მიხეილ ყაველაშვილი ონში ჭიდაობის დარბაზის მშენებლობასთან დაკავშირებით, ყოფილ მოჭიდავეებს შეხვდა
სპორტისა და ახალგაზრდულ საქმეთა კომიტეტის თავმჯდომარე მიხეილ ყაველაშვილთან რაჭა-ლეჩხუმ სვანეთის მაჟორიტარი დეპუტატის გოჩა ენუქიძის ინიციატივით, სამუშაო შეხვედრა გაიმართა, რომელსაც ესწრებოდნენ: ოლიმპიური ჩემპიონი თავისუფალ ჭიდაობაში, საქართველოს ეროვნული ოლიმპიური კომიტეტის (სეოკ) პრეზიდენტის მრჩეველი დავით გობეჯიშვილი. მსოფლიო ჩემპიონი, (სეოკ) რაჭა-ლეჩხუმ ქვემო სვანეთის რეგიონული ხელმძღვანელი ავთანდილ მაისურაძე და ონის მუნიციპალიტეტის მერიის ხელმძღვანელი პირები.
შეხვედრაზე განიხილეს ქალაქ ონში მიმდინარე ბულვარის სარეკონსტრუქციო - სარეაბილიტაციო სამუშაოები, რის ფარგლებშიც გათვალისწინებულია ამ ტერიტორიაზე არსებული ისტორიული ჭიდაობის დარბაზის დემონტაჟი, რომელიც ამორტიზებულია და სტანდარტებს ვეღარ აკმაყოფილებს.
შეხვედრაზე გადაწყდა, რომ საქართველოს კულტურის, სპორტისა და ახალგაზრდობის და რეგიონული განვითარების და ინფრასტრუქტურის სამინისტროებთან გაიმართება შეხვედრები, სადაც განხილული იქნება დარბაზის მშენებლობის დაფინანსების და მისი თანამედროვე ინვენტარით აღჭურვის საკითხი.
