ გამოიტანა პირველი მოსმენით განსახილველად.

საკითხის წარდგენისას მომხსენებელმა განაცხადა, რომ კანონპროექტზე მუშაობის პროცესში აქტიურად თანამშრომლობდნენ დარგობრივი ეკონომიკის კომიტეტთან და მისი ეგიდით ბიზნესის წარმომადგენლებთან, რაც, მისი თქმით, უაღრესად მნიშვნელოვანი იყო ასეთი საჭირო ახალი კანონის პროექტზე მუშაობისას. „ყოველთვის მნიშვნელოვანია იმ ადამიანებთან კონსულტაცია, ვისაც უნდა შეეხოს მომავალში ეს საკანონმდებლო რეგულაციები. რა თქმა უნდა, მათთან დიალოგს აქვს ყველაზე უფრო გადამწყვეტი მნიშვნელობა“, - განაცხადა მიხეილ სარჯველაძემ. მან კანონის ძირითად არსზე ისაუბრა და ყურადღება გაამახვილა იმ აუცილებლობაზე, რამაც ახალი კანონის შემუშავების საჭიროება გამოიწვია.

მისი თქმიღ, ახალი კანონის შექმნის საჭიროება გაჩნდა იმის გამო, რომ „მეწარმეთა შესახებ“ საქართველოს მოქმედი კანონი 1994 წელსაა მიღებული და მიუხედავად იმისა, რომ თავდაპირველი რედაქციის შემდგომ არაერთი ცვლილება განიცადა, სრულყოფილად ვერ ასრულებს დასახულ მიზნებს. კანონის შემუშავების შემდგომ კორპორატიული ურთიერთობების მოცულობისა და სირთულის ზრდამ, ასევე ბიზნეს სექტორის სწრაფმა განვითარებამ, საჭირო გახადა უფრო დეტალური, თანამედროვე მოთხოვნებსა და გამომწვევებზე მორგებული რეგულაციების შემუშავება. “მეწარმეთა შესახებ“ ახალი კანონის მიღების შედეგად, სამეწარმეო ურთიერთობებში კანონის როლი და დანიშნულება გაძლიერდება. კანონპროექტით შემოთავაზებული მთელი რიგი ნორმებისა, ერთი მხრივ, საწესდებო ავტონომიის პრინციპს გაამყარებს, ხოლო, მეორე მხრივ, მარეგულირებელ ფუნქციას შეასრულებს ამგვარი ავტონომიით სარგებლობის პროცესში.

სხდომაზე კანონპროექტის განხილვაში დეპუტატებთან ერთად მონაწილეობას იღებდნენ ბიზნესასოციაციების და საქართველოს სავაჭრო-სამრეწველო პალატის წარმომადგენლები. წარმოდგენილი საკითხის აქტუალობიდან გამომდინარე დაისვა მრავალრიცხოვანი შეკითხვები, რაზეც მომხსენებელმა ამომწურავად უპასუხა.

კომიტეტმა პირველი მოსმენით მხარი დაუჭირა „მეწარმეთა შესახებ“ კანონის პროექტს. დარგობრივი ეკონომიკისა და ეკონომიკური პოლიტიკის კომიტეტის თავმჯდომარის, დავით სონღულაშვილის შეფასებით, „ამ კანონის ინიცირება ძალიან მნიშვნელოვანი და დროულია. სამუშაო შეხვედრების დროს კანონპროექტთან დაკავშირებით სხვადასხვა სუბიექტების მხრიდან გაჩნდა მთელი რიგი შენიშვნები და მოსაზრებები, რომლებიც ინიციატორებსაც გადაეგზავნათ და უფრო დეტალურად ამის შესახებ მეორე მოსმენის რეჟიმში გაგრძელდება მსჯელობა“.

საქართველოს ფინანსთა მინისტრის მოადგილემ, ზურაბ ძნელაშვილმა კომიტეტში განსახილველად გამოიტანა საქართველოს მთავრობის მიერ რატიფიცირებისთვის წარმოდგენილი „საქართველოსა და იაპონიას შორის შემოსავლებზე ორმაგი დაბეგვრის თავიდან აცილებისა და გადასახადების გადაუხდელობის და გადასახადების თავიდან არიდების აღკვეთის შესახებ“კონვენცია.

მან ასევე კომიტეტზე გამოიტანა საქართველოს მთავრობის მიერ რატიფიცირებისთვის წარმოდგენილი „საქართველოსა და ჩინეთის სახალხო რესპუბლიკის სპეციალურ ადმინისტრაციულ რეგიონ ჰონგ კონგს შორის შემოსავლებსა და კაპიტალზე ორმაგი დაბეგვრის თავიდან აცილებისა და გადასახადების გადაუხდელობის და გადასახადების თავიდან არიდების აღკვეთის შესახებ“ შეთანხმება.

კომიტეტმა მხარი დაუჭირა ორივე დოკუმენტის პლენარულ სხდომაზე სარატიფიკაციოდ გატანას.

სხდომაზე კომიტეტის თავმჯდომარემ, დავით სონღულაშვილმა განაცხადა, რომ ქვეყანაში ენერტგეტიკის სფეროს აქტუალობიდან და ზოგადად დარგის მნიშვნელობიდან გამომდინარე, საჭირო გახდა დარგობრივი ეკონომიკისა და ეკონომიკური პოლიტიკის კომიტეტში შემავალი ენერგეტიკის პრობლემებთან დაკავშირებულ საკითხებზე მომუშავე სამეცნიერო-საკონსულტაციო საბჭოს შექმნა. საბჭოს შემადგენლობისა და საქმიანობის წესის განსაზღვრის შესახებ დოკუმენტაცია დეპუტატებს წინასწარ დაურიგდათ.

კომიტეტმა მხარი დაუჭირა სამეცნიერო-საკონსულტაციო საბჭოს შექმნის საკითხს.