ჯანმრთელობის დაცვისა და სოციალურ საკითხთა კომიტეტში 2021 წლის სახელმწიფო ბიუჯეტის პროექტის საბოლოო ვარიანტის განხილვა სამუშაო რეჟიმში ჩატარდა.

კომიტეტის წევრებმა, აღმასრულებელი ხელისუფლების წარმომადგენლებთან ერთად, ძირითადი ფინანსური დოკუმენტის პროექტის მიმართულებები განიხილეს და ყურადღება ჯანდაცვისა და სოციალური პროგრამების დაფინანსებაზე გამახვილდა.

როგორც შეხვედრაზე აღინიშნა საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს დაფინანსება მომავალი წლისთვის მნიშვნელოვნად იზრდება და მისი მოცულობა 5.5 მლრდ. ლარი იქნება.

„პარლამენტში 2021 წლის ძირითადი ფინანსური დოკუმენტის საბოლოო ვარიანტი შემოვიდა. დოკუმენტი თვისობრივად განსხვავდება იმ ვარიანტისგან, რაც მანამდე იყო წარმოდგენილი. კომიტეტის ახალ შემადგენლობას პრეზენტაციის ფორმით გავაცანით ბიუჯეტის პროექტის ძირითადი მიმართულებები და შესაბამისი უწყების წარმომადგენლებმა ფინანსურ დოკუმენტთან დაკავშირებით მოხსენებები წარმოადგინეს. აღსანიშნავია, რომ სამინისტროს დაფინანსება მნიშვნელოვნად იზრდება და მისი მოცულობა 5 563 მლნ. ლარს შეადგენს, რაც წინა წარმოდგენილ პროექტთან შედარებით 711 მლნ. ლარით მეტია. ბიუჯეტის პროექტში ასახულია ახალი კორონა ვირუსის - კოვიდ 19-ით გამოწვეული პანდემიასთან დაკავშირებული ხარჯები. რასაკვირველია, პანდემიიდან გამომდინარე, ყველაფრის პროგნოზირება რთულია, მაგრამ მნიშვნელოვანია, რომ დოკუმენტში მაქსიმალურად გათვალისწინებულია ყველა შესაძლო დანახარჯი, რაც შეიძლება ამ პროცესს მოყვეს. საუბარია როგორც კლინიკების მართვაზე, ასევე საწოლ ფონდის დამატებითი რესურსების საჭიროებებზე და ვაქცინაციის პროგრამის ეფექტურად განხორციელებაზე“, - განაცხადა დიმიტრი ხუნდაძემ. 

შეხვედრაზე აღინიშნა, რომ სახელმწიფო ბიუჯეტის პროექტთან დაკავშირებით კომიტეტი, პლენარულ სხდომაზე, მის მხარდაჭერას აპირებს.