საპროცედურო საკითხთა და წესების კომიტეტმა საქართველოს პარლამენტის წევრის, სალომე მუჯირისათვის პარლამენტის წევრის უფლებამოსილების ვადამდე შეწყვეტას მხარი დაუჭირა.

აღნიშნული საკითხი დღის წესრიგში მას შემდეგ დადგა, რაც სალომე მუჯირმა პარლამენტს, მისთვის უფლებამოსილების შეწყვეტის შესახებ, პირადი განცხადებით მიმართა.

კომიტეტის შესაბამისი დასკვნა პარლამენტის ბიუროს გადაეგზავნება და ბიურო აღნიშნულ საკითხს განსახილველად უახლოესი პლენარული სხდომის დღის წესრიგში შეიტანს.

საპროცედურო საკითხთა და წესების კომიტეტმა, დღევანდელ სხდომაზე, პროპორციული წარმომადგენლობის კვოტების ცვლილებაზე იმსჯელა. როგორც კომიტეტის თავმჯდომარემ, ირაკლი ქადაგიშვილმა განმარტა, მას შემდეგ, რაც პარლამენტში ახალი ფრაქცია „ლელო - პარტნიორობა საქართველოსთვის“ შეიქმნა, პარლამენტის რეგლამენტიდან გამომდინარე, აუცილებელი გახდა კვოტების გადახედვა.

კომიტეტის გადაწყვეტილებით:

1. ფრაქციას „ლელო - პარტნიორობა საქართველოსათვის“ თექვსმეტივე საპარლამენტო კომიტეტში თითო წევრი ეყოლება;
2. ფრაქციას „ლელო - პარტნიორობა საქართველოსათვის“ პარლამენტის მუდმივმოქმედ საპარლამენტო დელეგაციებში, კერძოდ:
   
   • მართლმადიდებლობის საპარლამენტთაშორისო ასამბლეის დელეგაციის სათადარიგო შემადგენლობაში ეყოლება ერთი წევრი;
   • ფრანკოფონიის საპარლამენტო ასამბლეის დელეგაციის ძირითად და სათადარიგო შემადგენლობაში - თითო წევრი;
   • საქართველოს პარლამენტის, მოლდოვის რესპუბლიკის პარლამენტის და უკრაინის ვერხოვნა რადას საპარლამენტო ასამბლეის დელეგაციის ძირითად შემადგენლობაში - ერთი წევრი;
   • საქართველოსა და პოლონეთის რესპუბლიკის საპარლამენტო ასამბლეის დელეგაციის ძირითად შემადგენლობაში - ერთი წევრი.
3. საქართველოს პარლამენტის ტერიტორიული მთლიანობის აღდგენისა და დეოკუპაცის საკითხებთან დაკავშირებულ დროებითი კომისიის შემადგენლობა 8 წევრიდან 10 წევრამდე გაიზარდა. კომისიაში ფრაქცია „ქართულო ოცნებას“ ეყოლება 5 წევრი, ფრაქციას „ლელო - პარტნიორობა საქართველოსათვის“ - 1 წევრი და კომისიაში წარმოდგენილ იქნება 4 უფრაქციო პარლამენტის წევრი.
4. 2020 წლის 31 ოქტომბრის საპარლამენტო არჩევნების შემსწავლელი საქართველოს პარლამენტის დროებითი საგამოძიებო კომისიის წევრთა რაოდენობა 4-დან 6-მდე იზრდება. კომისიაში ფრაქციას „ქართულო ოცნება“ ეყოლება 3 წევრი, ფრაქციას - „ლელო - პარტნიორობა საქართველოსათვის“ - 1 წევრი და კომისიაში წარმოდგენილ იქნება 2 უფრაქციო პარლამენტის წევრი.
5. საქართველოს პარლამენტის ეთიკის საბჭოს წევრების რაოდენობა უცვლელად რჩება. საბჭოს 8 წევრიდან 4 იქნება ფრაქცია „ქართულო ოცნების“ წარმომადგენელი, ერთი წევრი - ფრაქცია „ლელო - პარტნიორობა საქართველოსათვის“ წარმოდგენელი და სამი - უფრაქციო პარლამენტის წევრი.