რეგიონული პოლიტიკისა და თვითმმართველობის კომიტეტის სხდომაზე დეპუტატებმა დაჩქარებული წესით განხილვისთვის მოთხოვნილი „საქართველოს ორგანულ კანონში „ადგილობრივი თვითმმართველობის კოდექსი“ ცვლილების შეტანის შესახებ“ კანონპროექტი მეორე მოსმენით განიხილეს.

პარლამენტის წევრების: გიორგი ხოჯევანიშვილის, ეკა სეფაშვილის, ნინო ლაცაბიძის, ანზორ ბოლქვაძის და ვიქტორ ჯაფარიძის მიერ საკანონმდებლო ინიციატივის წესით მომზადებული ცვლილებების პროექტი მუხლობრივად, საკითხის ერთ-ერთმა ინიციატორმა, გიორგი ხოჯევანიშვილმა წარმოადგინა.

მომხსენებლის ინფორმაციით, კონსულტაციების შედეგად პროექტის პირვანდელი ვარიანტი შეიცვალა და შედეგად, მინიმუმადე იქნა დაყვანილი ყველა ის რისკი, რომელიც შეიძლება კანონპროექტის მიღებას უკავშირდებოდეს. რაც შეეხება უშუალოდ ცვლილებებს - კანონპროექტით მუნიციპალიტეტის მერი (გარდა თბილისი მუნიციპალიტეტისა) უფლებამოსილია არაუგვიანეს 2021 წლის 1 ოქტომბრისა, საკრებულოს თანხმობით მიიღოს გადაწყვეტილება აუქციონის ფორმით პრივატიზებული მუნიციპალიტეტის ქონების შემძენისთვის, სარგებლობის უფლებით გადაცემული ან მართვის უფლებით გადაცემული ქონების მიმღებისთვის, შეცვალოს ან გააუქმოს საინვესტიციო პირობა ან/და შეამსუბუქოს ფინანსური პირობა.

კომიტეტის თავმჯდომარის, სოზარ სუბარის შეფასებით, კანონპროექტის მიღება მუნიციპალიტეტის მერებს საშუალებას მისცემს, კორონავირუსის პანდემიის პერიოდში, ისარგებლონ აღნიშნული შეღავათებით და შესაბამისი ღონისძიებები განახორციელონ.

მეორე მოსმენით კანონპროექტის პლენარულ სხდომაზე გატანას, კომიტეტის წევრებმა, ერთხმად დაუჭირეს მხარი.