„დღეს, გენდერული თანასწორობის საბჭოს ფორმატში განვიხილავთ 2017-2020 წლების სამოქმედო გეგმის ანგარიშს და ამ საკითხებიდან გამომდინარე შევიმუშავებთ 2021 წლის სამოქმედო გეგმის მონახაზს. უმნიშვნელოვანესი იქნება, რომ სამოქმედო გეგმა საბჭომ დროულად მიიღოს და დაამტკიცოს, რადგან ბევრი მწვავე საკითხი ძალიან აქტუალური გახდა“, - განაცხადა გენდერული თანასწორობის საბჭოს თავმჯდომარემ, ნინო წილოსანმა.

ეროვნულ-დემოკრატიული ინსტიტუტის (NDI) წარმომადგენელმა, თეონა ყუფუნიამ 2017-2020 წლების სამოქმედო გეგმის შესრულების ანგარიში წარმოადგინა.

„შეფასების ანგარიშზე მუშაობა ცოტა ხნის წინ დასრულდა და იძლევა ძალიან კარგ სურათს იმასთან დაკავშირებით, თუ რა მიღწევები და გამოწვევები ჰქონდა საბჭოს და რა რეკომენდაციები გვაქვს ამასთან დაკავშირებით.

შეფასება ეფუძნება დაახლოებით 30-მდე ინდივიდუალურ ინტერვიუს სხვდასხვა დაინტერესებულ მხარესთან, მათ შორის, დეპუტატებთან, დონორებთან და ასევე, საჯარო დოკუმენტების შესწავლას, რომელიც ან საბჭოზე შეიქმნა ან საბჭოს მიერ იქნა შექმნილი“, - განაცხადა ეროვნულ-დემოკრატიული ინსტიტუტის წარმომადგენელმა.

თეონა ყუფუნიამ დეტალურად ისაუბრა 2017-2020 წლებში გენდერული თანასწორობის საბჭოს მიღწევებზე, გამოწვევებზე და ასევე, რეკომენდაციებზე.

მისივე თქმით, საერთაშორისო გამჭვირვალობა - საქართველომ მე-9 მოწვევის პარლამენტში ერთ-ერთი ყველაზე დადებითი შეფასება გენდერული თანასწორობის მუდმივმოქმედი საპარლამენტო საბჭოს საქმიანობას მისცა.

ნინო წილოსანის შეფასებით, წარმოდგენილი იყო სამოქმედო გეგმის ძალიან სრულყოფილი ანალიზი, რაც ნათელ წარმოდგენას იძლევა სად არის საჭირო დამატებითი ძალისხმევა.

ახალ სამოქმედო გეგმაზე მსჯელობისას, გენდერული თანასწორობის საბჭოს წევრებმა გადაწყვეტილება მიიღეს, რომ პირველ რიგში, შემუშავდება 2021 სამოქმედო გეგემა, სადაც ასახული იქნება ის საკითხები, რომელთა დასრულება ვერ მოესწრო და ასევე, რომლებთან დაკავშირებითაც საჭიროა სწრაფი გადაწყვეტილებების მიღება და ამის შემდეგ შემუშავდება 2022 -2024 წლების სამოქმედო გეგმა.