განათლებისა და მეცნიერების კომიტეტის სხდომაზე „უმაღლესი განათლების შესახებ“ კანონში შესატანი ცვლილებები განათლებისა და მეცნიერების მინისტრის პირველმა მოადგილემ, ეკატერინე დგებუაძემ წარმოადგინა.

მომხსენებლის განმარტებით, კანონპროექტის მიღების შედეგად, მოხდება „ოკუპირებული ტერიტორიების შესახებ“ საქართველოს კანონით გათვალისწინებულ ოკუპირებულ ტერიტორიაზე მცხოვრები სპეციალური საგანმანათლებლო საჭიროების მქონე მოსწავლეებისთვის, სრული ზოგადი განათლების მიღების შემდეგ, უმაღლეს განათლებაზე ხელმისაწვდომობის უზრუნველყოფა.

მისივე განმარტებით, კანონპროექტით გათვალისწინებული ცვლილება დადებით შედეგს მოგვცემს შესაბამის ბენეფიციართა სასწავლო პროცესში მეტი ენთუზიაზმით ჩართულობისა და მოტივაციის ამაღლების მიმართულებით.

დღესვე, კომიტეტს შინაგან საქმეთა სამინისტროს იურიდიული დეპარტამენტის უფროსმა, ლანა ცანავამ  წარუდგინა „უმაღლესი განათლების შესახებ“ კანონში  შესატანი ცვლილება.

მომხსენებლის განმარტებით, კანონპროექტის მიზანს წარმოადგენს სსიპ – განათლების ხარისხის განვითარების ეროვნული ცენტრის მიერ შსს აკადემიის კურსდამთავრებულებზე 2007-2008 სასწავლო წლის დაწყებამდე გაცემული დიპლომების აღიარება.

ლანა ცანავამ კომიტეტის წევრების კითხვებს უპასუხა.

როგორც კომიტეტის თავმჯდომარემ, შალვა პაპუაშვილმა განმარტა, აღნიშნული კანონპროექტი მე-9 მოწვევის პარლამენტშია ინიცირებული.

კომიტეტმა მხარი დაუჭირა წარმოდგენილი კანონპროექტების პლენარულ სხდომაზე განხილვას.