13 მაისის პარლამენტის პლენარული სხდომა პოლიტიკური განცხადებებით დაიწყება.

აღნიშნულის შესახებ განცხადება პარლამენტის თავმჯდომარემ, კახა კუჭავამ ბიუროს სხდომაზე გააკეთა და აღნიშნა, რომ გამომდინარე იქიდან, რომ უქმე დღეების გამო სამშაბათის პლენარული სხდომა არ გაიმართა, რეგლამენტით მინიჭებული უფლების თანახმად, დღევანდელი პლენარული სხდომა პარლამენტის წევრების განცხადებებით გაიხსნება, რომლის დასრულების შემდეგ, დეპუტატები „მინისტრის საათის“ ფორმატში თავდაცვის მინისტრს, ჯუანშერ ბურჭულაძეს მოუსმენენ.

ბიუროს სხდომაზე 13 მაისის პლენარული სხდომის დღის წესრიგის საკითხები განსაზღვრეს.

დეპუტატები სხდომაზე 2020 წლის 31 ოქტომბრის საპარლამენტო არჩევნების შემსწავლელი საქართველოს პარლამენტის დროებითი საგამოძიებო კომისიის ანგარიშზე, კომიტეტების და მუდმივმოქმედი დელეგაციების 2020 წლის საქმიანობის ანგარიშებზე იმსჯელებენ.

ბიუროს წევრები ახალ საკანონმდებლო ინიციატივებს და საორგანიზაციო საკითხებსაც გაეცნენ. კერძოდ კი, ბიუროს სხდომაზე საპარლამენტო უმრავლესობის და ოპოზიციის მიერ მომზადებული „ამნისტიის შესახებ“ ორი სხვადასხვა კანონპროექტი დარეგისტრირდა.

როგორც სხდომაზე აღინიშნა, მომავალ საკომიტეტო კვირაში, დეპუტატები საქართველოს 2021 წლის სახელმწიფო ბიუჯეტის შესრულების 3 თვის მიმოხილვას, კომიტეტების ფორმატში გაეცნობიან.