პარლამენტის ბიუროს დღევანდელ სხდომაზე მიმდინარე სასესიო კვირის დღის წესრიგი განიხილეს და ახალ საკანონმდებლო ინიციატივებზე წამყვანი და სავალდებულო კომიტეტები განსაზღვრეს.

27 აპრილის პლენარული სხდომის დღის წესრიგს პარლამენტის თავმჯდომარის, არჩილ თალაკვაძის თანამდებობიდან გადადგომის განცხადების ცნობად მიღების და შესაბამისად, პარლამენტის თავმჯდომარის არჩევის საკითხი დაემატა.

„მას შემდეგ, რაც პარლამენტი ცნობად მიიღებს არჩილ თალაკვაძის განცხადებას გადადგომის თაობაზე, დაიწყება პოლიტიკური დებატები, ხოლო შემდეგ გაგრძლდება პროცედურა ახალი თავმჯდომარის ასარჩევად“, - განაცხადა პარლამენტის თავმჯდომარის პირველმა მოადგილემ, გიორგი ვოლსკიმ.

მისი ინფორმაციით, ოთხშაბათს, მინისტრის საათის ფორმატში, დეპუტატები საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრს, ეკატერინე ტიკარაძეს მოუსმენენ, რის შემდეგაც ჯანმრთელობის დაცვისა და სოციალურ საკითხთა კომიტეტის ანგარიში იქნება წარმოდგენილი, ხოლო ხუთშაბათს სახელმწიფო უსაფრთხოების სამსახურის ანგარიშს მოუსმენენ.

საორგანიზაციო საკითხებს რაც შეეხება, მრავალ მნიშვნელოვან საკითხს შორის ფრაქცია „ქართული ოცნების“ მიერ პარლამენტის თავმჯდომარის პოზიციაზე კახაბერ კუჭავას წარდგინება განიხილეს.

პლენარული სხდომა ხვალ 12 საათზე დაიწყება.