შეხვედრაზე მხარეებმა საქართველო-საბერძნეთს შორის არსებული ურთიერთობები და სამომავლო თანამშრომლობის პერსპექტივები განიხილეს. ორი ქვეყნის პარლამენტს შორის ურთიერთობების კიდევ უფრო გაღრმავების მიზნით, გივი მიქანაძემ ბერძენ კოლეგას პარლამენტებს შორის თანამშრომლობის მემორანდუმის გაფორმება შესთავაზა.

დიმიტრის კოუველასი აღნიშნულ ინიციატივას მიესალმა და აღნიშნა, რომ მემორანდუმის სამუშაო ვერსიას ჯერ მეგობრობის ჯგუფის წევრებთან განიხილავს და შემდგომ პარლამენტის თავმჯდომარესაც გააცნობს. ონლაინ შეხვედრის ერთ-ერთ საკითხს სამომავლო ორმხრივი სამუშაო ვიზიტებიც წარმოადგენდა. მხარეები შეთანხმდნენ, რომ საპარლამენტო დელეგაციების სავარაუდო ვიზიტების თარიღად ივნისი და ოქტომბერი განისაზღვროს.

როგორც შეხვედრაზე აღინიშნა, 2022 წლის 20 აპრილს ორ ქვეყანას შორის დიპლომატიური ურთიერთობების დამყარების 30 წელი სრულდება. აღნიშნულ თარიღთან დაკავშირებით, გივი მიქანაძემ ბერძენ კოლეგას კონკრეტული ღონისძიებების გამართვა შესთავაზა, რომლებიც როგორც თბილისში, ასევე ათენში გაიმართება. შეხვედრაზე ქართველმა კანონმდებელმა საქართველოს პარლამენტთან მეგობრობის ჯგუფის ხელმძღვანელს, მიმდინარე წლის შემოდგომაზე, ათენში ევროპის საბჭოს წევრი ქვეყნების პარლამენტის თავმჯდომარეების შეხვედრის თაობაზე ინფორმაცია მიაწოდა და აღნიშნა, რომ ეს ფორმატი კიდევ ერთ საშუალებას იძლევა ორი ქვეყნის პარლამენტებს შორის ხშირი კონტაქტი და კომუნიკაცია შედგეს. დიმიტრის კოუველასმა ქართველ კოლეგასთან გამართული პირველი, გაცნობითი შეხვედრა მნიშვნელოვნად შეაფასა და აღნიშნა, რომ იგი მიესალმება და მხარს უჭერს გივი მიქანაძის მხრიდან გამოთქმულ ინიციატივებს და თანამშრომლობის ახალი ფორმატების დანერგვას.

ორი ქვეყნის საპარლამენტო მეგობრობის ჯგუფის ხელმძღვანელების ონლაინ შეხვედრას, საბერძნეთის პარლამენტთან მეგობრობის ჯგუფის წევრი, ევროპასთან ინტეგრაციის კომიტეტის თავმჯდომარე, მაკა ბოჭორიშვილი და საბერძნეთში საქართველოს საგანგებო და სრულუფლებიანი ელჩი დავით დონდუა ესწრებოდნენ.