გენდერული თანასწორობის მუდმივმოქმედი საბჭოს თავმჯდომარემ, ნინო წილოსანმა აღნიშნა, რომ საბჭო ძალიან აქტიური იქნება გენდერული მეინსტრიმინგის ნაწილში სხვადასხვა აუცილებელი და საჭირო ცვლილებების მიღებისას.

„გაეროს ქალთა ორგანიზაციის წარმომადგენლებმა გაგვაცნეს წინა მოწვევის პარლამენტთან თანამშრომლობის შედეგად დამუშავებული კონცეფცია და მონახაზი „გენდერული თანასწორობის შესახებ“ კანონში სავარაუდო შესატან ცვლილებებთან დაკავშირებით. მოვისმინეთ არასამთავრობო სექტორის და პროცესის ერთ-ერთი ძირითადი მონაწილის მხრიდან მოსაზრებები, თუ რა ცვლილებების განხორციელება გვესაჭიროება“, - განაცხადა ნინო წილოსანმა.

მისივე თქმით, გენდერული თანასწორობის საბჭოს სამოქმედო გეგმაში გაწერილი აქვს კონცეფციის განახლება, რომელიც ძალიან მოძველებულია.

„გენდერული თანასწორობის კონცეფცია 2006 წელსაა დამტკიცებული და ის არ ასახავს იმ მიმდინარე და უკვე განხორციელებულ ძალიან პროგრესულ ცვლილებებს, რომელიც ჩვენ კანონმდებლობაში და აღსრულების ნაწილშიც გვაქვს. ამიტომ, ვთვლით, რომ კონცეფციის განახლება აუცილებელია, ხოლო რაც შეეხება „გენდერული თანასწორობის საბჭოს შესახებ“ კანონში ცვლილებებს, აღნიშნული უკვე შემდგომი წლების სამოქმედო გეგმაშია გაწერილი. საკანონმდებლო ცვლილებების მიღება, გარკვეულწილად, უფრო ხანგრძლივ პროცესს მოიცავს და ამ მიმართულებით მუშაობას საბჭო მიმდინარე წელს დაიწყებს“, - განაცხადა ნინო წილოსანმა.

შეხვედრის ორგანიზატორი იყო გენდერული თანასწორობის მუდმივმოქმედი საპარლამენტო საბჭო და გაეროს ქალთა ორგანიზაცია (UN Women).