პარლამენტი დღეს თეა წულუკიანის ადგილმონაცვლის, ნინო იობაშვილის პარლამენტის წევრის უფლებამოსილების ცნობის შესახებ დადგენილების პროექტს უყრის კენჭს.

დღევანდელ სხდომაზე მეორე მოსმენით იმსჯელებენ „საერთო სასამართლოების შესახებ კანონში ცვლილებების“ შესახებ კანონპროექტთა პაკეტის თაობაზე. მეორე მოსმენით განიხილავს პარლამენტი „საქართველოს მოქალაქეობის შესახებ ორგანულ კანონში“ ცვლილებების საკითხს.

ასევე, გათვალისწინებულია საკონსტიტუციო ცვლილებასთან დაკავშირებით კანონპროექტის განხილვა, რომელიც მხოლოდ კონსტიტუციის გარდამავალ დებულებებს შეეხება და ითვალისწინებს 2024 წლის საპარლამენტო არჩევნებისთვის ერთჯერადად ბარიერის 3%-მდე დაწევას. რეგლამენტის თანახმად, საკითხი ჯერ საპროცედურო საკითხთა და წესების კომიტეტს გადაეცემა, რათა პარლამენტში შეიქმნას საორგანიზაციო კომისია.

ბიურომ იმსჯელა საორგანიზაციო საკითხებზე.

ახალ საკანონმდებლო ინიციატივებზე განისაზღვრა წამყვანი და სავალდებულო კომიტეტები. იმსჯელეს რიგი კანონპროექტების კომიტეტებში განხილვის ვადის გაგრძელების თაობაზე.

პარლამენტში წარდგენილია საქართველოს სახელმწიფო ინსპექტორის და სახალხო დამცველის წლიური ანგარიშები, რომლებიც წამყვან კომიტეტებში მოსმენის შემდეგ წარედგინება პლენარულ სხდომას.

ბიუროს სხდომის დასრულების შემდეგ დეპუტატებმა პლენარულ სხდომათა დარბაზში გადაინაცვლეს.