საარჩევნო რეფორმის სამუშაო ჯგუფმა მორიგი შეხვედრა გამართა, რომელზეც ცენტრალური საარჩევნო კომისიის თავმჯდომარის მოადგილეების შერჩევის საკითხები განიხილეს.

საპარლამენტო უმრავლესობის მხრიდან სამუშაო ჯგუფის წევრებს ვერსიის დონეზე წარედგინა ინიციატივა, რომლიც თავმჯდომარის ორი მოადგილის ყოლას ითვალისწინებს, საიდანაც ერთი მოადგილე პროფესიული ნიშნით, ხოლო მეორე ოპოზიციური პოლიტიკური ჯგუფების მხრიდან შეირჩევა.

როგორც შეხვედრის შემდეგ, სამუშაო ჯგუფის წევრებმა განმარტეს, ორშაბათს კიდევ ერთი შეხვედრა გაიმართება, საკითხის ირგვლივ მსჯელობა და დისკუსია კი სამომავლოდ საკომიტეტო მოსმენების ფორმატში გაგრძელდება.

„დღევანდელი შეხვედრის ფარგლებში, პოზიციები კიდევ უფრო დაახლოვდა და შეუთანხმებელი საკითხების რაოდენობა უფრო მეტად შემცირდა. ჩვენი მთავარი ამოსავალი პრინციპია მალე დავასრულოთ ეს მოლაპარაკებები და გადავიდეთ უკვე საკომიტეტო მოსმენებზე, სადაც შინაარსობრივ საკითხებზე მსჯელობა გაგრძელდება. რაც შეეხება ცესკოს თავმჯდომარის მოადგილის საკითხს - ჩვენ ვერსიად განვიხილეთ, რომ შესაძლებელია იყოს ორი მოადგილე, საიდანაც ერთი იქნება უფრო მეტი კვალიფიკაციის და პროფესიული ნიშნით შერჩეული, ხოლო ერთი მოადგილე იყოს ოპოზიციური პოლიტიკური ჯგუფების მიერ წარდგენილი. ძალიან ბევრი კომპლექსური საკითხი დარჩა, რომლებსაც დამატებითი მსჯელობა სჭირდება საკომიტეტო ფორმატში, ამიტომ შევთანხმდით, რომ იქნება საკითხები რასაც საკომიტეტო მოსმენის ფარგლებში გადავიტანთ და შემდეგი სამუშაო ჯგუფის შეხვედრის შემდეგ პრინციპული საკითხები პრაქტიკულად აღარ დარჩება შეუთანხმებელი. მნიშვნელოვანია, რომ შარლ მიშელის დოკუმენტით ნაკისრი ვალდებულებები რაც არის „ქართული ოცნება“ ამ შეთანხმების ერთგული რჩება და როცა საუბარია, რომ ოპოზიციას ცესკოს თავმჯდომარის მოადგილე უნდა ჰყავდეს, ეს იქნება გარანტირებული“, - განაცხადა იურიდიულ საკითხთა კომიტეტის თავმჯდომარემ, ანრი ოხანაშვილმა.