ჯანმრთელობის დაცვისა და სოციალურ საკითხთა კომიტეტის სხდომაზე, რომელსაც კომიტეტის თავმჯდომარე დიმიტრი ხუნდაძე უძღვებოდა, „საზოგადოებრივი ჯანმრთელობის შესახებ“ საქართველოს კანონში ცვლილების შეტანის თაობაზე“  კანონპროექტი პირველი მოსმენით განიხილეს.

დიმიტრი ხუნდაძის განცხადებით, მსოფლიო ისევ კოვიდის პირობებში ცხოვრობს და ამ კანონპროექტის მიღებაც სწორედ  ახალი კორონავირუსით გამოწვეული ინფექციის გავრცელების საფრთხეებმა განაპირობა.

მთავრობის საკანონმდებლო ინიციატივის წესით წარმოდგენილი კანონპროექტი კომიტეტის სხდომაზე საქართველოს ოკუპირებული ტერიტორიებიდან დევნილთა, შრომის, ჯანმრთელობის და სოციალური დაცვის მინისტრის პირველმა მოადგილემ თამარ გაბუნიამ გამოიტანა და კანონმდებლებს ცვლილებების ძირითადი არსი გააცნო.

მისი ინფორმაციით, ამ ცვლილებების მიზანია, გაჩნდეს საფუძველი იმისათვის, რომ ეპიდემიოლოგიური მდგომარეობის გათვალისწინებით, საქართველოს მთავრობამ საქართველოში შემოსვლის ან/​და​ ყოფნის მიზნით, შესაბამის უცხოელთა და მოქალაქეობის არმქონე პირთა წრის მიმართ, დაადგინოს ჯანმრთელობისა და უბედური შემთხვევის დაზღვევის პირობები და წესები.

როგორც თამარ გაბუნიამ აღნიშნა, ახალი კორონავირუსით გამოწვეული ინფექციის გავრცელების შეკავებისა და მისი გავრცელების პრევენციული ზომების შემოღების მიზნით, ჯერ კიდევ შარშან მიზანშეწონილად ჩაითვალა, საქართველოს ტერიტორიაზე უცხოელი და მოქალაქეობის არმქონე სტუდენტის შემოსვლისა და ყოფნისათვის საქართველოს მთავრობის მიერ შემოღებულიყო ჯანმრთელობისა და უბედური შემთხვევის დაზღვევის პირობები და წესები.

ამ მიზნით, საქართველოს მთავრობის მიერ 2020 წლის 10 სექტემბერს მიღებულ იქნა №572 დადგენილება - „საქართველოს ტერიტორიაზე უცხოელი და მოქალაქეობის არმქონე სტუდენტის ჯანმრთელობისა და უბედური შემთხვევის დაზღვევის პირობებისა და წესის განსაზღვრის შესახებ“.

ამ დადგენილების გამოცემის ერთ-ერთ საფუძველს წარმოადგენდა „ნორმატიული აქტების შესახებ“ ორგანული კანონი, რომლის მიხედვით, საქართველოს მთავრობა დადგენილებას იღებს იმ შემთხვევაშიც, თუ შესაბამისი საკითხი მოწესრიგებული არ არის საქართველოს საკანონმდებლო აქტით. ამის შემდეგ კი დღის წესრიგში დგება საკითხი, რომ მთავრობამ პარლამენტს წარუდგინოს საკანონმდებლო აქტის პროექტი. შესაბამისად, საქართველოს მთავრობა, ამ კანონპროექტის ინიცირებით, ახდენს დადგენილებით გათვალისწინებული საკითხის საკანონმდებლო დონეზე მოწესრიგების საკითხის ინიცირებას.

ამგვარად, როგორც სხდომაზე აღინიშნა, წარმოდგენილი კანონპროექტის მიღებით გაჩნდება საფუძველი იმისათვის, რომ ეპიდემიოლოგიური მდგომარეობის გათვალისწინებით, საქართველოს მთავრობამ საქართველოში შემოსვლის ​ან/და​ ყოფნის მიზნით, შესაბამის უცხოელთა და მოქალაქეობის არმქონე პირთა წრის მიმართ, დაადგინოს ჯანმრთელობისა და უბედური შემთხვევის დაზღვევის პირობები და წესები.

კომიტეტის წევრებმა აღნიშნული კანონპროექტის პარლამენტის პლენარულ სხდომაზე პირველი მოსმენით განსახილველად გატანას ერთხმად დაუჭირეს მხარი.