გივი ჭიჭინაძე უკრაინის საგანგებო და სრულუფლებიან ელჩს შეხვდა
დიასპორისა და კავკასიის საკითხთა კომიტეტის თავმჯდომარის პირველი მოადგილე გივი ჭიჭინაძე საქართველოში უკრაინის საგანგებო და სრულუფლებიან ელჩს, იგორ დოლგოვს შეხვდა.
როგორც შეხვედრის დასრულების შემდეგ გივი ჭიჭინაძემ განაცხადა, საუბარი შეეხო საქართველოსა და უკრაინას შორის არსებულ ურთიერთობებს და მათი განმტკიცების პერსპექტივებს.
„ჩვენ, ძირითადად, ვისაუბრეთ იმერეთის რეგიონის იმ ქალაქებზე, რომელსაც მე საქართველოს პარლამენტში წარმოვადგენ და იმ პრობლემებზე, რაც აღნიშნულ მუნიციპალიტეტებში არსებობს. იმერეთის გუბერნატორად მუშაობის პერიოდში იმერეთის რეგიონი პოლტავას რეგიონს დაუმეგობრდა, დამეგობრებულია ბევრი ქალაქი და სწორედ ამ მეგობრული ურთიერთობების განვითარებაზე ვისაუბრეთ“, - აღნიშნა დიასპორისა და კავკასიის საკითხთა კომიტეტის თავმჯდომარის პირველმა მოადგილემ, გივი ჭიჭინაძემ.
