საქართველოს მთავრობისადმი პარლამენტის მიერ ნდობის გამოცხადების საკითხი განიხილეს ფრაქცია „ქართული ოცნების“ სხდომაზე. სხდომის დასაწყისში, ფრაქციის თავმჯდომარე, მამუკა მდინარაძე პრემიერ-მინისტრობის და მთავრობის წევრობის კანდიდატებს მიესალმა და სხდომის მუშაობის პროცედურებზე ისაუბრა.

„დღეს ჩვენ ფრაქციის ფორმატში ვმართავთ შეხვედრას, შესაბამისად, შევეხებით მხოლოდ სამთავრობო პროგრამის სტრატეგიულ საკითხებს. ჩვენ ორი დღის განმავლობაში, კომიტეტეტის ფორმატში, უკვე გავმართეთ შეხვედრები, სადაც დეტალურად, საგნობრივად მინისტრობის კანდიდატებთან ბევრი თემა განვიხილეთ. 200-ზე მეტი შეკითხვა დაისვა, იყო კრიტიკაც, დისკუსიაც და სიღრმისეული საუბრები. ჩვენ ამის საშუალება ხვალინდელ პლენარულ სხდომაზე კიდევ ერთხელ მოგვეცემა“, - განაცხადა მამუკა მდინარაძემ.

ფრაქციის თავმჯდომარემ საპარლამენტო ტრიბუნა პრემიერ-მინისტრობის კანდიდატს, გიორგი გახარიას დაუთმო, რომელმაც სამთავრობო პროგრამის ძირითად მიმართულებებზე, ქვეყნის წინაშე არსებულ საშინაო და საგარეო გამოწვევებზე, სოციალურ-ეკონომიკურ ვითარებასა და სამომავლო პერსპექტივებზე თემატურად ისაუბრა.

„მოგეხსენებათ, 2020 წელი საკმაოდ რთული წელი იყო. თითოეული ჩვენგანისთვის, პირველ რიგში რა თქმა უნდა ჩვენი მოქალაქეებისთვის, გლობალურმა პანდემიამ ფაქტობრივად გამოცდა მოუწყო სახელმწიფოს ყველა ინსტიტუტს და ცალკე აღებულ ჩვენს თითოეულ მოქალაქეს და ყველას კარგად გვესმის, რომ 2021 წელიც იქნება უაღრესად მძიმე და გამოწვევებით სავსე, რაც, რა თქმა უნდა, აორმაგებს როგორც მთავრობის, ისე – პარლამენტის პასუხისმგებლობას, რომელსაც სამწუხაროდ ჯერ კიდევ არ ჰყავს ჯანსაღი ოპოზიცია. ყველას კარგად მოგეხსენებათ, რომ ოპოზიციის გარეშე მუშაობა საკმაოდ რთული იქნება, იმ გამოწვევების გათვალისწინებით, რომლის წინაშეც დღეს დგას ქვეყანა – როგორც გლობალური პანდემიის, ისე ეკონომიკური კრიზისისა და იმ პოლიტიკური პროცესის თვალსაზრისით, რომელიც დღეს ქვეყანაში მიმდინარეობს. ყველას კარგად უნდა გვესმოდეს, რომ როდესაც ჩვენმა მოქალაქეებმა არჩევნებში მიიღეს მონაწილეობა, დაახლოებით 2 მილიონმა ადამიანმა, უდიდესი პასუხისმგებლობა და ვალდებულება დააკისრა თითოეულ ჩვენგანს, ამიტომ ყველას კარგად უნდა გვესმოდეს, რომ მიუხედავად ყველა იმ გამოწვევისა და სირთულისა, რომელიც ჩვენს წინაშე იქნება მომავალი წლების განმავლობაში, ყველამ ერთად უნდა ვიზრუნოთ ეფექტიანობაზე. პირველ რიგში, მთავრობა ყველაფერს გააკეთებს იმისთვის, რომ პროგრამა, „ევროპული სახელმწიფოს მშენებლობისკენ”, რომელიც წარმოდგენილია პარლამენტის წინაშე, განვახორციელოთ სრულად, რამეთუ ჩვენი ქვეყნის ყველაზე დიდი მიზანი და ოცნებაც არის 4 წლის თავზე ჩვენ შევძლოთ გავაკეთოთ განაცხადი ევროკავშირში სრულფასოვანი წევრობისთვის და ეს განაცხადი უნდა იყოს აბსოლუტურად დასაბუთებული. ამ განაცხადის დასაბუთებულობა ნიშნავს რამდენიმე განზომილებაში ქვეყნის სერიოზულ განვითარებას – რა თქმა უნდა, დემოკრატიზაციის, ეკონომიკური უსაფრთხოების თვალსაზრისით და ეს ყველაფერი არის იმ პროგრამის ნაწილი, რომელზეც ჩვენ ვისაუბრებთ“, – განაცხადა გიორგი გახარიამ.

პრემიერ-მინისტრობის კანდიდატს ფრაქციის წევრებმა შეკითხვებით მიმართეს და სხვადასხვა სფეროსა და მიმართულებაზე, როგორიც არის - პანდემია და ვაქცინაცია, ინფრასტრუქტურული პროექტები, რეგიონის გეოპოლიტიკის საკითხები და სტრატეგიულ პარტნიორებთან ურთიერთობები, ეროვნული უსაფრთხოების ხედვები, პოლიტიკური დიალოგის შესაძლო შედეგები, განათლების, ეკონომიკის და გარემოს დაცვის საკითხები დამატებითი ინფორმაციები მოისმინეს.

მთავრობისადმი ნდობის გამოცხადების საკითხზე პარლამენტი, რიგგარეშე სესიის 24 დეკემბრის პლენარულ სხდომაზე, იმსჯელებს.