ბიუროს სხდომაზე პარლამენტის თავმჯდომარემ, არჩილ თალაკვაძემ განცხადება გააკეთა, სადაც საპარლამენტო საქმიანობაში ოპოზიციის ჩართულობის მნიშვნელობა აღნიშნა.

„მოგეხსენებათ, რომ ჩვენ ღია დავტოვეთ კარი და შესაძლებლობა იმისთვის, რომ სხვა პარტიებიც შემოუერთდნენ საპარლამენტო საქმიანობას, ეს გახლავთ ჩვენი საზოგადოების დაკვეთაც, რასაც ბოლო საზოგადოებრივი აზრის კვლევებიც აჩვენებს და ეს გახლავთ ჩვენი საერთაშორისო პარტნიორების ცალსახა მოწოდება, რჩევა და პოზიციაც. პარლამენტის გარეთ ჩვენი პარტნიორები და ჩვენი საზოგადოება არ უჭერს მხარს პოლიტიკას, არ უჭერს მხარს დესტაბილიზაციას და მე ვფიქრობ, ეს სიგნალი და ეს მოწოდება უნდა აღმოჩნდეს სახელმძღვანელო დანარჩენი პოლიტიკური პარტიებისთვის ოპოზიციის შიგნით.

იმედი მაქვს, რომ ოპოზიცია საკუთარ პასუხებს და დამოკიდებულებას კიდევ ერთხელ გადახედავს და გადააფასებს გარკვეულ ნაწილში, ვინაიდან, საზოგადოებრივი აზრის კვლევები უკვე სახეზეა, სადაც ჩვენი საზოგადოების ძალიან დიდი ნაწილი და ბევრად უფრო დიდი ნაწილი, არ უჭერს მხარს ბოიკოტს, არ უჭერს მხარს მონაწილეობაზე უარის თქმას და ასევე, მნიშვნელოვანია, რომ ქვეყანაშიც უკვე სახეზეა ის საჭიროებები, რასაც პოლიტიკურმა სისტემამ უნდა უპასუხოს - ეს არის ეკონომიკის აღდგენის საჭიროება, სიღარიბის შემცირება, ახალი სამუშაო ადგილების შექმნის საჭიროება, პანდემიის და ვაქცინაციის პროცესის ეფექტურად მართვა და ჩვენი საერთაშორისო დღის წესრიგის განუხრელად განხორციელება, რაშიც მთელი პოლიტიკური სისტემის როლი გახლავთ მნიშვნელოვანი“, - განაცხადა პარლამენტის თავმჯდომარემ.

ბიუროს სხდომაზე პარლამენტის თავმჯდომარემ, ბიუროს წევრებს 13-16 აპრილის პლენარული სხდომების დღის წესრიგის საკითხები, ახალი საკანონმდებლო ინიციატივები და საორგანიზაციო საკითხები გააცნო. მისივე განცხადებით, წარმოდგენილ დღის წესრიგის საკითხებს, დღეს გასამართი კომიტეტის სხდომებზე განხილული საკითხებიც დაემატება, რომელთა ასახვა ბიუროს ხვალინდელ სხდომაზე მოხდება.

პარლამენტის ბიუროს მორიგი სხდომა, 13 აპრილს, პლენარული სხდომის დაწყებამდე, 11.30 საათზე გაიმართება.